1 Samuel 11

1 An sin chaidh Nahas an t-Amonach suas, agus champaich e an aghaidh Iabeis-ghilead: agus thubhairt uile dhaoine Iabeis ri Nahas, Dèan coicheangal rinn, agus nì sinne seirbhis dhut.

2 Agus fhreagair Nahas an t-Amonach iad, Air a’ chumha seo nì mi coicheangal ribh, gun spìon mi a-mach gach sùil dheas agaibh, agus gun cuir mi am masladh seo air Israel uile.

3 Agus thubhairt seanairean Iabeis ris, Thoir dhuinn dàil seachd làithean, a-chum gun cuir sinn teachdairean gu uile chrìochan Israeil; agus mura bi neach sam bith gu ar saoradh, an sin thèid sinn a-mach ad ionnsaigh.

4 An sin thàinig na teachdairean gu Gibeah Shauil, agus dh’innis iad an sgeul ann an cluasan an t-sluaigh: agus thog an sluagh uile suas an guth, agus ghuil iad.

5 Agus, feuch, thàinig Saul an dèidh a’ bhuair as a’ mhachair; agus thubhairt Saul, Ciod a thàinig air an t-sluagh, gu bheil iad a’ gul? Agus dh’innis iad dha sgeul dhaoine Iabeis.

6 Agus thùirling spiorad Dhè air Saul nuair a chuala e an sgeul sin, agus lasadh a fhearg gu mòr.

7 Agus ghabh e cuing dhamh, agus gheàrr e sìos nam mìrean iad, agus chuir e iad air feadh uile chrìochan Israeil le làimh theachdairean, ag ràdh, Ge bè nach tig a-mach an dèidh Shauil agus an dèidh Shamueil, mar seo nìthear ra dhaimh: agus thuit eagal an Tighearna air an t-sluagh, agus thàinig iad a-mach mar aon duine.

8 Agus nuair a chaidh an àireamh leis ann am Besec, bha ann de chloinn Israeil trì cheud mìle, agus de fhir Iùdah deich-mìle-fichead.

9 Agus thubhairt iad ris na teachdairean a thàinig, Mar seo their sibh ri fir Iabeis-ghilead, A-màireach, nuair a dh’fhàsas a’ ghrian teth, bidh cobhair agaibh. Agus thàinig na teachdairean, agus dh’innis iad sin do fhir Iabeis; agus bha aoibhneas orra.

10 Uime sin thubhairt fir Iabeis, A-màireach thèid sinn a-mach dur n-ionnsaigh, agus nì sibh rinn a rèir gach nì as àill leibh.

11 Agus air an là màireach chuir Saul an sluagh nan trì buidhnean; agus thàinig iad gu meadhon an fheachda ann am faire na maidne, agus bhuail iad na h-Amonaich gus an d’fhàs an là teth: agus sgapadh iadsan a mhair, air chor is nach d’fhàgadh dithis dhiubh cuideachd.

12 Agus thubhairt an sluagh ri Samuel, Cò a thubhairt, Cha rìghich Saul os ar cionn? Thugaibh an seo na daoine a-chum gun cuir sinn gu bàs iad.

13 Agus thubhairt Saul, Cha chuirear duine gu bàs air an là seo; oir an-diugh dh’obraich an Tighearna saorsa ann an Israel.

14 An sin thubhairt Samuel ris an t-sluagh, Thigibh, agus rachamaid do Ghilgal, agus ath-nuadhaicheamaid an sin an rìoghachd.

15 Agus chaidh an sluagh uile gu Gilgal, agus rinn iad Saul an sin na rìgh am fianais an Tighearna ann an Gilgal; agus dh’ìobair iad an sin ìobairtean thabhartas-sìthe am fianais an Tighearna: agus rinn Saul an sin agus fir Israeil uile gàirdeachas mòr.