2 Eachdraidh 33

1 Dà-bhliadhna-dheug a dh’aois bha Manaseh nuair a thòisich e air rìoghachadh, agus rìghich e còig-bliadhna-deug agus dà-fhichead ann an Ierusalem.

2 Ach rinn e olc ann an sùilean an Tighearna, a rèir gràinealachd nan cinneach, a thilg an Tighearna a-mach ro chloinn Israeil.

3 Oir thog e suas a-rìs na h-àitean àrda a sgrios Heseciah a athair, agus chuir e suas altairean do Bhàalim, agus rinn e doireachan, agus shleuchd e do uile shlòigh nan nèamh, agus rinn e seirbhis dhaibh.

4 Agus thog e altairean ann an taigh an Tighearna, mun dubhairt an Tighearna, Ann an Ierusalem bidh m’ainm-sa gu bràth.

5 Agus thog e altairean do uile shlòigh nan nèamh ann an dà chùirt taigh an Tighearna.

6 Agus thug e air a chloinn dol tron teine ann an gleann mac Hinoim; agus sheall e air comharraidhean, agus ghnàthaich e geasachd agus draoidheachd, agus chuir e air chois leannain-shìth agus luchd-fiosachd: dh’obraich e mòr-aingidheachd ann an sùilean an Tighearna, ga bhrosnachadh gu feirg.

7 Agus chuir e dealbh snaidhte, iodhal a rinn e, ann an taigh Dhè, mun dubhairt Dia ri Daibhidh, agus ri Solamh a mhac, Anns an taigh seo, agus ann an Ierusalem, a thagh mi à uile threubhan Israeil, cuiridh mi m’ainm gu bràth.

8 Agus cha charaich mi cas Israeil nas mò as an fhearann a dh’òrdaich mi dur n-athraichean: ma bheir iad a-mhàin an aire gun dèan iad gach nì a dh’àithn mi dhaibh, a rèir an lagha uile, agus nan reachd, agus nan riaghailt le làimh Mhaois.

9 Mar sin thug Manaseh air Iùdah agus luchd-àiteachaidh Ierusaleim dol air seachran, gu tuilleadh uilc a dhèanamh na rinn na cinnich, a sgrios an Tighearna ro chloinn Israeil.

10 Agus labhair an Tighearna ri Manaseh, agus ra shluagh; ach chan èisdeadh iad.

11 Uime sin thug an Tighearna orra ceannardan feachd rìgh Asiria: agus ghlac iad Manaseh ann an droighnich, agus cheangail iad e le slabhraidhean, agus thug iad leo e gu Bàbilon.

12 Agus nuair a bha e ann an àmhghar dh’iarr e an Tighearna a Dhia, agus dh’irioslaich e e fhèin gu mòr am fianais Dia a athraichean.

13 Agus rinn e ùrnaigh ris, agus rinneadh esan rèidh ris, agus dh’èisd e ra athchuinge, agus thug e air ais e gu Ierusalem da rìoghachd. Agus dh’aithnich Manaseh gur e an Tighearna as Dia ann.

14 Agus na dhèidh seo thog e balla an taobh a-muigh de bhaile Dhaibhidh, air an taobh an iar de Ghihon anns a’ ghleann, eadhon gu ruig dol a-steach geata an èisg, agus thug e mun cuairt air Ophel e, agus thog e suas e gu ro-àrd: agus chuir e ceannardan-cogaidh ann an uile bhailtean daingnichte Iùdah.

15 Agus chuir e air falbh na diathan coimheach agus an t-iodhal à taigh an Tighearna, agus na h-altairean uile a thog e ann an sliabh taigh an Tighearna, agus ann an Ierusalem, agus thilg e a-mach as a’ bhaile iad.

16 Agus chàraich e altair an Tighearna, agus dh’ìobair e oirre ìobairtean-sìthe agus buidheachais, agus dh’àithn e do Iùdah seirbhis a dhèanamh don Tighearna Dia Israeil.

17 Gidheadh, dh’ìobair an sluagh fhathast anns na h-àitean àrda, ach a-mhàin don Tighearna an Dia.

18 Agus a’ chuid eile de ghnìomharan Mhanaseh, agus a ùrnaigh ra Dhia, agus briathran nam fear-seallaidh a labhair ris ann an ainm an Tighearna Dia Israeil, feuch, tha iad sgrìobhte ann an leabhar rìghrean Israeil.

19 A ùrnaigh mar an ceudna, agus mar a dh’èisdeadh ris, agus a pheacadh uile, agus a easaontas, agus na h-àitean anns an do thog e ionadan àrda, agus anns an do chuir e suas doireachan agus dealbhan snaidhte, mun d’irioslaicheadh e, feuch, tha iad sgrìobhte am measg briathran nam fear-seallaidh.

20 Agus chaidil Manaseh maille ra athraichean, agus dh’adhlaic iad e na thaigh fhèin: agus rìghich a mhac Amon na àite.

21 Dà-bhliadhna-fichead a dh’aois bha Amon nuair a thòisich e air rìoghachadh, agus rìghich e dà bhliadhna ann an Ierusalem.

22 Agus rinn e olc ann an sùilean an Tighearna, mar a rinn Manaseh a athair: oir dh’ìobair Amon do na dealbhan snaidhte uile a rinn Manaseh a athair, agus rinn e seirbhis dhaibh:

23 Agus cha d’irioslaich e e fhèin am fianais an Tighearna, mar a dh’irioslaich Manaseh a athair e fhèin; ach mheudaich Amon easaontas.

24 Agus rinn a sheirbhisich ceannairc na aghaidh, agus mharbh iad e na thaigh fhèin.

25 Ach mharbh sluagh na tìre iadsan uile a rinn ceannairc an aghaidh rìgh Amoin, agus rinn sluagh na tìre Iosiah a mhac na rìgh na àite.