Amos 1

1 Briathran Amois, a bha am measg buachaillean Thecòa, a fhuair e mu thimcheall Israeil, ann an làithean Usiah rìgh Iùdah, agus ann an làithean Ierobòaim mhic Iohais, rìgh Israeil, dà bhliadhna ron chrith-thalmhainn.

2 Agus thubhairt e, Beucaidh Iehòbhah o Shion, agus o Ierusalem cuiridh e a-mach a ghuth; agus nì ionadan-còmhnaidh nam buachaillean bròn, agus seargaidh mullach Charmeil.

3 Mar seo tha an Tighearna ag ràdh, Airson trì lochdan Dhamascais, agus airson ceithir, cha till mi air falbh a pheanas; a chionn gun do bhuail iad Gilead le innealan-bualaidh iarainn.

4 Ach cuiridh mise teine air taigh Hasaeil, a loisgeas lùchairtean Bhen-hadaid.

5 Brisidh mi fòs crann-druididh Dhamascais, agus gearraidh mi as am fear-àiteachaidh o chòmhnard Abhein, agus esan a ghlacas an t-slat-rìoghail o thaigh Edein: agus siùbhlaidh sluagh Shiria ann am bruid gu Cir, deir an Tighearna.

6 Mar seo tha an Tighearna ag ràdh, Airson trì lochdan Ghàsa, agus airson ceithir, cha till mi air falbh a pheanas; a chionn gun tug iad a’ bhruid uile air falbh ann am braighdeanas, a-chum an toirt seachad do Edom.

7 Ach cuiridh mi teine air balla Ghàsa, a sgriosas a lùchairtean.

8 Agus gearraidh mi am fear-àiteachaidh air falbh o Asdod, agus esan a ghlacas an t-slat-rìoghail o Ascelon; agus tionndaidhidh mi mo làmh an aghaidh Ecroin: agus bàsaichidh fuidheall nam Philisteach, deir an Tighearna Iehòbhah.

9 Mar seo tha an Tighearna ag ràdh, Airson trì lochdan Thìruis, agus airson ceithir, cha till mi air falbh a pheanas; a chionn gun tug iad suas a’ bhruid uile do Edom, agus nach do chuimhnich iad an coicheangal bràthaireil.

10 Ach cuiridh mi teine air balla Thìruis, a loisgeas àrois rìoghail.

11 Mar seo tha an Tighearna ag ràdh, Airson trì lochdan Edoim, agus airson ceithir, cha till mi air falbh a pheanas; a chionn gun do ruaig e a bhràthair leis a’ chlaidheamh, agus gun do thilg e uaithe a h-uile iochd, agus gun do reub a fhearg a-ghnàth, agus gun do ghlèidh e a chorraich an còmhnaidh.

12 Ach cuiridh mi teine air Teman, a loisgeas lùchairtean Bhosrah.

13 Mar seo tha an Tighearna ag ràdh, Airson trì lochdan chloinn Amoin, agus airson ceithir, cha till mi air falbh a pheanas; a chionn gun do reub iad suas mnathan torrach Ghilead, a-chum an crìochan fhèin a chur ann am farsaingeachd.

14 Ach fadaidh mise teine air balla Rabah, agus loisgidh e sìos a lùchairtean, le iolaich ann an là a’ chatha, le cuairt-ghaoith ann an là na doininn.

15 Agus imichidh an rìgh ann am braighdeanas, e fhèin agus a mhòr-uaislean le chèile, deir an Tighearna.