Êxodo 2

1 Agus chaidh duine de thaigh Lèbhi, agus ghabh e nighean de Lèbhi na mnaoi.

2 Agus dh’fhàs a’ bhean torrach, agus rug i mac: agus nuair a chunnaic i gu robh e na leanabh tlachdmhor, dh’fhalaich i e rè trì mìosan.

3 Agus nuair nach b’urrainn i a fhalach na b’fhaide, ghabh i dha cobhan cuilce, agus chuir i thairis e le làthaich agus le pic, agus chuir i an leanabh ann; agus chuir i e anns a’ chuilc aig bruaich na h-aibhne.

4 Agus sheas a phiuthar am fad uaithe, a dh’fhaicinn ciod a dhèante ris.

5 Agus thàinig nighean Phàraoh a-nuas ga nighe fhèin anns an abhainn, agus bha a maighdeannan ag imeachd ri taobh na h-aibhne; agus nuair a chunnaic i an cobhan am measg na cuilce, chuir i a banoglach ga thoirt da h-ionnsaigh.

6 Agus nuair a dh’fhosgail i e, chunnaic i an leanabh: agus, feuch, ghuil an naoidhean. Agus ghabh i truas ris, agus thubhairt i, Is aon seo de chloinn nan Eabhraidheach.

7 An sin thubhairt a phiuthar ri nighinn Phàraoh, An tèid mise, agus an gairm mi dhut banaltram de na mnathan Eabhraidheach, a-chum is gun altraim i an leanabh dhut?

8 Agus thubhairt nighean Phàraoh rithe, Falbh. Agus chaidh a’ mhaighdeann, agus ghairm i màthair an leinibh.

9 Agus thubhairt nighean Phàraoh rithe, Thoir an leanabh seo leat, agus altraim dhòmhsa e, agus bheir mi dhut do thuarasdal. Agus ghabh a’ bhean an leanabh, agus dh’altraim i e.

10 Agus dh’fhàs an leanabh, agus thug i e a dh’ionnsaigh nighean Phàraoh, agus bha e na mhac dhi. Agus thug i Maois mar ainm air: agus thubhairt i, A chionn as an uisge gun do tharraing mi a-mach e.

11 Agus thàrladh anns na làithean sin, nuair a dh’fhàs Maois suas, gun deachaidh e a-mach a dh’ionnsaigh a bhràithrean, agus gun d’amhairc e air an eallaichean: agus chunnaic e Eiphiteach a’ bualadh Eabhraidhich, aon de a bhràithrean.

12 Agus dh’amhairc e an taobh seo agus an taobh ud, agus nuair a chunnaic e nach robh aon duine ann, mharbh e an t-Eiphiteach, agus dh’fhalaich e anns a’ ghaineamh e.

13 Agus nuair a chaidh e a-mach an dara là, feuch, bha dithis de na h-Eabhraidhich a’ strì ri chèile; agus thubhairt e ris-san a rinn an eucoir, Carson a bhuaileas tu do choimhearsnach?

14 Agus thubhairt e, Cò a rinn thusa ad uachdaran agus ad bhritheamh oirnne? Am miann leat mise a mharbhadh, mar a mharbh thu an t-Eiphiteach? Agus ghabh Maois eagal, agus thubhairt e, Gu cinnteach tha an nì seo aithnichte.

15 A-nis nuair a chuala Phàraoh an nì seo, dh’iarr e Maois a mharbhadh, ach theich Maois o aghaidh Phàraoh, agus ghabh e còmhnaidh ann an tìr Mhidiain; agus shuidh e sìos làimh ri tobar.

16 A-nis bha aig sagart Mhidiain seachdnar nighean: agus thàinig iad agus tharraing iad uisge agus lìon iad na h-amair a thoirt uisge do threud an athar.

17 Agus thàinig na buachaillean agus dh’fhuadaich iad air falbh iad: ach sheas Maois suas agus chuidich e leo, agus thug e uisge dan treud.

18 Agus nuair a thàinig iad gu Reuel an athair, thubhairt e, Cionnas a thàinig sibh cho luath an-diugh?

19 Agus thubhairt iad, Shaor Eiphiteach sinn à làimh nam buachaillean, agus mar an ceudna tharraing e uisge gu leòr dhuinn, agus thug e uisge don treud.

20 Agus thubhairt esan ra nigheanan, Agus càit a bheil e? Carson a dh’fhàg sibh an duine? Gairmibh air, a-chum is gun ith e aran.

21 Agus bha Maois toileach còmhnaidh a ghabhail maille ris an duine: agus thug e Siporah a nighean do Mhaois mar mhnaoi.

22 Agus rug i mac dha, agus thug e Gersom mar ainm air: oir thubhairt e, Bha mi am choigreach ann an tìr aineoil.

23 Agus thàrladh an ceann mòran làithean gun d’fhuair rìgh na h-Eiphit bàs, agus bha clann Israeil ag osnaich airson an daorsa, agus ghlaodh iad; agus thàinig an glaodh suas gu Dia, airson na daorsa.

24 Agus chuala Dia an osnaich, agus chuimhnich Dia a choicheangal ri Abrahàm, ri Isaac, agus ri Iàcob.

25 Agus dh’amhairc Dia air cloinn Israeil, agus dh’fhiosraich e iad.