تْسَالُونِيكِي الثَّانْيَة 2

آشْ بِشْ يْصِيرْ قْبَلْ مَا يِرْجَعْ الرَّبْ

1 آمَا فِي مَا يْخُصْ رْجُوعْ رَبْنَا يَسُوعْ المَسِيحْ الِّي بِشْ يَجْمَعْنَا بِيهْ، نُطْلْبُوا مِنْكُمْ يَا إِخْوَة 2 بَاشْ مَا تُدْخْلُوشْ بْعَضْكُمْ فِيسَعْ ومَا تِتْرِعْبُوشْ مِنْ حَتَّى نُبُوَّةْ ولَا كِلْمَة ولَا رِسَالَة نِسْبُوهَا لِينَا تْقُولْ إِنُّو النْهَارْ الِّي يِرْجَعْ فِيهْ الرَّبْ جَاء. 3 مَا تْخَلِّيوْ حَتَّى حَدْ يْغَلِّطْكُمْ بْأَيْ طَرِيقَة! رَاهُو النْهَارْ الِّي يِرْجَعْ فِيهْ الرَّبْ مَا يْجِي كَانْ بَعْدْمَا النَّاسْ يُرْفْضُوا اللَّهْ، ويُظْهُرْ الشَّخْصْ الِّي يِتْجَسِّدْ فِيهْ الشَّرْ الكُلْ، ولِّي مْصِيرُو الهْلَاكْ، 4 هُوَّ العْدُوْ الِّي بِشْ يْحُطْ رُوحُو فُوقْ كُلْ مَا يِتْسَمَّى إِلَاهْ وكُلْ مَا هُوَّ مَعْبُودْ، حَتَّى إِنُّو يُقْعُدْ فِي هَيْكِلْ اللَّهْ، ويْقُولْ الِّي هُوَّ اللَّهْ نَفْسُو.

5 يَاخِي مَا تِتْذَكْرُوشْ إِنِّي قُلْتِلْكُمْ هَاذَا بَرْشَة مَرَّاتْ وَقْتِلِّي كُنْتْ عَنْدْكُمْ؟ 6 وإِنْتُومَا تَعْرْفُوا شْنُوَّة الِّي شَادُّو تَوَّا، بَاشْ مَا يُظْهُرْ كَانْ مَا يْجِي وَقْتُو. 7 وقُوِّةْ الشَّرْ قَاعْدَة تِخْدِمْ تَوَّا فِي السِّرْ، عْلَى خَاطِرْ فَمَّة حَاجِزْ مَانِعْهَا، آمَا وَقْتِلِّي الحَاجِزْ هَاذَا يِتْنَّحَى، 8 يِتْكْشِفْ الشَّخْصْ الِّي يِتْجَسِّدْ فِيهْ الشَّرْ الكُلْ، والرَّبْ يَسُوعْ يَقْضِي عْلِيهْ بْنَفْخَة مِنْ فُمُّو ويِمْحِيهْ بْظْهُورُو المَجِيدْ.

9 والشِّرِّيرْ هَاذَا يْجِي بْقُوَّة مِالشِّيطَانْ، ويَعْمِلْ مُعْجْزَاتْ وعَلَامَاتْ وعْجَايِبْ مَاهُمْشْ بِالحَقْ، 10 ويِسْتَعْمِلْ كُلْ أَنْوَاعْ الشَّرْ بَاشْ يْغَلِّطْ الِّي مْصِيرْهُمْ الهْلَاكْ، عْلَى خَاطِرْهُمْ مَا قِبْلُوشْ ومَا حَبُّوشْ الحَقْ الِّي يْنَجِّيهُمْ. 11 هَاذَاكَا عْلَاشْ اللَّهْ يْغَرِّقْهُمْ فِي الضْلَالْ، حَتَّى يْوَلِّيوْ يْصَدْقُوا الكِذْبْ، 12 ويُحْكُمْ عْلَى كُلْ الِّي مَا أَمْنُوشْ بِالحَقْ وفَرْحُوا بِالشَّرْ.

إِثْبْتُوا فِي الإِيمَانْ

13 آمَا أَحْنَا يَا خْوَاتِي الِّي يْحِبْهُمْ الرَّبْ، يِلْزِمْنَا نُشْكْرُوا اللَّهْ فِي كُلْ وَقْتْ عْلَى خَاطِرْكُمْ، عْلَى خَاطْرُو إِخْتَارْكُمْ مِالأُوِّلْ بَاشْ تِنْجَاوْ بِالرُّوحْ الِّي يْقَدِّسْكُمْ وبْإِيمَانْكُمْ بِالحَقْ. 14 وهُوَّ دْعَاكُمْ لْهَاذَا بِالبْشَارَة الِّي وَصِّلْنَاهَالْكُمْ، بَاشْ تْكُونُوا مْشَارْكِينْ فِي مَجْدْ رَبْنَا يَسُوعْ المَسِيحْ. 15 مَالَا إِثْبْتُوا يَا خْوَاتِي، وحَافْظُوا عْلَى الوْصَايَا الِّي عَلَّمْنَاهَالْكُمْ، سِوَى قُلْنَاهَا وَلَّا كْتِبْنَاهَا فِي رِسَالَة.

16 ونُطْلْبُوا مِنْ رَبْنَا يَسُوعْ المَسِيحْ بِيدُو، واللَّهْ بُونَا الِّي حَبْنَا ونْعِمْ عْلِينَا بْتَشْجِيعْ أَبَدِي وبِرْجَى أَكِيدْ، 17 بَاشْ يْشَجْعُوا قْلُوبْكُمْ ويْثَبْتُوكُمْ بَاشْ دِيمَا تْقُولُوا وتَعْمْلُوا كُلْ مَا هُوَّ صَالَحْ.