تْسَالُونِيكِي الثَّانْيَة 2

آشْ بِشْ يْصِيرْ قْبَلْ مَا يِرْجَعْ الرَّبْ

1 آمَا فِي مَا يْخُصْ رْجُوعْ رَبْنَا يَسُوعْ المَسِيحْ الِّي بِشْ يَجْمَعْنَا بِيهْ، نُطْلْبُوا مِنْكُمْ يَا إِخْوَة 2 بَاشْ مَا تُدْخْلُوشْ بْعَضْكُمْ فِيسَعْ ومَا تِتْرِعْبُوشْ مِنْ حَتَّى نُبُوَّةْ ولَا كِلْمَة ولَا رِسَالَة نِسْبُوهَا لِينَا تْقُولْ إِنُّو النْهَارْ الِّي يِرْجَعْ فِيهْ الرَّبْ جَاء. 3 مَا تْخَلِّيوْ حَتَّى حَدْ يْغَلِّطْكُمْ بْأَيْ طَرِيقَة! رَاهُو النْهَارْ الِّي يِرْجَعْ فِيهْ الرَّبْ مَا يْجِي كَانْ بَعْدْمَا النَّاسْ يُرْفْضُوا اللَّهْ، ويُظْهُرْ الشَّخْصْ الِّي يِتْجَسِّدْ فِيهْ الشَّرْ الكُلْ، ولِّي مْصِيرُو الهْلَاكْ، 4 هُوَّ العْدُوْ الِّي بِشْ يْحُطْ رُوحُو فُوقْ كُلْ مَا يِتْسَمَّى إِلَاهْ وكُلْ مَا هُوَّ مَعْبُودْ، حَتَّى إِنُّو يُقْعُدْ فِي هَيْكِلْ اللَّهْ، ويْقُولْ الِّي هُوَّ اللَّهْ نَفْسُو.