1 Ni mɔɔ mɛnilu bɛɛ lara a la ko Isa le Ɲenematɔmɔnin di, woilu bɛɛ ye Alla denilu le ri. Ni mɔɔ mɛnilu ka Fa Alla kanin, woilu ri a denilu fanan kanin. 2 Ni an ka Alla kanin ka a la jamariliilu labato, an di a lɔn wo rɔ ko an ye a denilu kaninna. 3 Wo rɔ, Alla kanin ye le; i ye a la jamarili bɛɛ labato. Woilu kɛ fanan ma gbɛlɛn an ma. 4 Mɔɔ mɛnilu ye Alla denilu ri, woilu bɛɛ ye sela dunuɲa la. Mɛn da nɔ sɔrɔn dunuɲa ma, wo ye an na lemɛniya ri. 5 A ye di? Yon ye sela dunuɲa la? Mɔɔ si ti sela dunuɲa la fɔɔ mɛn lani a la ko Isa ye Alla Dencɛ le ri.

6 Isa Ɲenematɔmɔnin de nara ji ni jeli fɛ. A ma na ji gbansan fɛ de! A nara ji ni jeli fɛ. Nii Sɛniman ye sereya bɔla ko tuɲa le wo ri, baa ale le tuɲatii ri. 7 Sere sawa ye ye: 8 mɛn ye Nii Sɛniman ni ji ni jeli le ri. Wo sawa bɛɛ bɛnnin kan kelen ma. 9 Mɔɔilu ye sereya mɛn fɔla, an di la a la ko wo ye tuɲa ri. Kɔni Alla ye sereya mɛn fɔla, wo ka bon mɔɔilu ta ri. Alla ka sereya mɛn fɔ, wo le ɲin di: a kumara a Dencɛ la ko rɔ. 10 Ni mɔɔ mɛn lemɛniyara Alla Dencɛ ma, wo tii ra sɔn Alla la sereya wo ma ka wo lamara a jusu rɔ. Kɔni ni mɔɔ mɛn ma la Alla la kuma la, wo tii ra Alla kɛ wuyafɔla ri, baa Alla ka sereya mɛn fɔ a Dencɛ la ko rɔ, wo tii ma la wo la. 11 Alla ka sereya mɛn fɔ, wo le ɲin: a ka a fɔ ko a ra ɲenemaya banbali di an ma, ko ɲenemaya wo ye sɔrɔnna a Dencɛ le fɛ. 12 Mɔɔ mɛn sidinin Alla Dencɛ ma, ɲenemaya banbali ye wo tii bolo. Kɔni mɔɔ mɛn sidinin tɛ Alla Dencɛ ma, ɲenemaya banbali tɛ wo tii bolo.

13 N ye sɛbɛ ɲin nawala ai ma, ai mɛnilu lemɛniyani Alla Dencɛ ma, sa ai ri a lɔn ko ɲenemaya banbali ye ai bolo. 14 An lani a la fewu ko ni an ka Alla ko ko la ka fara a sawo la, a ri an na tarali wo mɛn. 15 Ikomin an ka a lɔn ko a ye an na taralilu mɛnna, an ka a lɔn fanan ko an da ko si si tara a la, a ye wo dila an ma.

16 Hakɛ do ye ye, mɛn tɛ mɔɔ lawala saya ma. Ni ai do ka a badenma ɲenematɔmɔnin yen hakɛ su wo kɛla, a ye Alla tara wo yɛ. Alla ri tarali wo mira ka ɲenemaya jɛrɛ jɛrɛ di a ma. Mɛnilu la julumun ti nala ii lawala saya ma, n kan ye woilu le ma. Kɔni julumun do ye ye, mɛn di mɔɔ lawa saya ma. N ma a fɔ ko ai ye Alla tara wo tii yɛ. 17 Telenbaliya ko bɛɛ ye julumun de ri. Kɔni julumun do ye ye, mɛn tɛ kɛla mɔɔ sa kun di.

18 An ka a lɔn ko mɔɔ mɔɔ kɛra Alla den di, wo tii tɛ tola hakɛ kɛla, baa Alla Dencɛ ye wo tii lakandanna. Wo rɔ, Ko Juu Tii ti se ko kɛla a la.

19 An ka a lɔn ko an ye Alla ta le ri, kɔni dunuɲa mɔɔilu bɛɛ ye Ko Juu Tii fanka le kɔrɔ.

20 An ka a lɔn fanan ko Alla Dencɛ nara ka hankili di an ma, sa an di Alla jɛrɛ jɛrɛ lɔn. An sidinin Alla jɛrɛ jɛrɛ ma, baa an sidinin a Dencɛ Isa Ɲenematɔmɔnin ma. Ale le Alla jɛrɛ jɛrɛ ri. Ale le fanan ye ɲenemaya banbali dila mɔɔilu ma.

21 N na den mɛsɛnilu, ai ye mataa joo koilu la.