1 An ka a lɔn ko an nii ye faribanku le rɔ mɛn kɛnin ikomin an sii faaninbon dunuɲa rɔ, ni wo tiɲanda, habadan bon ye an bolo mɛn kɛnin harijeene fari ri Alla baara nɔ, mɔɔilu ma mɛn nadan. 2 Nba, sisɛn an ye kurunna faaninbon ɲin dɔ, an faribanku, baa an na habadan sii diya lɔɔ ye an mirala kosɛbɛ, kosa harijeene fari ye la an ma ikomin faanin. 3 Ka a masɔrɔn an wa wo faanin don an kɛnin tɛ butun ikomin an makolon de a ri. 4 Baa an wa kɛ faaninbon ɲin kɔndɔ, an ye kurunna, kunko ye an ma. An tɛ a fɛ ka faanin kɔrɔn bɔ an ma, kɔni a lɔɔ ye an na, harijeene fari ye la an ma ikomin faanin, kosa fen mɛn ye faala wo ri latunun ɲenemaya rɔ. 5 Alla ka an dan wo ko kelen ma, ka a la Nii Sɛniman di an ma, ka kɛ ikomin fen fɔlɔ mɛn donnin an bolo tɔɔmasere ri kosa an ye la ko natɔilu la.

6 Wo le rɔ, an jii latɛɛnin waati bɛɛ. An ka a lɔn ko fanin an ye an wara faribanku ɲin dɔ, an ni Maari sii diya tɛma ka jan. 7 An ye taamanna lemɛniya le fɛ, kɔni fen yennin tɛ a ri. 8 Wo rɔ, an jii latɛɛnin. A ri diya an yɛ, ka bɔ faribanku ɲin dɔ, ka wa sii Maari wara. 9 Mɛn kunnafulen ye an yɛ, ka Alla diya, ni an tora an faribanku rɔ wala ni an bɔra a rɔ. 10 Baa a fɛrɛ tɛ ye fɔɔ an bɛɛ ye lɔ kɛnɛma Ɲenematɔmɔnin na kitila diya ɲakɔrɔ. Mɔɔilu bɛɛ ri ii kɛwaliilu sara sɔrɔn kelen kelen ɲa ma, a ka mɛn kɛ a la dunuɲaratɛɛ rɔ, a ɲuma wala a juuman.

11 Baa an ka Maari ɲakɔrɔsilan lɔn, wo le rɔ, an karannin ka mɔɔilu kɔndasu. Alla ka an lɔn kosɛbɛ. N jii lanin a rɔ, ai fanan ka an lɔn ai hankili rɔ. 12 An karannin tɛ an jɛrɛ lanalima ai yɛ ikɔ tuun. Kɔni an ye fɛrɛ le dila ai ma, ka ai jɛrɛdabaya an na ko rɔ, kosa ai ye se wo mɔɔilu jabila mɛnilu ye ii wasola kɛɲa koilu la sani ii ye ii jɛrɛdabayala jusu rɔ koilu rɔ. 13 Ni andeilu ye fatɔ le ri, wo ye Alla le ma; kɔni ni hankilima le an di, wo ye aile le ma. 14 Baa Ɲenematɔmɔnin na kaninteya le an diyagboyala, baa andeilu lanin a la ko mɔɔ kelen pe le faanin bɛɛ yɛ, wo rɔ, bɛɛ ra faa ale rɔ. 15 A faara mɔɔ bɛɛ yɛ, ko mɔɔ mɛnilu ye ii nii la, woilu tɛ ii nii la ii jɛrɛ yɛ butun, kɔni fɔɔ mɛn faanin iile yɛ, ka wuli ka bɔ saya rɔ.

16 Nba, sisɛn an tɛ mɔɔ si jatela adamadenya sila kan butun. Hali an tɛrɛ Ɲenematɔmɔnin jatela wo ɲa ma, an tɛ wo kɛla butun. 17 Wo rɔ, ni mɔɔ si ye Ɲenematɔmɔnin dɔ, wo tii ra kɛ dannin kura ri. A su kɔrɔilu ra tamin, a kurailu ra na! 18 Wo bɛɛ faranin Alla le la, mɛn ye an ni ale tɛmala rabɛnna a la Mɔɔ Ɲenematɔmɔnin fɛ, ka baara don an bolo ko an fanan ye ale ni doilu tɛmala rabɛn: 19 ko Alla tɛrɛ a jɛrɛ ni dunuɲa mɔɔilu tɛmala rabɛnna a la Mɔɔ Ɲenematɔmɔnin de fɛ, a tɛrɛ tɛ ii hakɛ jatela butun. A ra wo tɛɛ rabɛn fɛrɛ kibaro karifa an na.

20 Wo rɔ, Ɲenematɔmɔnin na keladenilu le an di. Alla jɛrɛ le mɔɔilu la wakalila an na kuma fɛ. An ka a fɔ ko, «An da ai madiya Ɲenematɔmɔnin tɔɔ rɔ, ai ye ai ni Alla tɛmala rabɛn.» 21 Mɛn ma julumun si kɛ, Alla ka wo kɛ julumuntɔ ri andeilu la ko kosɔn, kosa an ye kɛ Alla la telen di Isa baraka rɔ.