1 Nde Pɔli, n ye ai madiyala Ɲenematɔmɔnin na fanmajii ni jusu ɲumaya rɔ, hali doilu ye a fɔla ko n ye kumala ai ɲakɔrɔ jɛrɛ majii le rɔ, kɔni ko n wa bɔ ai tɔrɔfɛ, n di jaman ai ma. 2 N ye ai madiyala, n wa na ai tɔrɔfɛ, ai kana n diyagboya ka jaman ai ma bakɛ, ka a masɔrɔn n lanin a la, n di susu wo kɛla doilu la fewu, mɛnilu ka ii miri ko an ye an na dunuɲaratɛɛ kɛla adamadenya sila le kan. 3 Baa an ye dunuɲaratɛɛ kɛla adamadenya le rɔ, kɔni an tɛ kɛlɛ kɛla adamadenya sila kan. 4 Baa an na kɛlɛkɛfenilu kɛnin tɛ ikomin adamadenilu ta: Alla la kɛlɛkɛ fen fankamailu le ii ri, mɛnilu ri se bon masɔrɔn gbomanilu tiɲanna. An ye wuya miriyailu tiɲanna woilu le la, 5 a ni waso mɛn bɛɛ ye bɔla Alla la lɔnnin kanma. An di miriya bɛɛ diyagboya mira kɛ kosa ii ye kolo Alla la Mɔɔ Ɲenematɔmɔnin ma. 6 Ai wa wo kolo lakanbali waati mɛn na, an di wuli ka a mirabaliilu hakɛilu sara ii la.

7 Ai ye koilu kɔkanna le dɔrɔn yenna. Ni mɔɔ doilu ra la a jɛrɛ la ko a ye Ɲenematɔmɔnin de rɔ, a ye a miri ɲin ma: ko Ɲenematɔmɔnin de ta ye an fanan di ikomin ale. 8 Maari ka fanka di an ma ai fanka don ko le rɔ, ai tiɲan ko tɛ. Hali n ye n jɛrɛ matɔɔla wo la ka tamin dɔɔnin, n ti nala maloyala wo ko la. 9 N tɛ a fɛ, a ye kɛ ikomin n ye ai masilanna n na batakiilu le la. 10 Baa, doilu ye a fɔla ko, «Pɔli la batakiilu gbɛlɛnman, ii fanka ka bon, kɔni ni a jɛrɛ ye an tɔrɔfɛ, fanka tɛ a la, foyi tɛ a la kuma ri.» 11 Wo tii ye a miri le ko an ye ɲa mɛn ma an wa kɛ bataki sɛbɛla, an kɛwaliilu ye tola wo ɲa le ma an wa kɛ ai tɛma.

12 Mɔɔ doilu ye ye mɛnilu ye ii jɛrɛ matɔɔla, adon an tɛ susu an jɛrɛ lala woilu ma wala an ni woilu ye jate an ɲɔɔn fɛ. Ii wa misaliya ta ii jɛrɛ ma, ka ii jɛrɛ la ii jɛrɛ ma, hankilidɔɔ le woilu ri. 13 Kɔni andeilu ti nala an jɛrɛ matɔɔla ka a dan natamin. Alla ra baara mɛn don an bolo, an tɛ an jɛrɛ matɔɔla ka tamin wo la, baara wo ra se haan ai tɔrɔfɛ. 14 Baa an na jɛrɛ matɔɔ taminnin tɛ an danna, ikomin an tɛrɛ mɛn kɛla ni an tɛrɛ ma na ai wara, baa ande fɔlɔ le nanin haan ai tɔrɔfɛ Ɲenematɔmɔnin na ko Kibaro Ɲuma lase diya. 15 Kɔni, an tɛ an jɛrɛ matɔɔla, ka a dan natamin, doilu la baara la ko rɔ. Kɔni an jii lanin a rɔ ko ai la lemɛniya wa wara, an na baara kunda ri wara ai tɛma,* 16 kosa mara mɛnilu ye ai wara kɔma, an di se Isa la ko Kibaro Ɲuma lasela woilu ma, sani an ye an jɛrɛ matɔɔ doilu la baara rɔ mɛn kɛnin mɔɔ gbɛrɛilu la baara kunda ri. 17 Kɔni, a sɛbɛnin Kitabu kɔndɔ ko, «Ni mɛn ye a jɛrɛ matɔɔla, a ye a jɛrɛ matɔɔ Maari la ko rɔ.»* 18 Baa mɔɔ mɛn ye a jɛrɛ lanala, Alla tɛ wo lamirala fɔɔ Maari wa mɛn nana.