1 Baa an ni Alla ye baarala an ɲɔɔn fɛ, an da ai madiya, ai ka Alla la hina mɛn sɔrɔn, ai kana wo jate ko fuu ri. 2 Baa a fɔnin de ko,

«N da i lamɛn n na ladiyaɲɛ waati rɔ,

ka i dɛmɛn niilakisi lon.»*

N ye a fɔla ai yɛ, sisɛn Alla la ladiyaɲɛ waati le, sisɛn niilakisi lon de.

3 An ma sennatufen bila mɔɔ si ɲɛrɔ, kosa fɛɛ si ti nala yenna an na baara la. 4 Kɔni, an ye an jɛrɛ lanala ɲa bɛɛ ma, ikomin Alla la baaradenilu: tunadiya ba ni tɔrɔya ni ko gbɛlɛnilu ni kɔndafili koilu rɔ; 5 ni ii ka an gbasi, ka an bila kaso la, ni ii ka jama lamurunti, ni an ye baara gbɛlɛnilu ni sunɔɔbaliya ni kɔnkɔ rɔ; 6 sɛninya ni lɔnnin ni diɲɛ ni ɲɛnikɛ ɲuma; ni Alla la Nii Sɛniman, ni kaninteya bɛrɛ rɔ; 7 a ni tuɲa kuma, ni Alla la fanka rɔ; a ni telenbaya mɛn ye an na kɛlɛkɛfenilu ni an na makandan fenilu ri; 8 an wa kɛ gbiliya rɔ, wala maloya rɔ, an wa kɛ tɔɔ tiɲan dɔ wala tɔɔ ɲuma, an telennin adon an da jate janfantenilu ri; 9 an miranin ikomin mɔɔ mɛnilu lɔnnin tɛ, adon an lɔnnin kosɛbɛ; an jatenin ikomin an faatɔla le tɛrɛ, adon ai ye a ragbɛ an kɛndɛ le ten; an ɲakankatannin, adon ii ma an faa; 10 an jatenin mɔɔ sununninilu ri, adon an sɛwanin waati bɛɛ; an miranin ikomin bolokolonilu adon an da mɔɔ siyaman kɛ fen tiilu ri; foyi tɛ an bolo, adon an ta le fen bɛɛ ri.

11 Kɔrɛntikailu, an da kuma ai yɛ kɛnɛma, ka ladiyaɲɛ sɔrɔn ai la. 12 An ma an na kaninteya dokon ai ma, kɔni ai ra ai ta dokon an ma. 13 N da kuma ai yɛ ikomin n denilu. A dahanin, ai fanan ye ladiyaɲɛ sɔrɔn an na.

14 Ai ni lemɛniyabaliilu kana kun sidi jiri kelen ta ka ai ladɛn ko kelen ma. Baa telenbaya ni telenbaliya ri bɛn ii ɲɔɔn ma ko ɲuman dɔ? Kɛnɛya ni dibi ri bɛn ii ɲɔɔn ma wa? 15 Ɲenematɔmɔnin ni Setana ri se bɛnna di? Lemɛniya mɔɔ bɛnnin lemɛniyabali ma ɲa ɲuman ma? 16 Bɛn ɲuman ye Alla batobonba ni joo tɛma? Baa Alla ɲenema la batobon de an di, ikomin Alla ka a fɔ ɲa mɛn ma ko, «N di to ii tɛma, ka n mataama ii tɛma, ka kɛ ii la Alla ri, ii fanan di kɛ n na jama ri.» 17 Wo le rɔ, Maari ka a fɔ ko,

«Ai ye bɔ woilu tɛma, ka ai mataa ii la. Ai kana maa fen dahabali si la, wo rɔ nde ri ai lamira.» 18 Maari Sebɛɛtii ka ɲin de fɔ ko, «N di kɛ ai fa ri, ai ri kɛ n dencɛilu ni n denmusoilu ri.»*