1 Wo le rɔ, n da a latɛɛ ko n kana n kɔsɛ ai wara niilafin dɔ. 2 Baa ni n ka ai niilafin, yon de nde lasɛwala ka bɔ aile ma, n ka mɛnilu niilafin? 3 Wo le rɔ, n ka sɛbɛli kɛ ai ma, kosa n wa na ai wara tuma mɛn na, n jusu kana kasi ai la ko rɔ, aile mɛn ka kan ka kɛ n na sɛwa kun di. N lanin tɛrɛ a la, ko n na sɛwa ri kɛ ai la sɛwa ri. 4 N ka wo sɛbɛli kɛ ai ma tɔrɔ ba ni jusu lafin ni ɲaji le rɔ. N tɛrɛ tɛ ai niilafin ko rɔ, kɔni n tɛrɛ ai lalɔnna le, ko n da ai kanin haan!

5 Ni ai le do kɛra jama niilafin fɛrɛ ri, a ma nde niilafin, kɔni fɔɔ ai le jama bɛɛ, adon tuɲa ye mɛn di, a ka bɛɛ niilafin dɔɔnin. 6 Ai siyaman da a ɲakankatan, wo ra wasa. 7 Nba, sisɛn, fɔɔ ai ye wo tii makoto le, ka a lalemɛniya, kosa a jusu ti nala lafinna ba kɛ haan ka jiitɛɛ. 8 Wo rɔ, n da ai madiya, ai ye ai la kaninteya yiraka a la. 9 Baa n ka a sɛbɛ ai ma le kosa n ye ai sɔn lɔn, ka a lɔn ko ni ai kolonin ko bɛɛ rɔ. 10 Ai wa mɔɔ mɛn makoto, nde fanan di wo makoto. Nde wa mɛn makoto, ni makoto ko le tɛrɛ a ri, n ye wo kɛla aile le la ko rɔ Ɲenematɔmɔnin ɲakɔrɔ, 11 kosa Setana kana an magbɛrɛn kɛ, baa an ka a la ko rabɛnniilu lɔn.

12 Nba, n wara Torohasi so kɔndɔ Ɲenematɔmɔnin na ko Kibaro Ɲuma lase diya waati mɛn na, n ka a yen ko Maari ra da laka n yɛ ye. 13 Kɔni n hankili tɛrɛ tɛ siinin, ka a masɔrɔn n ma n badenma Tite sɔrɔn ye. Wo le rɔ, n ka ye mɔɔilu fo, ka wa Masedoniya.

14 Kɔni Alla tando, mɛn ye nɔli dila an ma Ɲenematɔmɔnin dɔ, ka lɔ an ɲɛrɔ ka wa yɔrɔ bɛɛ rɔ, a ri a lɔn dajɛnsɛn an fɛ ikomin fen suma duman mɛn ye jɛnsɛnna. 15 Baa an kɛnin de ikomin wusulan suma Ɲenematɔmɔnin ye mɛn janinna, ka a lase Alla ma jama bɛɛ tɛma, kisi mɔɔilu ni mɛnilu ye halakila. 16 A kɛnin saya suma le ri mɔɔ doilu yɛ mɛnilu ye lawala saya rɔ, ka kɛ nii lakisi suma ri do gbɛrɛilu yɛ mɛnilu ye lawala nii lakisi rɔ. Yon di se baara ɲin kɛla? 17 Adon, andeilu kɛnin tɛ ikomin mɔɔ mɛnilu ye Alla la kuma kɛla julaya fen di. Kɔni andeilu ye kumala Ɲenematɔmɔnin baraka le rɔ ka fara Alla la an jusu gbɛ rɔ Alla ɲakɔrɔ.