1 Ai ri diɲɛ wa, ni n ka fatɔya dɔɔnin fɔ ai yɛ? Kɔni ai diɲɛnin fɔlɔ! 2 Keleya le n dɔ ai la ko rɔ, keleya mɛn faranin Alla la. A kɛnin de ikomin n ka ai mamira furu le rɔ cɛɛ kelen pe yɛ, Ɲenematɔmɔnin, kosa n ye ai di a ma ikomin sunkurun nasɔlɔnin. 3 Kɔni ikomin duuma saa ka n ma Hawa majuuwaya ɲa mɛn ma, n silannin ko do ye ai hankiliilu lafili ka ai mataa ai fasanin Ɲenematɔmɔnin ma, fasanin mɛn ye kɔnɔragbɛya ni sɛniman di. 4 Baa ni mɔɔ do nara Isa gbɛrɛ la ko kawandili bɔ ai yɛ, an ma mɛn na ko kawandili bɔ, wala ni ai ka nii gbɛrɛ sɔrɔn ai ma mɛn sɔrɔn an na, wala ni ai ka Kibaro Ɲuma gbɛrɛ lamɛn, ai ma mɛn namira a fɔlɔ rɔ, ai ri sɔn wo bɛɛ rɔ kosɛbɛ! 5 Kɔni mɔɔ ɲinilu mɛnilu ye ii jɛrɛ jatela talibidenba fisamantɛilu ri, n lanin tɛ a la ni woilu taminnin nde la ɲaɲa ma. 6 Tumado, n ma kusan kumala, kɔni n ka ko lɔn. An da wo lagbɛ ai yɛ ɲa bɛɛ ma.

7 N ka Alla la ko Kibaro Ɲuma lase ai ma waati mɛn na, n ma foyi lamira ai la, n ka n jɛrɛ majii kosa n ye aile layɛlɛ, n ka hakɛ le kɛ ai la wo rɔ wa? 8 N ka fen suɲa ten lemɛniya jama gbɛrɛilu ma, ii ka n sara di, kosa n ye baara ai yɛ. 9 N tɛrɛ ai tɔrɔfɛ waati mɛn na, makoilu tɛrɛ n na ko do rɔ, n ma mɔɔ si tɔrɔ, baa lemɛniya mɔɔ mɛnilu bɔra Masedoniya, woilu ka n makoilu ɲa ten. N ma sɔn n ye kɛ donin di ai kun ma ko si rɔ, n di n jɛrɛ mira wo ma fanan. 10 N da n kali Ɲenematɔmɔnin na tuɲa rɔ mɛn ye n dɔ, mɔɔ si tɛ n jan jɛrɛmatɔɔ ɲin dɔ Akaya jamana rɔ. 11 N ka wo fɔ nfenna? Ka a masɔrɔn n ma ai kanin wa? Alla ka a lɔn, ko n ka ai kanin!

12 N ye mɛn kɛla, n di wo kɛ ikɔ tuun kosa n di fɛrɛ bɔ mɔɔilu bolo mɛnilu ye ko ɲaɲininna ka a fɔ ko iile ni andeilu ka kan, ii la jɛrɛmatɔɔ koilu rɔ. 13 Woilu kɛnin wuya talibidenbailu ni baarala bɔlamiralailu le ri, mɛnilu ka ii jɛrɛ kɛ Ɲenematɔmɔnin na talibidenbailu misali ri. 14 Nba, kaba ko tɛ wo ri, baa hali Setana ri se a jɛrɛ kɛla kɛnɛya mɛlɛka misali ri. 15 Wo rɔ, ko ba tɛ wo ri ni Setana la baarakɛlailu fanan ka ii jɛrɛ kɛ telenbaya baarakɛlailu misali ri. Woilu laban di bɛn ii kɛwaliilu sara ma.

16 N di a fɔ ikɔ tuun, mɔɔ si kana n jate hankilidɔɔ ri. Wala ni ai ka a miri wo ɲa ma, ai ye sɔn n ye kɛ hankilidɔɔ misali ri kosa n fanan ye n jɛrɛ matɔɔ dɔɔnin. 17 N ye jɛrɛmatɔɔ mɛn kɛla ten, n tɛ wo fɔla Maari la sila kan, kɔni n ye a fɔla hankilidɔɔya le rɔ. 18 Baa mɔɔ siyaman ye ii jɛrɛ matɔɔla adamadenya sila kan, wo le rɔ, n fanan ye n jɛrɛ matɔɔla. 19 Baa aile kɛnin hankilimailu le ri, ai lakaliya diɲɛla hankilidɔɔilu kɔrɔ! 20 Ai sɔnnin do ye ai kɛ jɔnilu ri, ka ai labaara, ka ai bolofenilu kansonya, ka a jɛrɛ kɔrɔta ai ma, ka ai ɲakɔrɔ gbasi! 21 N ye a fɔ ai yɛ, maloya le wo ri, kɔni an tɛ susu wo kɛla!

Wo rɔ, mɔɔ gbɛrɛ ri susu a jɛrɛmatɔɔla ko mɛn dɔ, n ye kumala ikomin hankilidɔɔ, n fanan di susu n jɛrɛmatɔɔla wo ko rɔ. 22 Heburu le ii ri wa? Ale le n fanan di. Isirayɛlika le ii ri wa? Ale le n fanan di. Iburahima bɔnsɔn de ii ri wa? Ale le n fanan di. 23 Ɲenematɔmɔnin na baaraden de ii ri wa? N ye kumala ikomin hankilidɔɔ jɛrɛ, kɔni n ka tamin iile la! N da baara gbɛlɛn kɛ ka tamin iile la pon! N da bila kaso la ka tamin iile la pon! Mɔɔilu ka n gbasi gbiɲɛ la ka tamin iile la, n tora saya da kɔrɔ waati siyaman. 24 Judiyailu ka n gbasi siɲa loolu bonsan ɲa bisawa a ni kɔnɔndɔ (39).* 25 Romukailu ka n magbasi gbelekeilu la siɲa sawa. Mɔɔilu ka n mabon kaba la n faa ko rɔ siɲa kelen. Kulun tiɲanda n di kɔɔji tɛma siɲa sawa, n tora kɔɔji rɔ tele kelen su kelen. 26 N tɛrɛ taama rɔ waati siyaman gbalo kɔrɔ, bailu ni benkalilailu ni n wara mɔɔ Judiyailu ni siya gbɛrɛilu gbaloilu kɔrɔ. N tɛrɛ so ni wula ni kɔɔjiilu ni wuya lemɛniya mɔɔilu gbaloilu kɔrɔ. 27 N tɔrɔra ten baara diya ni waati gbɛlɛnilu rɔ, ka to sunɔɔ baliya rɔ waati siyaman, n tora kɔnkɔ ni min lɔɔ la. Dɔɔnnifen bɛɛ dɛsɛ ra n maa waati siyaman, ka to nɛnɛ rɔ a ni fereya rɔ. 28 Mɛn lanin wo bɛɛ kan, n ye donin mɛn tala lon lon, n haminnin lemɛniya jamailu bɛɛ la ko rɔ. 29 Ni mɔɔ do fanka dɔɔman, n fanka fanan di dɔɔya. Ni mɔɔ do bera julumun dɔ, wo ye n jusu janinna le.

30 Ni n ka kan ka n jɛrɛ matɔɔ, n di n jɛrɛ matɔɔ n na fankatanya rɔ. 31 Maari Isa la Alla a ni a Fa ka a lɔn ko n tɛ wuya fɔla. Tandoli ye di a ma habadan! 32 N tɛrɛ Damasi so kɔndɔ waati mɛn na, jamanatii mɛn ye Mansa Aretasi kɔrɔ, wo ka mɔɔilu lɔ so donda la n mira kanma. 33 Kɔni mɔɔilu ka n sii see kɔndɔ, ka n nabɔ fɔɲɔ donda la ka n najii so laminin jin kɔma, n ka n porokolo a bolo wo ɲa le ma.*