1 N badenmailu, an ye na Maari Isa Ɲenematɔmɔnin na ko le ma sisɛn a ni an nadɛn ko a tɔrɔfɛ. An ye ai madiyala, 2 ni ai ka nabiya kuma doilu la ko mɛn wala kibaro wala bataki mɛn ye a fɔla ko Maari na lon da se, ai hankili kana kaliya tiɲanna, ka ai jusu bɔ, hali ii ka a fɔ ko a farani andeilu le la. 3 Ai kana sɔn mɔɔ si ye ai majuuwaya ɲa ɲa ma, baa wo lon ti nala sela fɔɔ wo murunti waati wa se fɔlɔ, sariya tɛ cɛɛ mɛn kan wo ri lankɛnɛmaya, halaki kɛ la den. 4 Mɔɔilu ye fen mɛnilu bɛɛ jatela «maari» ri, wala batofen di, a ye a jɛrɛ kɔrɔtala le woilu kunna, ka a wuli woilu kanma. Wo rɔ, a ri sii Alla batobonba kɔndɔ, ka a jɛrɛ yiraka Alla jɛrɛ ri.*

5 N tɛrɛ ai tɔrɔfɛ waati mɛn na, n tɛrɛ mɛn fɔla ai yɛ, ai ma ai janto woilu ma wa? 6 Adon, sisɛn ai ka a lɔn kosɛbɛ, mɛn ka wo cɛɛ makankan, kosa a ri lankɛnɛmaya a la waati wa se. 7 Ka a masɔrɔn sisɛn, sariyatanya ra baara damira gbundu rɔ. Kɔni a ye tola wo ɲa le ma haan mɛn ka a makankan, wo ye bɔ ye fɔlɔ. 8 Wo kɔrɔ, sariya tɛ cɛɛ mɛn kan wo ri lankɛnɛmaya, Maari Isa ye mɛn halakila a da fɔɲɔ la, ka a ban fewu a na ko nɔɔrɔ la. 9 Sariya tɛ cɛɛ mɛn kan wo ye nala Setana fanka baraka le rɔ, wuya kabannakoilu ni wuya tɔɔmasereilu ni wuya ko masilannin su bɛɛ fɛ, 10 a ni telenbaliya su bɛɛ fɛ mɛnilu ye mɔɔ halakitailu majuuwayala, ka a masɔrɔn ii ma sɔn tuɲa kaninteya ma, kosa ii ye kisi. 11 Wo le rɔ, Alla ri fili fanka lana, kosa ii ri la wuya la. 12 Wo bɛɛ ye kɛla le kosa mɛnilu lemɛniyani tɛ tuɲa ma, telenbaliya duman mɛnilu yɛ, woilu ye makiti ii sɔn na.

13 Kɔni n badenmailu, Maari kaninteilu, fɔɔ an ye baraka bila Alla yɛ ai la ko rɔ waati bɛɛ, ka a masɔrɔn kɛbi a damira Alla ka ai suwandi kisi ko le rɔ a la Nii Sɛniman na sɛninyala baraka rɔ a ni lemɛniya tuɲa rɔ. 14 A ka ai kili wo le ma fanan Isa la ko Kibaro Ɲuma baraka rɔ, an ka mɛn fɔ ai yɛ, kosa ai ye gbiliya sɔrɔn mɛn bɔni an Maari Isa Ɲenematɔmɔnin dɔ. 15 Wo rɔ, n badenmailu, an ka ai karan namun mɛnilu la, a wa kɛ kawandi kan di wala bataki, ai ye woilu mira, ka to ii kan gben!

16 Awa, an Maari Isa Ɲenematɔmɔnin jɛrɛ ni an Fa Alla mɛn ka an kanin, ka habadan jususuma ni jii ɲuma di an ma a la hina rɔ, 17 woilu ye ai lalemɛniya ai jusu rɔ, ka ai fanka don baara ɲuma ni kuma ɲuma bɛɛ rɔ.