1 Ɲenematɔmɔnin ka an hɔrɔya, sa an di kɛ mɔɔ hɔrɔyani jɛrɛ jɛrɛ ri. Wo le rɔ, ai ye ai rajala. Ai kana sɔn mɔɔilu ye ai bila sariya jɔnya rɔ kokura.

2 Ai ye ai tolo malɔ! Nde Pɔli ka a fɔ ko ni ai sɔnda mɔɔilu ye ai la faaninta kɛ, Ɲenematɔmɔnin ka baara mɛn kɛ ai yɛ, wo tɛ foyi ɲa ai ma. 3 N ye a fɔla ikɔ tuun ko mɔɔ mɔɔ wa sɔn mɔɔilu ye a la faaninta kɛ ten, fɔɔ wo tii ye Musa la sariya bɛɛ labato; diyagboya le wo ri. 4 Ai mɛnilu ye a ɲininna ka kɛ mɔɔ telen di ka fara Musa la sariya la, ai ra ai jɛrɛ fara Ɲenematɔmɔnin na. Ai ra ai kɔdon Alla la ɲumaya la.

5 Kɔni andeilu, an jii ye a rɔ ko Alla ri an jate mɔɔ telenni ri. Nii Sɛniman ye an dɛmɛnna ka wo le makɔnɔ ka fara an na lemɛniya la. 6 Baa ni mɔɔ sidinin Isa Ɲenematɔmɔnin ma, faaninta kɛ tɛ foyi ri butun, faanintakɛbaliya fanan tɛ foyi ri butun. Mɛn ye ko ba ri, wo ye lemɛniya le ri, lemɛniya mɛn ye mɔɔ lɔla kɛwaliilu kɛla kaninteya kosɔn.

7 Ai tɛrɛ ye ai borila koɲuma! Yon ka ai la sila tɛɛ, ka ai mabali tuɲa labatola? 8 Mabalili wo ma bɔ ale rɔ, mɛn ka ai kili. 9 «Lɛbɛn fitinin di buru siyaman nawuli ka a funun.» 10 Nba, n lani ai la ko ai la miriya a ni n na miriya ri kanya, baa an bɛɛ sidinin Maari ma. Kɔni mɔɔ mɛn ye ai hankili ɲaaminna, wo tii ri a sara sɔrɔn, a kɛra mɔɔ su su ri.

11 N badenmailu, ni n ye mɔɔilu kawandila fɔlɔ ko ii ye faaninta kɛ, nfenna mɔɔilu ye n tɔrɔla? Ni n ye mɔɔilu kawandila ten, Ɲenematɔmɔnin faa ko gbɔngbɔn jiri kan, wo tun tɛna gbala mɔɔ si la. 12 Mɔɔ mɛnilu ye ai lamaala, woilu ka kan ka ii jɛrɛ cɛɛya diya tɛɛ!

13 N badenmailu, Alla ka ai kili sa ai ri kɛ mɔɔ hɔrɔyaninilu ri. Kɔni ai kana hɔrɔya ko wo kɛ sababu ri ka ai faribanku diyanan koilu kɛ. Ɛɛn! Ai ye ai ɲɔɔn dɛmɛn, kaninteya kosɔn. 14 Baa Alla la sariya bɛɛ ye sɔrɔnna ɲin kuma kelen de kɔndɔ ko: «I ye i mɔɔɲɔɔ kanin ikomin i jɛrɛ.» 15 Ni ai ka ai ɲɔɔn cin ka ai ɲɔɔn rafarafara, ai ri ai jɛrɛ tiɲan.

16 N ye a fɔla ai yɛ ko ai ye taama ka a bɛn Nii Sɛniman na sila ma, wo rɔ nata juu mɛnilu ye ai fari rɔ, woilu ti nala ai lɔla kojuu kɛla habadan. 17 Baa nata juu mɛnilu ye ai fari rɔ, woilu ye Nii Sɛniman sɔsɔla. Nii Sɛniman fanan ye woilu sɔsɔla. Ii ye ii ɲɔɔn kɛlɛla. Wo rɔ, ai ye a fɛ ka mɛn kɛ, ai ti se wo kɛla. 18 Kɔni ni ai ye taamanna ka a bɛn Nii Sɛniman na sila ma, ai tɛ Musa la sariya fanka kɔrɔ butun.

19 Faribanku ye baarada mɛn kɛla, wo le ɲin di, bɛɛ ka a lɔn: jatɔya ni ko nɔɔni kɛ ni malobaliya koilu 20 ni joo sɔli ni suwaya ni lagboyaɲɛ ni sɔsɔli ni kɛlɛya ni jusumaya ni natabaya ni bɛnbaliya ni kanintema le fara ii ɲɔɔnna, 21 ni nata ni dɔlɔmin ni manamana ko dan natamin mɔɔilu, a ni wo ɲɔɔn gbɛrɛ. N ye ai lalɔnninna sisɛn ikomin n ka ai lalɔnnin ɲa mɛn fɔlɔ ko mɔɔ mɛnilu ye ko su woilu kɛla, woilu ti nala niiyɔrɔ sɔrɔnna Alla la mansaya rɔ.

22 Kɔni Nii Sɛniman ye a den mɛn kɛla mɔɔ jusu kɔndɔ, wo le ɲin di: kaninteya ni sɛwa ni jususuma ni muɲunnin ni mɔɔ dɛmɛnnin ni ɲumaya ni lemɛniya 23 ni sabari a ni senjɛrɛla. Sariya si tɛ ko su woilu kanma. 24 Mɔɔ mɛnilu ye Isa Ɲenematɔmɔnin ta ri, ii ra ii sawonan koilu ni ii nata juu bailu bɛɛ gbɔngbɔn jiri kan. 25 Ni an da ɲenemaya kura sɔrɔn Nii Sɛniman dɔ, an ka kan ka an taama ka a bɛn a la sila ma. 26 An kana jɛrɛdabaya kɛ, an kana sɔsɔli lawuli an ni an ɲɔɔn tɛma, an kana an ɲɔɔn kɛlɛya.