1 Nde Juda le ka ɲin sɛbɛ, Isa Ɲenematɔmɔnin na baaraden, Yakuba nakelenɲɔɔ. N ka a lawa an Fa Alla la mɔɔ kiliniilu ma, a ka mɛnilu kanin, Isa Ɲenematɔmɔnin ye mɛnilu kandanna.

2 Alla ye kininkinin ni jususuma ni kaninteya sabati ai rɔ.

3 N kaninteilu, a lɔɔ tɛrɛ ye n na kosɛbɛ n ye ɲin sɛbɛ ai ma ka bɛn an kisi ko ma, kɔni n ka a yen de fɔɔ n ye a sɛbɛ le ka bɛn ai fanka don ko ma lemɛniya makaran dɔ Alla ra mɛn karifa a la jama sɛniman ma siɲa kelen haan habadan. 4 Ka a masɔrɔn mɔɔ doilu ra don ai tɛma gbundu rɔ mɛnilu jalaki ko tɛrɛ ra sɛbɛ kɛbi a waati jan. Alla lɔnbaliilu le woilu ri, mɛnilu ye Alla la sɔlini kɛla ko haramuninilu kɛ kun di, ka ii ban Isa Ɲenematɔmɔnin na, an tii kelen pe, an Maari.

5 Kɔni hali ai ka ko ɲin lɔn, n ye a labila ko rɔ ai la ko Maari ka Isirayɛli jama lakisi le Misiran jamana rɔ, kɔni a ka lemɛniyabaliilu fanan halaki wo kɔ rɔ. 6 Mɛlɛka doilu fanan ma ii jɛrɛ to ii wara, ka ii ban ii lɔdiya rɔ, Alla ka woilu bila dibi ba rɔ, ii sidinin habadan jɔlɔkɔilu la haan kiti la lon ba. 7 A ye wo ɲa le ma, Sɔdɔmu ni Kɔmɔri ni ii laminin soilu fanan tɛrɛ jalonya kɛla ka laɲɔɔya kɛ ii ɲɔɔn na ɲa do ma mɛn bɛnnin tɛ adamadenilu tɛma. Alla ka woilu fanan kɛ le misali ri, ka ii ɲakankatan habadan ta rɔ.*

8 Wo mɔɔ mɛnilu donni ai tɛma, woilu fanan ye siboilu kɛla mɛnilu ye a kɛla ii ye ko haramuninilu kɛ ii fariilu la, ka murunti sariyatiilu ma, ka mɛlɛkailu lafɛya. 9 Baa, hali mɛlɛka kuntii Mikayɛli ma susu Ibulusa jalaki nanili kɛla. Ii tɛrɛ ye ko masɔsɔla waati mɛn na ka bɛn Musa su la ko ma, a ka a fɔ ko, «Maari Alla ye kuma i kanma.»* 10 Kɔni mɔɔ ɲinilu ye mɔɔ mafɔla ko rɔ ii ti mɛn ɲayenna. Ii ka wo doilu lɔn ii la hankilidɔɔya rɔ ikomin soboilu hankili tɛ mɛnilu la, adon wo le fewu ye ii bilala halaki rɔ. 11 Gbalo ye ii yɛ baa ii ra bila Kabila misali kɔfɛ. Ii ra ii bori tɔnɔilu kɔfɛ fili rɔ ikomin Balami. Ii ra halaki ka a masɔrɔn ii ra murunti ikomin Kora.* 12 Wo mɔɔilu ra ai la badenmaya ladɛnnilu laharamun, ka dɔɔnnin kɛ ai fɛ haan! Ii tɛ maloyala, ka karan ii jɛrɛ dɔrɔn na. Ii kɛnin de ikomin banda wa fin ka fo, fɔɲɔ ye donna mɛn kɔrɔ ka lafɔ. Ii kɛni le fanan ikomin fira kɔrɔ wulen waati jiri mɛnilu ti sɔn nadenna, ii ra bɔ, ka faa siɲa fila. 13 Ii kɛni le ikomin ji wunwannailu,* ii ye malobaliya koilu lajɛnsɛnna ikomin kɔɔji kanfa, ikomin lolo tununnin mɛnilu ye wala sunna habadan dibi ba rɔ.

14 N benba Adama bɔnsɔn wɔrɔnwulana Enɔki ka nabiya kumailu fɔ iile le la ko rɔ ko, «Ii ɲa lɔ! Maari ye nala a ni a la mɛlɛka sɛniman waa siyaman, 15 kosa a ye na bɛɛ makiti, ka Alla lɔnbaliilu bɛɛ sɔn yiraka ii la ii la Alla lɔnbaliya baarailu la ko rɔ, a ni Alla lɔnbaliya kojuukɛlailu la kuma gbɛlɛn mɛnilu bɛɛ lɔni Alla ma.» 16 Wo mɔɔilu ye tola ii dalakasila, ii tɛ wasala. Ii bilanin ii la kunfan koilu le dɔrɔn kɔfɛ, ka to jɛrɛdabaya kumailu fɔla, ka mɔɔilu matɔɔ fen ko rɔ.

17 Kɔni n kaninteilu, an Maari Isa Ɲenematɔmɔnin na talibidenbailu ra ko natɔ mɛnilu ko fɔ, wo ye labila ai la. 18 Ii ka a fɔ le ai yɛ ko, «Mɔɔ mayɛlɛla ri na waati laban dɔ, mɛnilu bilanin ii la Alla lɔnbaliya kunfan koilu kɔfɛ.» 19 Wo kojuu kɛlailu le ai ratalanna, ii ye bilala ii la dunuɲa hankili kɔfɛ, Nii Sɛniman tɛ mɛnilu fɛ. 20 Kɔni aile, n kaninteilu, ai ye to sabatila ai la lemɛniya sɛniman dɔ, ka Alla matara Nii Sɛniman dɔ. 21 Ai ye to Alla la kaninteya rɔ, ai wa kɛ Maari Isa Ɲenematɔmɔnin na kininkinin makɔnɔla waati mɛn na, ka wa ai ri ɲenemaya banbali rɔ.

22 Sika ye mɛnilu rɔ, ai ye hina woilu ma. 23 Ai ye ii faron ta rɔ, ka ii lakisi. Ai ye kininkinin doilu fanan ma Alla la ɲakɔrɔsilan dɔ, hali ii la faanin mɛnilu kɔsɔnin ii faribanku diyanan koilu fɛ, ii ri wo lagboyaɲɛ.

24 Mɛn di se ai latankala ko ai kana be, ka ai fɛɛtanilu jiraka a la gbiliya rɔ a ɲakɔrɔ sɛwa rɔ, 25 gbiliya ni mansaya ni fanka ni se ye kɛ wo Alla kelen pe yɛ, an nakisila, Isa Ɲenematɔmɔnin baraka rɔ an Maari, kɛbi a damira haan bi haan habadan. Amina.