1 Lemɛniya mɔɔ mɛnilu ye jɔnya kɔrɔ, woilu ka kan ka ii tiilu jate ikomin mɔɔilu mɛn dahani gbiliya ɲa bɛɛ ma kosa Alla tɔɔ kana lafɛya a ni an na karan. 2 Jɔn mɛnilu tiilu kɛnin lemɛniya mɔɔilu ri, wo jɔnilu kana ii tiilu lafɛya baa ii ra kɛ lemɛniya mɔɔilu ri. Kɔni fɔɔ ii ye baara le ka tamin doilu la baa lemɛniya mɔɔilu le ii la baara tɔnɔ sɔrɔnna, ii kaninteilu.

I ye mɔɔilu karan ko ɲinilu la, ka ii lɔ la. 3 Ni mɔɔ si ye karan gbɛrɛ kɛla, a ma bila an Maari Isa Ɲenematɔmɔnin na kuma bɛrɛilu kɔfɛ, a ni Alla lɔn karan, 4 wo tii lafanin waso le la, a ma foyi lɔn. Ko masɔsɔ duman a yɛ kosɛbɛ a ni sɔnkɔ sɔnkɔ kumailu kɔrɔ. Wo le nala minlɛ ni bɛnbaliya ni mɔɔ tɔɔ tiɲan ni sika juuilu ri, 5 a ni kɛlɛ banbaliilu mɔɔ hankili ɲakɛniilu tɛma, tuɲa tɛ mɛnilu ri, mɛnilu hankili ye a ma ko Alla lɔn kɛni nanfulu sɔrɔn fɛrɛ le ri.

6 Kɔni, Alla lɔn sɛwa rɔ, tɔnɔ ba le wo ri 7 Ka a masɔrɔn an ma na foyi ri an bolo dunuɲa ɲin dɔ, an tɛ wala foyi ri fanan an bolo. 8 Kɔni, ni dɔɔnnifen ni faanin ye an bolo, an ye an wasa don woilu rɔ. 9 Kɔni mɛnilu ye a fɛ ka kɛ nanfulu tiilu ri, woilu ri bila fili koilu rɔ, ii ri mira julu lasiinin na a ni kunfan hankilidɔɔya juu siyaman mɛnilu ye mɔɔilu lafilila halaki ni bɔnɔ rɔ. 10 Ka a masɔrɔn wodi kɔmɛya le kojuuilu bɛɛ kun di. Doilu ra minlɛ wodi fɛ, ka ii jɛrɛ mataa lemɛniya la, ka tɔrɔya ko siyaman lɔ ii jɛrɛ ma.

11 Kɔni ile Alla la mɔɔ, i bori wo koilu kɔrɔ. I ye telen ni Alla lɔn ni lemɛniya ni kaninteya ni tunadiya ni jusu ɲumaya ɲinin. 12 I ye lemɛniya kɛlɛ ɲuma kɛ. I ye ɲenemaya banbali lakisi mira, i kilini mɛn ma, i ka i lɔ wo sereya ɲuma la tuma mɛn na, sereya siyaman ɲakɔrɔ. 13 N ye i jamarila Alla ɲakɔrɔ mɛn ye nii dila niimafen bɛɛ ma, a ni Isa Ɲenematɔmɔnin ɲakɔrɔ mɛn ka sereya ɲuma bɔ Ponse Pilate ɲakɔrɔ, 14 i ye jamarili ɲin mira ikomin sɔnjuu tɛ mɔɔ mɛn na a ni fɛɛtaɲa rɔ, haan an Maari Isa Ɲenematɔmɔnin ye bɔ kɛnɛma waati mɛn na. 15 Wo ye kɛla a waati le rɔ Alla ka mɛn fɔ,

Alla, baraka mɛn yɛ,

Maraliba Kelen Pe,

Mansailu la Mansa,

Maariilu la Maari.

16 mɛn ti faala

mɛn wara ye kɛnɛbɔlan ba rɔ

mɔɔ si ti se a madonna kɛnɛbɔlan mɛn na,

mɔɔ si ma mɛn yen fɔlɔ,

a ti se yenna fanan.

Gbiliya ni fanka ye di a ma habadan! Amina.

17 Jamarili ɲin di waati ɲin nanfulu tiilu ma, ko ii kana waso, ko ii kana ii jii la nanfulu rɔ fanan mɛn ye banna, kɔni ii ye ii jii la Alla rɔ mɛn ye an sɔla fen bɛɛ rɔ fonesereya rɔ, an na sɛwa ko rɔ. 18 Ii ye koɲuma kɛ, ka ii kɛwali ɲumailu kɛ ii la nanfulu ri, ka doilu sɔ fonesereya rɔ. 19 Wo ɲa ma, ii ri nanfulu bɛrɛ lamara ii jɛrɛ yɛ ɲɛfɛ ikomin bon ju birin, kosa ii ri ɲenemaya sɔrɔn mɛn ye ɲenemaya bɛrɛ ri.

20 Timote, fen mɛn karifani i la, wo kandan kosɛbɛ. I ye i kɔnkɔ don kuma fuuilu la, a ni wuya mɛn jatenin lɔnnin di. 21 Doilu ra ii fasa wo ma, ka ii mataa lemɛniya la.

Alla la hina ye to ai fɛ.