1 Nde Pɔli, Isa Ɲenematɔmɔnin na talibidenba le ka ɲin sɛbɛ, ka fara an nakisila Alla la jamarili la, a ni Isa, Ɲenematɔmɔnin, an jii.

2 N ye a sɛbɛla Timote ma, n dencɛ jɛrɛ la lemɛniya rɔ.

An fa Alla ni an Maari Isa Ɲenematɔmɔnin ye hina ni kininkinin ni jususuma di i ma.

3 N tɛrɛ i madiyala ɲa mɛn ma, n bɔtɔla ka wa Masedoniya jamana rɔ, n ye a fɛ ikɔ tuun, i ye to Ɛfɛsi so kɔndɔ kosa i ye ye mɔɔ doilu jamari ii kana na jama karan ɲa gbɛrɛilu ma. 4 Ko ii ye fara kankanna talimasɔilu ma, a ni ii buruju tɔɔilu mɛn tɛ banna. Ko su wo ye sɔsɔliilu le lawulila sani ii ye an dɛmɛn Alla la baara kɛla, mɛn ye kɛla lemɛniya rɔ. 5 N ka jamarili ɲin di le kosa kaninteya ye wara a rɔ mɛn ye bɔla jusu dahanin ni hankili ɲuma ni lemɛniya bɛrɛ rɔ. 6 Sila ra tunun mɔɔ doilu ma ka bila ko fuuilu kɔfɛ. 7 Ii ye a fɛ ka kɛ sariya karanmɔɔilu ri, kɔni ii ye mɛn fɔla, ka a lase ii sɛɛbɛ jɛrɛ rɔ, ii ma wo lɔn fewu!

8 An ka a lɔn ko sariya ka ɲin, ni a ye labaarala a ɲa ma. 9 An ka a lɔn fanan ko sariya ma la mɔɔ telenniilu la ko rɔ, kɔni sariya tiɲanilu ni mɔɔ muruntiniilu ni Alla lɔnbaliilu ni kojuukɛlailu ni sɛnimanbaliilu ni dina mirabaliilu ni fa faalailu ni na faalailu ni mɔɔ faalailu 10 a ni jalonilu ni cɛɛ mɛnilu ye laɲɔɔya kɛla ii ɲɔɔn na a ni jɔn mayiralailu ni wuya fɔlailu ni wuya sere bɔlailu ni ko mɛnilu bɛɛ ye karan bɛrɛ masɔsɔla. 11 Karan ɲin bɛnnin Alla baraka tii la kuma Kibaro Ɲuma nɔɔrɔ le ma, a ka mɛn karifa n na.

12 N ye baraka bilala an Maari Isa Ɲenematɔmɔnin yɛ mɛn ka n fanka don ka a masɔrɔn a ra n jate mɔɔ lemɛniyanin di, ka n kɛ a la baaraden di. 13 Hali n tɛrɛ ra a lafɛya, ka a ɲakankatan, n ka a dɔɔya. Kɔni a ra kininkinin n ma ka a masɔrɔn n ka woilu kɛ lɔnbaliya ni lemɛniyabaliya le rɔ. 14 An Maari ka a la hina ba lajii n ma fewu, mɛn ka lemɛniya ni kaninteya di n ma, mɛn bɔni Isa Ɲenematɔmɔnin dɔ. 15 Tuɲa le kuma ɲin di, an bɛɛ ye la mɛn na, ko Isa Ɲenematɔmɔnin nanin dunuɲa rɔ kojuukɛlailu le lakisi diya. Nde juuman ka tamin ii bɛɛ la. 16 Kɔni a kininkininda n ma, kosa Ɲenematɔmɔnin Isa ye a la diɲa bɛɛ yiraka nde julumun tii juu fɛ, ka a kɛ misali ri lemɛniya mɔɔilu yɛ, mɛnilu ye ɲenemaya banbali lakisi sɔrɔnna. 17 Nba, habadan mansa, faabali ni yenbali, Alla kelen pe, bonya ni gbiliya ye di wo ma habadan haan habadan! Amina.

18 N dencɛ Timote, n ye wo jamarili dila i ma, ka bɛn nabiya kumailu ma mɛnilu fɔra ka bɛn i la ko ma, kosa i ye wo mira, ka se kɛlɛ ɲuma kɛla. 19 I ye to lemɛniya ni nii ɲumaya rɔ. Mɔɔ doilu ra woilu labila, ka ii la lemɛniya ban ikomin kulun wa jii ji kɔrɔ. 20 Humeneyo ni Alɛsandiri ye wo mɔɔilu tɛma. N da woilu to Setana yɛ,* kosa ii ye karan ko ii kana Alla lafɛya.