1 Tuɲa le kuma ɲin di: Ni mɔɔ do ye a fɛ ka kɛ lemɛniya jama kuntii ri, a ye baara ɲuma le fɛ wo ri. 2 Wo rɔ, lemɛniya jama kuntii ka kan ka kɛ mɔɔ ri sɔn tɛ mɛn na, muso kelen tii, a ye kɛ jɛrɛ mirala ni mɔɔ kolonin ni mɔɔ gbiliyanin ni londan damirala ni karanmɔɔ ɲuma ri. 3 A kana kɛ dɔlɔ minna ri, wala mɛn jusu lakalaman bɔla, kɔni a ye kɛ mɔɔ mumunɛ ni ko rabɛnna ri, a kana kɛ wodi kɔmɛ ri. 4 A ye a janto a la denbaya ko kosɛbɛ, ka a denilu mira kolo ni gbiliya bɛɛ rɔ. 5 Baa ni mɔɔ ma kusan a jɛrɛ la denbaya mirala a ɲuma la, wo ri a janto Alla la lemɛniya jama ko di? 6 A kana kɛ mɔɔ tubini kura ri, kosa a kana a waso, a ni Ibulusa ye jalaki wo ko kelen na. 7 A ye kɛ tɔɔ ɲuma tii ri fanan lemɛniyabaliilu tɛma kosa mɔɔilu ti nala a mafɔla, ka a mira Ibulusa la julu lasiinin na.

8 Mɔɔ mɛnilu ye kɛla lemɛniya jama dɛmɛnninnailu ri, woilu fanan ye bɛn wo ɲa ma. Ii ye kɛ mɔɔ gbiliyanin di. Ii kana kɛ fɔlafilailu ri wala dɔlɔ minnailu. Ii kana kɛ wasabaliilu ri. 9 Ii ye lemɛniya gbundu lamara ii sɔnɔmɛ gbɛnin dɔ. 10 Fɔɔ ii kɛɲa ye fɛsɛfɛsɛ le fɔlɔ, wo kɔ rɔ, ni fɛɛ tɛ ii la, ii ri se kɛla lemɛniya jama dɛmɛnninnailu ri. 11 Dɛmɛnninnailu la musoilu fanan ka kan ka kɛ wo ɲa le ma. Ii ye kɛ muso gbiliyaniilu ri, ii kana kɛ tɔɔ tiɲan kɛlailu ri, ii ye ii jɛrɛ mira, ka lemɛniya ko bɛɛ rɔ. 12 Lemɛniya jama dɛmɛnninnailu ye kɛ muso kelen tiilu ri, ka ii janto ii denilu ni ii la lu ko a ɲuma la. 13 Ka a masɔrɔn mɛnilu ye lemɛniya jama dɛmɛnna kosɛbɛ, woilu le kunnafulen lɔdiya sɔrɔnna, a ni jusulatɛɛ lemɛniya rɔ Isa Ɲenematɔmɔnin ma.

14 N ka bataki ɲin sɛbɛ i ma hankili latɛɛ le rɔ ko a tɛ mɛnna butun n di na i wara. 15 Kɔni ni n mɛnda, i ri se a lɔnna i ka kan ka taama ɲa mɛn ma Alla la denbaya rɔ, mɛn kɛni Alla ɲenemaya la lemɛniya jama ri, mɛn kɛni tuɲa sɛnbɛrɛ kɔlɔma ni a ju sii ri. 16 Sika tɛ a rɔ, Alla lɔn gbundu ko ka bon, wo le ten:

A ra yiraka faribanku rɔ,

Alla la Nii Sɛniman ka a la telenbaya yiraka,

mɛlɛkailu ka a yen,

a la ko kawandili bɔra siyailu tɛma

mɔɔilu lemɛniyara a ma dunuɲa rɔ,

a layɛlɛra gbiliya rɔ.