1 Alla la Nii Sɛniman da a fɔ gbɛ rɔ, ko mɔɔ doilu ri ii kɔsɛ lemɛniya kɔfɛ waati laban dɔ, ka bila ii nii janfantenilu kɔfɛ a ni jena la karanilu kɔfɛ. 2 Ii ri sɔn ka majuuwaya wuya kawandili bɔlailu la filanfilanteya fɛ, mɛnilu hankili gbɛlɛnman ikomin ta dafo. 3 Wo mɔɔ suilu ye tɔn siila furu sidi ko la le a ni dɔɔnnifen su doilu, Alla ka mɛnilu dan kosa lemɛniya mɔɔilu, mɛnilu ka tuɲa lɔn, ii ye ii lamira baraka bila rɔ. 4 Baa Alla ka fen mɛnilu bɛɛ dan, ii bɛɛ ka ɲin. Mɔɔ si ma kan ka a ban woilu rɔ, ni ii bɛɛ lamirala baraka bila rɔ. 5 Ka a masɔrɔn Alla la kuma ni an na Alla matara ri woilu lasɛninya.

6 Ni i ka i badenmailu kawandi wo koilu ma, i ri kɛ Isa Ɲenematɔmɔnin na baaraden ɲuma ri, lemɛniya kuma ni karan ɲuma ri kɛ i balo ri i bilanin mɛnilu kɔfɛ. 7 Kɔni i ye bɔ dina mirabali la kumailu ni muso kɔrɔilu la taliilu kɔfɛ, ka i karan Alla lɔn ma. 8 Koloma ko tɔnɔ ye a la dɔɔnin, kɔni Alla lɔn tɔnɔ ka bon waati bɛɛ, ka waati ɲin ni ɲenemaya banbali lahidi sɔrɔn ai yɛ. 9 Tuɲa le kuma ɲin di, mɛn dahani bɛɛ ye lala: 10 Wo le rɔ an ye tɔrɔla, ka an daja, baa an da an jii la Alla ɲenema rɔ, adamadenilu bɛɛ lakisila, a gbengben mɛnilu lemɛniyani.

11 I ka kan ka jama jamari wo ko le ma, ka ii karan woilu ma. 12 I kana sɔn mɔɔ si ye jo i ma i la foninkeya rɔ, kɔni kɛ misali ɲuma ri lemɛniya mɔɔilu yɛ i kuma ɲa ni i ko kɛ ɲa rɔ kaninteya ni lemɛniya ni sɛninya rɔ. 13 I ye to Alla la kuma karanna mɔɔilu yɛ, ka kawandili bɔ, ka karan kɛ haan n ye na. 14 Alla ka i sɔ sɔlifen mɛn dɔ ka fara nabiya kuma do la, lemɛniya jama mɔɔbailu ka ii boloilu la i ma, i kana wo fɛbila.* 15 I janto ko ɲinilu rɔ, ka to ii kan kosa bɛɛ ye i tamanɲa yen. 16 I jɛrɛ lakɔrɔsi, a ni i la karan. I wakali ko ɲinilu ma ka a masɔrɔn ni i ka wo kɛ, i ri kisi sɔrɔn i jɛrɛ yɛ a ni mɛnilu wa ii tolo malɔ i la.