1 Nde Pɔli, mɛn kɛni Isa Ɲenematɔmɔnin na talibidenba ri Alla sawo rɔ kosa Alla ka an lahidi nii lakisi mɛn na Isa Ɲenematɔmɔnin dɔ, n ye wo lase, nde le ka ɲin sɛbɛ, 2 ka a lawa n diyanan dencɛ Timote ma.

An fa Alla ni an Maari Isa Ɲenematɔmɔnin ye hina ni kininkinin ni jususuma di i ma.

3 N ye baarala Alla mɛn ye jusu lagbɛ rɔ ikomin n benbailu ka a kɛ ɲa mɛn ma, n ye baraka bilala wo yɛ, n wa kɛ a matarala i yɛ su ni tele waati bɛɛ. 4 Ka a masɔrɔn, n wa n miri i la kasi ma, a lɔɔ ri n mira n ye i yen kosa n ye fa sɛwa la.* 5 N hankili ye i la lemɛniya bɛrɛ fanan na, mɛn tɛrɛ i ma muso Liwisi ni i na Ewunise rɔ. N lani a la, ko a ye i fanan dɔ. 6 Wo le rɔ, n ye a labilala i la, Alla ka sɔlifen mɛn di i ma, i ye wo labaara i sɛbɛ la, i ka mɛn sɔrɔn n ka n bolo la i kun ma waati mɛn na Alla matara rɔ. 7 Ka a masɔrɔn Alla ma nii masumanin di an ma kɔni a la Nii Sɛniman mɛn ye fanka ni kaninteya ni jo ɲuma dila an ma.

8 Nba, i kana maloya sereya bɔla an Maari yɛ, wala i ye maloya nde la ko rɔ hali n ye kaso la a la ko rɔ. Kɔni an fila ye sɔn tɔrɔya ma an ɲɔɔn fɛ ka bɛn Isa la ko Kibaro Ɲuma la ko ma Alla fanka baraka rɔ. 9 Ale mɛn ka an nakisi, ka an kili ko an ye sɛninya. An kɛwaliilu la ko tɛ de, kɔni a jɛrɛ la ko latɛɛnin, a ni a la hina, a ka mɛn di an ma Isa Ɲenematɔmɔnin baraka rɔ sani waati ye damira. 10 Kɔni sisɛn a ra lɛnkɛnɛmaya an yɛ an nakisila Isa Ɲenematɔmɔnin bɔ rɔ kɛnɛma, mɛn ka saya fanka nɔ, ka nii lakisi ni sayabaliya yiraka Isa la ko Kibaro Ɲuma fɛ.

11 Alla ra n kɛ kawandi bɔla ni talibidenba ni karanmɔɔ ri Isa la ko Kibaro Ɲuma la ko rɔ. 12 Wo le rɔ, n ye tɔrɔla ko ɲinilu rɔ, kɔni n maloyani tɛ, ka a masɔrɔn n lemɛniyani mɛn ma, n ka wo lɔn. N jusu latɛɛni, a ri se n ta lamarala haan wo lon. 13 I ka karan bɛrɛ mɛnilu lamɛn n na, woilu lamara misali ri kaninteya ni lemɛniya fɛ Ɲenematɔmɔnin Isa rɔ. 14 Fen ɲuma mɛn karifani i la, wo lamara Alla la Nii Sɛniman fanka baraka rɔ mɛn ye an dɔ.

15 I ka a lɔn ko mɛnilu bɛɛ ye Asi jamana rɔ, woilu ra n nabila, hali Fikelo ni Heremoyene. 16 Alla ye kininkinin Onesiforo la denbaya ma ka a masɔrɔn a ka n masabali siɲa siyaman. A ma maloya n na ko rɔ hali n tɛrɛ kaso la. 17 A sera Romu so kɔndɔ waati mɛn na, a ka a tunadiya n ɲinin ma haan a ka n yen. 18 Alla ye kininkinin a ma wo Lon. A ka ko mɛnilu kɛ n yɛ Ɛfɛsi so kɔndɔ, i ka woilu lɔn fewu!