1 A lɔn ko waati labanilu ri gbɛlɛnya. 2 Mɔɔilu ri kɛ ɲangboilu ni wodi kɔmɛilu ni jɛrɛdabailu ni wasolailu ni nanikɛlailu ri, ka murunti ii sɔrɔnbailu ma, ka kɛ waliɲuma lɔnbaliilu ni sɛninyabaliilu ri, 3 a ni hinabaliilu ni kininkininbaliilu ni mɔɔ tɔɔ tiɲanilu ni jɛrɛ mirabaliilu ni mɔɔ ɲarajaniilu ni koɲuma kɛla juuilu 4 a ni kunfantoilu ni kondonjuuilu ni lanjɛrɛlailu, mɛnilu diyanan koilu duman ii yɛ ka tamin Alla la. 5 Ii ka ii jɛrɛ kɛ Alla lɔnnailu ri, kɔni ii ri ii ban a fanka rɔ. I mabɔ wo mɔɔilu la. 6 Doilu ye ai tɛma, woilu ri ii jɛrɛ ladon bonilu kɔndɔ mɔɔ lakunfan ko rɔ, ii ri musoilu masɔrɔn mɛnilu hankili ma bon, julumun donin gbilin ye mɛnilu kun ma, mɛnilu masɔmɔnnin kunfan su bɛɛ rɔ. 7 Wo musoilu ye karanna waati bɛɛ, kɔni ii tɛ tuɲa lɔnna muumɛ! 8 Wo cɛɛilu kɛnin de ikomin Jannɛsi ni Janbɛrɛsi mɛnilu ka Musa masɔsɔ.* Cɛɛ ɲinilu fanan ye tuɲa masɔsɔla wo ɲa le ma. Ii hankili ɲakɛnin, ii la lemɛniya ra kɛ bɔnɔ ri. 9 Kɔni woilu tɛ nala wala ɲɛfɛ fewu ka a masɔrɔn mɔɔ bɛɛ ka ii la hankilidɔɔya lɔn, ikomin Jannɛsi ni Janbɛrɛsi kɛra ɲa mɛn ma.

10 Kɔni ile ra n na karan lɔn, a ni n tamanɲa ni n wɔnike ni n na lemɛniya ni n na diɲɛ ni n na kaninteya ni n na tunadiya 11 a ni n na bɛsɛnkɔniya ni n na tɔrɔya. Tɔrɔya su ɲuman ye ye, n ma mɛn yen Antiyɔki ni Ikoniyɔmu ni Lisitiri soilu rɔ? Bɛsɛnkɔniya su ɲuman ye ye n ma mɛn yen? Kɔni Maari ka n kunka woilu bɛɛ ma. 12 Mɛnilu bɛɛ ye a fɛ, ii ye taama Alla la lɔnnin dɔ Isa Ɲenematɔmɔnin baraka rɔ, woilu ri bɛnsɛnkɔlɔya. 13 Kɔni mɔɔ juuilu ni mɛnilu ye ii jɛrɛ kɛla dina mɔɔilu ri, woilu ye janfala juuya le rɔ dɔrɔn, ka doilu majuuwaya, ii fanan di majuuwaya. 14 Kɔni ile, i karan ko mɛn ma, i lemɛniyani mɛn ma fewu, to wo rɔ ka a masɔrɔn i ka i karanmɔɔilu lɔn. 15 Kɛbi i denmɛsɛnya waati la, i ka Kitabu Sɛniman yɔrɔ sɛbɛniilu lɔn mɛn di se hankili dila i ma ka bɛn kisi la ko ma lemɛniya fɛ Isa Ɲenematɔmɔnin ma. 16 Ka a masɔrɔn Kitabu sɛbɛli bɛɛ farani Alla le la. A bɛnnin karan kɛ fen ni fili jabi fen ni ko matelen fen ni mɔɔ kolo fen di telen dɔ, 17 kosa Alla la mɔɔ ye dafa, baarafen ye to a bolo baara ɲuma bɛɛ kɛ kanma.