1 N ye i jamarila Alla ɲakɔrɔ a ni Isa Ɲenematɔmɔnin, mɛn di mɔɔ faaniilu ni mɔɔ niilamailu bɛɛ makiti, mɛn ye makɛnɛyala Ɲenematɔmɔnin na ko rɔ a ni a la mansaya. 2 Alla la kuma la ko kawandili bɔ, ni a fɔ waati ka ɲin, ni a ma ɲin, i rabɛn. I ye mɔɔilu sɔn fɔ, ka jaman ii ma, ka ii lalemɛniya, ka ii karan diɲɛ bɛɛ rɔ. 3 Baa waati natɔ, mɔɔilu tɛ nala sɔnna karan bɛrɛ ma. Ii bilatɔ ii jɛrɛ diyanan koilu le kɔfɛ, ka to karanmɔɔilu ladɛnna ii jɛrɛ yɛ, mɛnilu ye ii karanna ii tolo diyanan koilu ma. 4 Ii ri ii tolo bɔ tuɲa kumailu la, ka ii tolo malɔ taliilu la. 5 Kɔni ile, i ye i jɛrɛ mira ko bɛɛ rɔ, ka i tunadiya tɔrɔyailu kɔrɔ, ka Isa la ko Kibaro Ɲuma lase, i ye i la baara bɛɛ lakanbali.

6 Ka a masɔrɔn, nde ra kɛ ikomin minninfen saraka labɔnni, n wa waati ra madon. 7 N da kɛlɛ ɲuma kɛ, ka se n na bori dan na, ka to lemɛniya rɔ. 8 Sisɛn, n di telenbaya fanka sɔrɔn kɔndɔn sɔrɔn Maari ka mɛn namara n yɛ, a ye mɛn dila n ma wo lon, ale mɛn kɛni kiti tɛɛla telennin di. Nde kelen tɛ kɔni a na ko lɔɔ ye mɛnilu bɛɛ la.

9 Karan, i ye na n tɔrɔfɛ jonna! 10 Baa dunuɲa ɲin duman Demasi yɛ, a ra n nabila ka wa Tesaloniki so kɔndɔ. Kiresen da wa Kalati mara rɔ. Tite da wa Dalamatiya mara rɔ. 11 Luka le kelen ye n tɔrɔfɛ sinɛn I ni Marika bɛɛ ye na ka a masɔrɔn a ri se n dɛmɛnna baara diya. 12 N da Tisiki lawa Ɛfɛsi so kɔndɔ. 13 I wa kɛ nala waati mɛn na, n da n na durukiba ni n na kitabuilu to Karapo wara Torohasi so kɔndɔ, i ye na ii ri n yɛ, a gbengben mɛnilu sɛbɛnin gboloilu kan.

14 Siyaki Alɛsandiri ra kojuu kɛ n na haan! Maari ri a sara a baara la. 15 I fanan ye a la ko kɛ i hankili la, ka a masɔrɔn a ka an na kumailu masɔsɔ le a juuman na!

16 N ka n jɛrɛ kun mafɔ fɔlɔ mɛn kɛra kitila diya, mɔɔ si ma n dɛmɛn, bɛɛ ka n nabila. Alla kana ii mira wo la. 17 Kɔni Maari le ka n dɛmɛn, ka n fanka don kosa n ye kawandili dafanin bɔ, siyailu bɛɛ ye a lamɛn. A ka n kunka yarailu da ma fanan. 18 Maari ri n kunka kojuu baarailu bɛɛ ma, ka n nakisi kosa n ye don a la mansaya rɔ harijeene. Gbiliya ye di ale ma habadan haan habadan, amina.

19 N ye Pirisili ni Akila tuwala a ni Onesiforo la denbaya. 20 Eratusi ra to Korɛnti so kɔndɔ, n da Torofime jankarɔnin fanan to Milɛti so kɔndɔ. 21 Karan, i ye na sani nɛnɛ waati ye se.

Ewubulo ye i tuwala, a ni Pudɛn ni Linosi ni Kelodiya a ni an badenmailu bɛɛ.

22 Maari ye to i nii rɔ. Alla ye hina ai la.