1 Nde Pɔli le ka ɲin sɛbɛ, mɛn kɛnin Alla la baaraden di, a ni Isa Ɲenematɔmɔnin na talibidenba, kosa a la mɔɔ suwandininilu ye lemɛniya, ka tuɲa lɔn, mɛn ye ii lanala Alla lɔn fɛ. 2 Wo lemɛniya ni wo tuɲa farani ɲenemaya banbali lakisi sɔrɔn jii le la, Alla ka an lahidi mɛn na kɛbi waatiilu damira, Alla mɛn ti se wuya fɔla. 3 A ra a la kuma yiraka a waati rɔ kawandili fɛ a ka mɛn karifa n na Alla la jamarili fɛ, an nakisila.

4 N ka ɲin sɛbɛ Tite le ma, n dencɛ jɛrɛ an na lemɛniya rɔ.

An fa Alla ni Isa Ɲenematɔmɔnin an nakisila ye hina ni jususuma di i ma.

5 N da i to Kɛrɛti jamana rɔ kosa ko mɛn dabɛn ta toni, i ye wo ɲabɔ, ka lemɛniya jama mɔɔbailu sii so bɛɛ rɔ ka fara n na jamariliilu la. 6 Lemɛniya jama mɔɔbailu ye kɛ mɔɔilu ri fɛɛ tɛ mɛnilu la, muso kelen tiilu, ii denilu lemɛniyani, mɔɔilu kana ii denilu jate jɛrɛ mirabaliilu ri wala kolobaliilu. 7 Lemɛniya jama kuntii ye kɛ mɔɔ ri fɛɛ tɛ mɛn na, ka a masɔrɔn Alla la baara karifani ale le la, a kana kɛ jɛrɛdaba ri, wala mɛn jusu kaliyala bɔla, wala dɔlɔ minna, wala mɛn fadiman, wala wodi kɔmɛ telenbaliya rɔ. 8 Kɔni a ye londanilu lamira kosɛbɛ, koɲuma ye diya a yɛ, a koloni, a telenni, a sɛniman, a jɛrɛ mirani. 9 A ka kan ka a sɛɛbɛ don kibaro lase ma ikomin a karanni a la ɲa mɛn ma, kosa a ye se doilu lalemɛniyala karan bɛrɛ rɔ, ka ko masɔsɔlailu la fili yiraka ii la, karan bɛrɛ la ko rɔ.

10 Mɔɔ siyaman ye ye, a gbengben Judiya lemɛniya mɔɔ mɛnilu faaninta kuma fɔla, mɛnilu kɛnin muruntilailu ri mɛnilu ye kuma fuuilu fɔla, ka doilu lafili. 11 I ye woilu dailu mira, ka a masɔrɔn denbaya tiɲanna le woilu ri, ka fara ii la karanilu la mɛnilu dahani tɛ malobaliya rɔ nanfulu ko la. 12 Ii jɛrɛ wara kelalasela do le ka a fɔ ko, «Wuya fɔla le Kɛrɛtikailu ri waati bɛɛ, ikomin sobo jamanniilu, noma salailu.» 13 Tuɲa le wo sere ri. Wo le rɔ, ii sɔn fɔ ii yɛ ii sɛbɛ rɔ kosa ii la lemɛniya ye sabati, 14 ka fara ii la tolo malɔla Judiyailu la taliilu la, a ni jamarili mɛnilu farani wo mɔɔilu la mɛnilu ka ii ban tuɲa rɔ. 15 Fen bɛɛ dahanin mɔɔ sɛnimanilu bolo, kɔni foyi dahanin tɛ mɔɔ kɔsɔnninilu ni lemɛniyabaliilu bolo. Ii sɔnɔmɛ ni ii hankili bɛɛ kɔsɔnin. 16 Woilu ye a fɔla le ko ii ka Alla lɔn, kɔni ii banni Alla rɔ ii kɛwaliilu rɔ. Ii haramunni, ii tɛ kuma mirala, ii ti se waliɲuma si kɛla.