1 A labila lemɛniya mɔɔilu la ko ii ye kolo mansailu ni kuntiilu ma, ka ii la kumailu mira. Ii ye ii rabɛn kɛwali ɲuma su bɛɛ kanma. 2 Ii kana mɔɔ si tɔɔtiɲan, ii ye kɛ ko rabɛnnailu ni mɔɔ diɲaniilu ri, ka ɲumaya mɔɔilu bɛɛ la. 3 Ka a masɔrɔn a damira, hankilidɔɔilu ni mɔɔ muruntini ni mɔɔ lafilila le tɛrɛ an di. An tɛrɛ an na kunfan ni an diyanan koilu su bɛɛ la jɔnya le kɔrɔ, ka an na dunuɲaratɛɛ kɛ juuya ni minlɛ rɔ. Kɔniyaba tora an ni doilu tɛma. 4 Kɔni Alla an nakisila ka a la ɲumaya ni a la kaninteya yiraka an na waati mɛn na, 5 a ka an nakisi. Adon, a ma wo kɛ ko an da ko telenniilu kɛ, kɔni fɔɔ a la kininkinin na ko rɔ. A ra an nakisi ka fara an na sun ji rɔ la, ka sɔrɔn ko kura. An da dunuɲaratɛɛ kura sɔrɔn Alla la Nii Sɛniman baraka rɔ, 6 a ka mɛn dafanin najii an ma, an nakisila Isa Ɲenematɔmɔnin baraka rɔ. 7 Wo rɔ, ikomin an ye telen a ɲakɔrɔ a la hina baraka rɔ, an ye kɛ cɛ sɔrɔnnailu ri ka bɛn an jii ɲenemaya banbali sɔrɔn ko ma.

8 Tuɲa le wo kuma ri. A lɔɔ ye n na ko i ye kankan a kuma ma, kosa mɛnilu ra la Alla la, woilu ye ii sɛɛbɛ don baara ɲuma ma. Wo koilu le bɛnnin, woilu le tɔnɔ ka bon mɔɔilu bɛɛ ma. 9 Kɔni i jɛrɛ latanka ko masɔsɔla hankilidɔɔilu ma a ni mɔɔilu benbailu tɔɔilu fɛsɛfɛsɛ ni bɛnbaliya ni sɔnkɔ, sɔnkɔ mɛnilu farani sariya la, ka a masɔrɔn woilu tɔnɔ tɛ a la, ii ye kɛla le fuyan. 10 Mɔɔ mɛn ye latalali ladonna jama rɔ, i wa a lalɔn waati mɛn na siɲa kelen haan fila, i mataa wo la. 11 A lɔn ko wo tii hankili ɲakɛnin. A wa kɛ hakɛ kɛla, a ye a jɛrɛ le jalakila.

12 N wa Aritema lawa i tɔrɔfɛ waati mɛn na wala Tisiki, fɛrɛ kɛ i ye na n tɔrɔfɛ Nikopoli so kɔndɔ, baa n ye a fɛ, ka nɛnɛ waati kɛ ye. 13 I ye sariya karanmɔɔ Senasi ni Apɔlɔsi dɛmɛn ii fanda ko la ii la taama rɔ kosa foyi kana dɛsɛ ii ma. 14 Fɔɔ an na mɔɔilu fanan ye ii karan de koɲuma kɛ ma ka ii tunadiya, kosa ii ye se ii mako gbɛlɛnilu ɲala, ii kana to siini fuu fanan.

15 N fɛ mɔɔilu bɛɛ ye i tuwala. An ye woilu fola an duman mɛnilu yɛ lemɛniya rɔ.

Alla ye hina ai bɛɛ la.