1 Aba ba ala ayene, ikweyi ko wowa ka Adole Oyesu Okristi omani wi ikweyi ko ogbayi ka shini ahan yo kpa anu. 2 Nyya bala ayene mala ka byotu ikweyi kela ni aba ka ni lo, maha bane, kwe aha tono, kwe aha ta ipu ko okpa mo Eno ka Adole kwobonu wa wa. 3 Ashishe na ka gyala egya ebyibye lo. Ikweyi koni eno ni ya wa lo gbishini eno ko onu wa. Ebeni ase bibi ya bose ese kweyi ya gola. 4 Ase bibi oni ya tela kela ko Owuso kpo oza ni ase ma mo oshoshi ni. Oya kiyinu kweyi ya manu wose kojoji. Oya ga yagye ole ko Owuso kweyi ya ziyi nu manu wo Owuso. 5 Ala ra lo nkela mani dala ishini nyyo kpa ala ni? 6 Oje ke yaba ni yoza mani walo ni, ala ke gyoza ni owe ni. Koni ishi oni wa, ase bibi mani, ya wipu kese. 7 Obibi ni ashishe gye lo ni kwobonu ya yoko nu wa, oza ni ke ya gbodagye mani ya gbodagye lo gbishini aya ase ni ya wobi ni yi bize imbe oya showe bita. 8 Kweyi ebeni ase bibi ya bose, ishini Adole Oyesu wa, oya yo ngmo kpo owu ko okwunu nu, kweyi igyashi ko wowa ka Adole yayo kya shaka-shaka. 9 Ase bibi mani yawa kpo oshu ki Ibiri, oya ya awoza kpi igbashi ko kame nwashika, 10 kweyi oya yoko kpo ozabibi wonyonya ko gyawase ni ba yishi ni egya. Aba yishi ikweyi koni atela ko yimu kokwokwoshi ni ya ngmawa ni. 11 Ni olemani oni Owuso ya yo oziyi wa bize shini ana kyogwu kpo okame. 12 Mani oni kpiri kase ni kyogwu kpo okwokwoshi lo kweyi ba shotunehe kpo ozalabi, aba gekwu.

13 Oke wotiri daha shan shotunehe do Owuso ikweyi kala, ayene ni Adole ya yimu ni. Koni Owuso shala shini ala wa kikyikyo ni oya ngma ala ni, bwebe koshu ko Omaku ko yala wase sere bwebe ko otuse kala ipu ko okwokwoshi. 14 Owuso yala ogwu bwebe ko oshu neshi ni aha ka dala ni; shini ala wa kpo okwu kala ipu ki igyashi ka Adole ka Oyesu Okristi. 15 Ni olemani oni ayene, ala hagye loshu ipu ko okwokwoshi kpo oza ni aha fala, kpo okpa ni aha ta dala ni.

16 Adole Oyesu Okristi abiyinu kpo Owuso Ada kaha, ni gbimu daha bwebe ko oneshi nu kweyi taho otugbagba ko gbogbo-gbogbo kpi iyitagye neshi ni, 17 na ta lo otugbagba kweyi dala oshu shini ala yoza gyogye kyi kela gyogye ishi kpiri.