1 Oshu bwebe ko Oyahuda, oyole ko Oyesu Okristi, oyene ko Oyakubu,

Gebe kawase ni Owuso yuwogwu ni, awase ni Owuso Ada ya yimu wa kweyi Oyesu Okristi ya gbeho wa ni:

2 Iyinyinyi, omene kpimu ko Owuso na yo kpala sheyi gagye.

3 Awoya hin moshi, ngbimu ko tokpa ikweyi kela ko olayi ni apye dudu ni, itikpi nwwa ma mo oshu koni nyya ta shini na talotugbagba shala takirikwu kotata ikweyi kotuse kaha ni Owuso yi nabo dawa ase nu ni. 4 Ikweyi koni awase labi pa wule wipu kala ala ke gye lo. Awase ni akwobonu myuwoyi nekye-nekye ko yishi ni, agyo Owuso lo, aye eshi ko Owuso kaha pya wowe ko beba, kweyi atela ko Oyesu Okristi, Adole kase kpiri.

5 Koni ala kwobonu gyoza mani ni, nyya yimu ko rala mo ishi oye Adole ngmase nu bwokpagye ki Ijip, itikpi oke wa yawase ni kyogwu kpanu lo ni ngmo. 6 Ala rela ka ayoleho ni gweji koshu ni adawa ni ta kweyi shebe koyagye wa bita: Owuso yuwa gbo kpa ashirika ko gbogbo-gbogbo kweyi yuwa shonu gagye ipu kebe dibu ba gbeyi kepwo wa Eno nyakwu oni. 7 Rela ko Osodom kpo Ogomora, kpa awogya ni kuwa ni, ayoza ni ayoleho ko Owuso ya ni kweyi ba beba, ba yoza bibi: amowe ipu kola ko gbogbo-gbogbo, oni wa akpaha pyopyi dase kpiri. 8 Mamani, awase mani nana ni yuwa yikpiye wa yishi ni, atela koshu ko Owuso, kweyi asa ayoleho ki iso esa. 9 Omikel ni woteyi ka ayoleho ni ke ya mani lo. Ishini oya tawashu kpi Ibiri ikweyi ko okwu ko Omusa ni, Omikel tigiga tota ko si Ibiri esa lo, oke kela bibi oyoye ikweyi nu lo. Opa kamo, <<Adole na kyogwu!>> 10 Awase mani ke ba sesa ikweyi koza ni agyikweyi nu lo ni kpoza ni otu wa kadawa ni; ale byebe kakyashi, awoza ni ba ngmuwa ni oma. 11 Igbe na tuwa! Agboso owe ko Okayinu. Ikweyi kimu kikwiri, abwo owe kigbo ni Obalam bwu ni. Aba ta saseyi byoni Okora ya ni, kweyi agekwu byoni ogekwu ni. 12 Awase mani kyapwapwa ebe kozarore kimya kala. Agbiweyi lo, awawogbeho kobize ni gyipu kiyiwa kin. Awowuso tobi ni ya towu yeye kweyi pasha, owuso ke yiwo lo. Awe efu kono ni gbo ogwogwa lo ni, efu ni ayi shu tonu ni, agekwu kyaga. 13 Alema byogwa ki ishu ni ya nyoza ni, oza kiweyi wa tese byoza ni ya kyowu ni. Ale byinyiwo ni nyowe ni, Owuso yebe dibu ni tobi shojoji ni tagye ya gbeyi wa. 14 Enok ni wase ko omwahapa bwi ikweyi ka Adomu ni bane ikweyi kawase mani mo: <<Ma, Adole ya wa kpa ayoleho nu neshi okpaku okpaku nwashika, 15 kowa kepwo ikweyi kase kpiri, ko gbase ogo agye ikweyi kozalabi ni aya ni kpela bibi ni awinozalabi ka ikweyi nu ni!>>

16 Awase mani wawino kakyose kpawo mobibi kase; aba kimu koza bibi ni yotu wa ni; aba kiyiwa kweyi ba kase ashini shini ana pyoza ni aba yimu ni.

17 Awoya hin moshi, ala rela koza ni ayikoko ka Adole Oyesu Okristi kamo oya gbodagye ni. 18 Aka dala mo, <<Ishini okweyi kese yawa awase ni ba gboso imu kotu wa ni wa ko Owuso lo ni ba yaleye.>> 19 Awa pini byikweyi koko wa la, awo yoza ni otu wa ka dawa ni, agbo Omaku ko Owuso lo. 20 Ala ni ke wawoya hin moshi ni, ala gohobu ko miyikala giso ipu kotuse sere kala, kweyi ala tinarigwu ipu ko oshu ko Omaku ko Owuso. 21 Ala bagye kala ipu kimu ko Owuso, ba gbeyi ka Adole ka Oyesu Okristi ipu kiyinyinyi nu ko dala olayi ko gbogbo-gbogbo. 22 Ala miyinyinyi kawase ni ba kotu epepa ni; 23 ala ngmase shishini shipu kola; ala miyinyinyi kase shishini nyabo kposhi yoya, ala ke tela kojoji, ko oshiye wa ni ikpiye kozalabi yi yishi ni.

24 Anu ni gboshu ko gbala shini ala ka gbo lo, kweyi ki byala wobutu nu kpo otunehe gboza kepwo lo, 25 Owuso oye kpokponu Inongmaha, bwebe ko Oyesu Okristi Adole kaha, igyashi, kpo oshu, bwo oyi kpiri ni shigbo ni, kpa anani, wakakanu ko gbogbo-gbogbo! Nalemani.