1 Okpa mani tawoza ni Oyesu Okristi sayi ni. Owuso sayi danu ko shiya ayole nu oza ni ya gbeji kelo ya wa gbodagye ni. Okristi sayi kawoza mani doyole nu ko Oyohana. Oto oyoleho nu oleho gebe nu, 2 Oyohana ke kojoji ni oma ni. Omani wela ko Owuso kpolobene kela kokwokwoshi ni Oyesu Okristi sayi ni. 3 Otunehe yo kpase ni kokpa mani, aboneshi ki yo kpase ni pwoshu ni obane ni kweyi yela kokpa mani tipu kotu wa, ikweyi koni ishi yaba nwa kelo ni awoza mani ba wa gbodagye ni.

4 Bwebe ko Oyohana gawoda ko Owuso ahapa ni bo okpagye ka Asiya ni:

Eshi kpo omene na yo kpala bwebe ko Owuso, ni we, ni kwobonu we, ni ki yawa ni, ki bwebe kawomaku ahapa ni bohobu kobe nu ni, 5 ki bwebe ko Oyesu Okristi, ni wolobene kokwokwoshi, oyi kikyikyo ko nyiso bwikwu, kpino kpogwu kawose kese kpiri.

Oyimu kaha, kweyi ongmaha shozalabi bwebe kikwu nu, 6 kweyi oyaha wo obula kawosapa ko yoko do Owuso nu kpa Ada nu. Igyashi kposhu wako Oyesu Okristi ko gbogbo-gbogbo. Nalemani.

7 Ma, ose yawa ikweyi ka akpa! Ananoho ba mo, kawase ni tokpa ni. Ase kese kpiri ba byotu ikweyi nu. Onalemani!

8 Adole Owuso kamo, <<Ami wa Alfa, ami wo Omega, Owuso ni we, ni kwobonu we, ni ki yawa ni, Ine koshu kpiri.>>

9 Ami wo Oyohana, oyene kala, oya kala ipu ko owe moma kpo obula kpo otuzoze ni wakaka ipu ko Oyesu ni. Ayun tokpagye ko Opatumos ni inyo shogba to ni, ikweyi koni ntono ke Ela ko Owuso kpo kwokwoshi ni Oyesu sayi ni. 10 Eno ko Owuso nyyipu ko Omaku kweyi npwoko nyakwu, ni ya yeya bya ajigwo ni, ya kela itikpi hin. 11 Oko kamo, <<Toza ni oma ni, kweyi toleho kokpa ni gawoda ko Owuso ahapa ni ba wogya nyakwu ahapa mani: Efesu, Osumayina, Opegamo, Otiyatira, Osardis, Ofiladefiya, kpo Olawudikiya.>>

12 Npyiyi ko mase ni ya kela dami ni, kweyi nmo oda ko ozinariya ahapa ni aba yi ikwomu hi ikweyi wa ni, 13 kweyi ipu wa oje byasuse, shoshiye wurututu ni fikpo nuni, kweyi yo gbogbo ko ozinariya gbotu. 14 Inyeyi nu shehe byo omowu, kwe ebwu, kweyi iyi nu ya kye byola ni. 15 Ikpo nu ba yu byogye ni ya shola ni, kweyi oko nu ya yeya byinyo ni yape kposhu ni. 16 Obyi inyiwo ahapa abore nu, kweyi ewakpa oye ni ya re kotata agbabo pepa ni bose bwokwunu nu. Aheyi nu ya yu byo oyoyu ke eno kisheno. 17 Ishini nmo ni, ngbo obutu nu byo okwu ni. Oya abore nu sun kweyi kamo: <<Ka yoshi lo! Ami wikyikyo, ami wo gwejeji. 18 Ami wase iyiyi ni! Ngekwu, anani ke nyyiyi ko gbogbo-gbogbo. Ngboshu ikweyi kikwu kpa Aleku.* 19 Ni olemani, tawoza ni oma ni, awoza ni oyama anani, kpa awoza niba gbodagye ohobu ni. 20 Omani wikweyi ki inyiwo ahapa ni oma abore hin ni kpo oda ko ozinariya ahapa ni aba yi ikwomu hi ikweyi wa ni: inyiwo ahapa oni wa ayoleho ko Owuso ahapa, kweyi oda ki ikwomu ahapa ni wa awoda ko Owuso ahapa.