1 Ebeni nmo obekwu bose bwi ipu ki ishu. Ogbo agyi igwo kpi ikweyi ahapa; ikweyi kagyi nu kpiri gbo otu, ikweyi nu gbiye ni ya so Owuso esa ni. 2 Obekwu ni nma ni lema bye egye, ikpo nu lebya ki iwashi, okwunu nu lebya ka abaga. Egwa nyakwu do obekwu oshu nu, obe nu, kpo oshu nyakwu. 3 Ikweyi ko obekwu oye ya byo ogba akrigya, akrigya mani ke ze. Igbashi ya ase kese kpiri kwu kweyi agboso obekwu nyakwu mani. 4 Ananoho geyagye de egwa nyakwu ikweyi koni oyo oshu nu yi do obekwu. Mamani ageyagye do obekwu kamo, <<Anoho lebyo obekwu? Anoho agege ya nonu kpanu?>>

5 Owuso sho obekwu bita ya gboshu komo Owuso nye, ashobita gboshu ki ishayi eta so oya ihiri. 6 Oya yo Owuso okwunu, iye nu, ebeni oya nu ni, kpa awase ni biso kpiri ni. 7 Ashobita ya gbapwo kpo ase ko Owuso kweyi gwuwa agye, Adanu oshu ikweyi ka awose kpiri, okpagye, igbenu kpe edo kase gogo gogo. 8 Ase kese kpiri ba geyagye danu, awase ni ba geyagye lo ni kin pi ni wa awase ni Owuso ti iye wa ipu ko okpa ko olayi imbe ayese. Okpa mani wako oyi ko Otukpo ni ayi ngmo ni.

9 <<Ase ni gba akpaha ona pwo! 10 Ase ni wako yi kwu, aba yo kwu; ase ni wa ko yi ngmo kpe ewakpa, aba yi ngmo kpe ewakpa. Omani wiyawu ko ozotu kpo otuse ebe kase ko Owuso.>>

11 Kweyi nki mo obekwu oye, ni bose wese. Ogba agyi epa byo agyi ko oyi ko Otukpo, kweyi oya kela byo egwa nyakwu. 12 Oyo oko kpo oshu nyakwu ko obekwu kikyikyo obutu nu. Obye ese koshu kpase ni bipu nu ni kpiri ko geyagye do obekwu kikyikyo ni akrigya nu ze wa. 13 Obekwu ko omwepa mani ya awoza kigbashi nyakwu; oyo ola wokpagye bwi iso iyi ka anano. 14 Ogya awase kese kpiri egya bwebe ka awigbashi ni ayo ya obutu ko obekwu kikyikyo ni. Obekwu ka da awase kese mo ana moyi ka abokpa do obekwu ni gba akrigya ke ewakpa ni kwikyikyeni oke gekwu lo ni. 15 Asho obekwu ko omwepa bita ko showu ko olayi to oyi ko obekwu kikyikyo, shini na kela kweyi na ngma wase kpiri ni tela ko geyagye danu ni. 16 Obekwu byase koshu, anyakwase kpa ayi leke, olodu kpo oleha, awoshe kpase ni wo oshe lo kpiri ba gbe enena abore wa kpo ogo wa. 17 Ashishe ya roza kwe ya tora ko oza kelo, owoni gbe enena mani lo, iye ko obekwu kwe enena ni hagye ikweyi ki iye nu.

18 Omani so ogbo oziyi ome oya gye enena ko obekwu mani la! Owoni gbo okyo oya gye enena ko obekwu mani, ikweyi koni enena mani wi iye kashe la. Enena mani wi ihiri, ihiri, ihiri (666).