1 Ebeni nmo oyoleho ko Owuso yawa bwi iso wo okpagye, obyo oba ko ogo ni gbomeyi lo ni, obya ashirika gyokwu abonu. 2 Oyo egwa nyakwu yi kwu, egwa nekye, oni anu ni wo ibiri ni, asha ashirika ka ashayi okpakwu oye. 3 Oyoleho ko Owuso to go ko ogo ni gbomeyi lo ni, oyogwu kweyi yoba shini ona ka gyase egya lo gbishini ishayi okpakwu oye ni na shigbo. Itikpi ko oni aba yo gwa ki ishi gbayayi. 4 Ebeni nma awobe kpase ni bagye ikweyi wa ni, adawo oshu ko kepwo. Nki mo omaku kawase ni ayuwa ngmo ikweyi koni akokwokwoshi ni Oyesu sayi kpe ela ko Owuso ni. Ageyagye do obekwu kwo oyi nu lo, ake tenena ko obekwu ogo wa kwe abo wa lo. Apyo olayi kweyi arose kpo Okristi ki ishayi okpakwu oye. 5 (Ashini ko okwu shiyi lo gbishini ishayi okpakwu oye ni shigbo.) Omani wi ikyikyo ko nyiso bwikwu. 6 Otunehe kpo aboneshi nyakwu wa kawase ni wa kikyikyo ni ayuwa nyiso bwikwu ni. Ikwu ko omwepa gboshu ikweyi wa lo; aba wa awosapa ko Owuso kpa ako Okristi kweyi aba kpogwu kpa anu ki ishayi okpakwu oye.

7 Ishini ishayi okpakwu mani shigbo, aba yi Ibiri ya ngma sho oruduru nu, 8 Oya gese koga gyase ni bese kpiri ni egya, ni wo Ogog kpo Omagog ni, Ibiri ya kpuwa gbayi kpiri ko kpefu, anwashika byikpo kisisagye ki ishu. 9 Apasha ipu kese aki shogba te ebe ni ayi ko Owuso banu kpo ogya nyakwu ni oya yimu ni. Ola ke bwi iso yuwa yi kpiri. 10 Kweyi Ibiri ni gyuwegya ni ato gipu kola kpe ehola, ebeni obekwu kpa awobane kokame akwobonu kpuwa sho wa; kweyi aba mowe kotu ke eno ko gbogbo-gbogbo.

11 Kweyi nmo obe nyakwu ni wo nehe ni kpase ni yagye anu ni. Ese kpi iso gebi sho obutu nu aki muwa kelo. 12 Ebeni nma awase ni gekwu ni, ka anyakwase ka ayileke abo oye kponu hagye obutu ko obe. Agwawokpa, aki gwokpa oye, ni wo okpa kolayi ni. Ake epwo kawase ni gekwu ni ikweyi koza ni aya ni, byoni ayita ipu kawokpa ni. 13 Ishu bose kpawo okwu ni bipu nu ni. Ikwu kpo aleku ki bya awokwu ni bipu wa ni wese, Akepwo ikweyi wa kpiri ikweyi koza ni aya ni. 14 Kweyi ikwu kpa aleku atuwa gola. (Ibwu ko ola mani wikwu ko omwepa.) 15 Awase ni iyewa bipu kokpa kolayi lo ni, atuwa gipu kibwu kola ko gbogbo-gbogbo.