1 Ebeni nmo Oyi ko Otukpo gwoba kikyikyo ipu ka ahapa ni, kweyi npwo oye ipu ka awoza ni gbo olayi mani kela byeya ka akpula ni kamo, <<Wa!>> 2 Nshoko kweyi nmo onya nehe. Ino sonya mani byo ota, adano otu. Obose bya ase ni ya kpefu ko refu.

3 Ebeni Oyi ko Otukpo ko gwoba ko omwepa; kweyi npwo oza ni gbo olayi ko omwepa kamo, <<Wa!>> 4 Onya oye nowa ki bose. Adase ni ya sonya mani oshu ko byefu wese, shini ase na ngmiyiwa. Adanu ewakpa nyakwu.

5 Ebeni Oyi ko Otukpo gwoba ko omweta; kweyi npwo oza ni gbo olayi ko omweta kamo, <<Wa!>> Nshoko nmo onya nobi. Ino sonya mani byoza ko myizire abo nu. 6 Npwoje byo oko ka awoza ene ni gbo olayi ni kamo, <<Owatu kewo ni wa abola koko wo ke eno oye, kweyi owatu eta ka ahunkpa wa abola koko wo ke eno oye. Ala ka ya ano kpi inyi yishi lo!>>

7 Oyi ko Otukpo kyi gwoba ko omene; Npwo oza ni gbo olayi ko omene kamo, <<Wa!>> 8 Nshoko nmo onya oye inyi-kayi. Ase ni sonya mani ayogwu mi Ikwu kpa Alekwu, ya gboso itikpi. Ada awoshu ikweyi ko okwu oye ipu ki igwo kase kese mani, ko yuwa ngmo bwebe kefu kpokpo, emye, ose gogo-gogo kpa awobekwu. 9 Oyi ko Otukpo gwoba ko omeho. Nmo omaku kawase ni ayuwa ngmo ikweyi koni atono kela ko Owuso kpo okwokwoshi ni beye ko okpe. 10 Awomaku mani ngmegba kpoko nyakwu mo, <<Adole Ine koshu kpiri, ase neshi kpi ine kokwokwoshi! Ishinya ome ni oya kwese epwo kweyi gbuwogo agye koni ayaha ngmo ni?>> 11 Adawo omaku mani oshiye nehe ko shoko, kweyi aka dawa mo ana minyo gbayayi ome, gbishini awomonyekwotu ya ayole kpa awogboso kpiri ni ashu ko ngmo ni yi ngmo kweyi ome.

12 Nmo Oyi ko Otukpo gwoba ko omwihiri. Okpagye ja kotota, kweyi eno pya tobi tiri bya akyi nobi ni, oya pya gola yo byo oyi ni. 13 Awinyiwo shonu okpagye byo ogwogwa ko kefu ni zelo shonu okpagye ishi ni owu loshu tani. 14 Akpa gebi bya ayokpa ko Owuso la ni, efu kpiri kpagye kpiri ni inyo shogba toni shebe ni abanu ni bita. 15 Ebeni awose kese, awoteyi kpawo kpogwu ka adakare, awolodu kpa awine koshu, kpa ashini kase kpiri, awoshe kawase ni woshe lo ni, yiyiwa teba owu ko okpo iso kefu. 16 Angmegba yefu kpi ikyikpo ogwu kamo, <<Gbo saha kweyi yaha teba shiyi kase ni yagye obe kpa anya ko Oyi ko Otukpo oni! 17 Kokwokwoshi eno ka nya wa yoma! Owuso kpo Oyi ko Oyi ko Otukpo ba sayi ka anya wa, ananoho ya gege ko wobi.>>