1 Ebeni nmo oza ki igbashi oye nyakwu ipu ka akpa. Ayoleho ahapa kpe ebi ahapa ni wa ko gwejeji ni, ikweyi koni owanya ko gwejeji ni Owuso ya ya ni. 2 Ebeni nmo oje lebyi ishu ki iyimebe nyabo kpo ola. Nki mawase ni rogwa ikweyi ko obekwu kpo oyi nu kpase ni oza koka hagye okwunu kiye nu ni. Ahagye agbabo ki ishu, abyo okwuburu ni Owuso da awa ni, 3 kweyi aba wigye ko Omusa, oyole ko Owuso, kpi igye ko Oyi ko Otukpo mo:

<<Adole Owuso Ine koshu kpiri,

oko wo shoshi ki gyokwu!

Ose ka awokpagye,

owe wo ogyogye ki gbo okwokwoshi!

4 Adole anoho ya yoshi wo lo?

Anoho ya gege ya tanu ko ki igyashi wo?

Ikweyi koni awo fufo pini wa ase neshi la.

Awokpagye kpiri bawa hagye obutu wo

kweyi ba geyagye dawo,

ikweyi koni ananoho mo oko neshi wo ni oya ni.>>

5 Itikpi ko mani nmo ole ko Owuso gwogwa ipu ki iso, kpa Adaba Neshi ipu nu. 6 Ayoleho ahapa ni gbebi ahapa ni bose bwipu kole ko Owuso, asho opa neshi ni ya yu ni kpo ogbogbo ko ozinariya gbotu wa. 7 Ebeni oye ipu ka awoza ni gbo olayi ene mani da ayoleho ahapa ake ahapa ko ozinariya nwu kpa anya ko Owuso, ni yo ko gbogbo-gbogbo. 8 Ole ko Owuso nwu kpi iwola bwi igyashi kpo oshu ko Owuso, kweyi ashishe ya gipu kole ko Owuso lo, gbishini ebi ahapa ni ayoleho ahapa biwa mani kweyi.