1 Ebeni nshoko kweyi nmo, Oyi ko Otukpo hagye Efu ko Osiyona; ase okpakwu ogbogbo oye sawene ayene ni atiye nu kpa aka Ada nu ogo wa. 2 Kweyi npwoko bwi iso ni ya yeya byo inyo ni ya pe, byeya ka akpula. Oya yeya byi igye ni ayi ki igye ba wo kpo okwuburu wa ni. 3 Ase okpakwu ogbogbo oye sawene ayene kpa awanyakwase, kpo oza ene ni gbo olayi ni, hagye ohobu ko obe. Aba wigye pepe ni awa fufuwa kin ba gishi kowo la, ipu kase kese kpiri awa ni Owuso ngmawa ni. 4 Awase ni yi iyiwa tagye neshi, akyogwu ko kya kpa anya lo; akwi iyiwa. Agboso Oyi ko Otukpo ge ebe kpiri ni oya ga. Ayuwa ngma sha ashini kase kese, kweyi awa kikyikyo ni ayuwa do Owuso kpo Oyi ko Otukpo ni. 5 Agyuwa kpo okame lo; agbepwo oyoye lo.

6 Ebeni nmoyoleho oye yawu iso, kpo Oshu Neshi ni wa ko gbogbo ni ko ka dase kese, awikpo ko ose kpiri, ose kpiri, igbenu kpiri kpo okpagye kpiri. 7 Oka kpo oko nyakwu kamo, <<Geyagye do Owuso kweyi sho okwunu iye! Ikweyi koni ishi gye wa ko kepwo ikweyi kase kpiri. Geyagye do ase ni yiso, kpo okpagye, kpi ishu, kpo okpa ni!>>

8 Oyoleho ko omwepa gbosa kikyikyo kweyi mo, <<Ogbo wa! Okpagye nyakwu ko Obabila gbo wa! Kweyi oyase kpiri gwinyi nu, inyi loshu kimu ke eba boba nu!>>

9 Oyoleho ko omweta gbosa ayoleho epa ni ga ni, kweyi ka kpo oko nyakwu mo, <<Awase ni geyagye do obekwu kpo oyi nu kweyi apyenena ogo wa kwa abo wa 10 awa abiyiwa ba gwinyi ko Owuso, inyi ka anya nu, ni oshonu shipu ka abwa ka anya nu kpiri ni! Kpiri kase ni yoza mani aba dawowe ipu kola kpo ehola ohobu ko ayoleho neshi kpo Oyi ko Otukpo. 11 Iwola kola ni dawowe ni ya giso ko gbogbo-gbogbo. Awase ni geyagye do obekwu mani kpo oyi nu ni kpa awase ni amyuwoyi kiye nu ni gbo ominyo lo ke eno ko otu.>>

12 Omani ya sayi ma ase ko Owuso na zotu, awase ni gboso ono ko Owuso ki gbo okwokwoshi do Oyesu ni. 13 Ebeni npwo oko bwi iso ya kamo, <<Yoza mani ta: Otunehe yo kpa awase ni gekwu ipu ka Adole bwanani gohobu!>>

Omaku ko Owuso kamo, <<Olema kwokwoshi! Aba minyo koko wa, ikweyi koni oko wa ya gbosuwa.>>

14 Ebeni nshoko, nma akpa nehe, oza ni yagye akpa mani lebya asuse, kpo otu ko ozinariya ikweyi nu kpo okege rore yabo nu. 15 Ebeni oyoleho oye bose bwo ole ko Owuso, kweyi kyegba kpo oko nwa dase ni yagye akpa mani ni mo, <<Yoko kpo okege wo shini ogwi izire, ikweyi koni ishi gye wa; ishi ko kyi izire kese!>> 16 Ebeni ase ni yagye ikweyi ka akpa ni to okege nu gipu kese, kweyi yese gwu.

17 Ebeni nmo oyoleho oye ki bose bwo ole ko Owuso iso, ogbo okege rore mamani. 18 Ebeni oyoleho oye, ni gboshu ikweyi kola ni, bwo okpe yawa. Ongmegba kpo oko nwa do oyoleho ni byo okege rore ni mo, <<Yoko kpo okege wo shini wogwogwa keho kese, ikweyi koni oze ko gwu wa!>> 19 Ebeni oyoleho oye, to okege nu gipu kese, okyi izire bwe eho, kweyi otuwa gipu kebe ni aba pyi inyi ka anya ko Owuso. 20 Apyo ogwogwa kefu bwebe ko pyi inyi wese ko ogya nyakwu, kweyi oyi bose ebeni aba pyi inyi mani, igbo ko pope koyi mani wo ogbogbo epa kweyi olibu nu lebyo ikpo eho.