1 Ta do oyoleho ko oda ko Owuso ke Efesu mo: <<Omani wo oleho bwebe kase ni byi inyiwo ahapa abore nu, ni ki ya yawu ebe ki ikwomu ko ozinariya ahapa ni. 2 Ngyoza ni oya ya ni; ngyo owe koko ni oya ni kpo otu mene ni ogbo ni. Ngye kamo oya kyogwu kpase bibi lo, awase ni mawa wa ayikoko ko Oyesu ake we lo ni, omuwama kweyi ogye kamo aba kokame la. 3 Ogbotu mene, omowe ikweyi hin, oke nwa lo. 4 Ozani ke shiwo hin kpawo ni yoma: anani oya yimu hin byoni oyimu hin bwikyikyo ni kelo. 5 Rela kigbo ni ogbo ni! Shagbotu shini oyoza ni oya ikyikyo ni. Owoni oshagbotu lo, nyya wa tawo kweyi yo oda ki ikwomu wo ya bize shebe ni oya nu ni. 6 Oza neshi ni oke ya ni yoma: oya kyogwu kpo oza ni ikpo ko Onikolata baya ni lo, byo ni ami ya kyogwu kpawa lo ni.

7 <<Ase ni gbakpaha, ona pwoza ni Omaku ko Owuso ya kado awoda ko Owuso ni!

<<Ase ni rogwa, nyya danu oshu ko hogwogwa kefu ko olayi ni ya gye ipu ke Eho ko Owuso ni.

8 <<Ta do oyoleho koda ko Owuso ko Osumayina: <<Omani wo oleho bwebe kase ni wikyikyo kpo gwejeji ni, ni gekwu ki nyiso yo kpo olayi ni. 9 Nggyotu byobya wo; ngye kamo owo oleha la, okwokwoshi nu ke owolodu la! Ngyela bibi ni awase ni kokame mawa wase ko Oyahuda baka ikweyi wo ni, ake wase ko Oyahuda lalo; Awayi kikpo ki Ibiri la! 10 Ka yoshi ko owe oyoye ni ya wa tawo ni lo. Pwo! Ibiri ya wa malama, bwebe ko ya ashini kala shetu, kweyi otubyobya kala ya ye eno igwo. Hagye giri dami, ka ko gekwu. Ami ke ya dala olayi ni wa abola ko ogwarore kala ni.

11 <<Ase ni gbakpaha, ona pwoza ni Omaku ya ka da awoda ko Owuso ni!

<<Awase ni rogwa ikwu ko omwepa ya ngmuwa lo.

12 <<Ta gebe ko oyoleho koda ko Owuso ko Opegamus kamo: Omani wo oleho bwebe kase ni gbe ewakpa rore agbabo pepa ni. 13 Ngyebe ko yagye wo, ebeni obe ki Ibiri yanu ni. Ala wase hin kokwokwoshi, kwikyikye ni otuse ni ala gbo ikweyi hin ni loshu, kishi ni ayo olobene hin kokwokwoshi, Antipas ngmo ebeni Ibiri yagye ni. 14 Oza gbayayi ni ke shiwo hin kpala ni yoma: ase ashini ipu kala ba gboso ozafofu ko Obalam, ni fo Obalak oza ni oya ya ko ya ase ki Izrayila na yo ozalabi ni, okpuwo okwunu ga roza ni ayi peka ni kpeba boba. 15 Mamani ala gbawase ipu kala ni ba gboso ozafofu ko Onikolata ni. 16 Anani ala shagbotu! Owoni ala shagbotu lo, oya gbeji kelo nyya wa kpefu kpa awase ni kpe ewakpa ni ya bose bwo okwunu hin ni

17 <<Ase ni gbakpaha, na pwoza ni Omaku ya ka da awoda ko Owuso ni!>>

<<Awase ni rogwa, aba hoza rore ni ase gye lo, ni aba yogwu mo omana ni. Nki ya da ananoho wa ikyikpo nehe, ni atiye pepe na ashishe gye lo ni anu, ase ni nye ni kin pini ya gye la.>>

18 Ta do oyoleho ko oda ko Owuso ko Otiyatira kamo:

<<Oleho mani bwebe ko Oyi ko Owuso ni iyi nu ya kye byi igbenu kola ni, ni ikponu ya yu byo ogye ngla-ngla ni. 19 Nggyoza ni oyaya ni. Nggyimu yoya kpo otuse wo, okwokwoshi wo, oko wo, kpotu mene wo. Ngye kamo oya yoko anani shoko ni oya ikyikyo ni. 20 Ozani ke shiwo hin kpawo ni yoma: okyogwu kpo onya ni aba yogwu mo Ojezebel, ni ya yiyinu ogwu manu wo oyoleho ko Owuso ni. Ozafofu nu ya ayole hin ba gebe keba boba, kpo oza rore ni ayi peka ni. 21 Ndanu ishi koni oya shagbotu ni, oke gbimu ko sheba boba bita lo. 22 Mani oni nyya yo to ogwudu ebeni anu kpa awase ni beba kpanu ni ba mowe kotata ni. Nyya yoza mani anani owoni ashagbotu koza bibi ni aya kpanu ni lo. 23 Nki ya yawo gboso ya ngmo, kweyi awoda ko Owuso kpiri ba gye mami gyotu kpimu kotu ka ananoho. Nyya da ananoho abola gyogye kpo oza ni oya ni.

24 <<Ashini kala ase ko Otiyatira ke gboso ozafofu bibi mani lo; ala foza ni ashini kase ba yogwu mo <Oza libwu ki ibiri> lo. Nka dala kamo nyya sala enu oyoye lo. 25 Ala ke yabo byoza ni yabo kala ni pya, gbishi ni nyya wa ni. 26 Ase ni rogwa, ni gohobu koza ni nyya yimu ni go okweyi. Nyya danu oshu ni Ada hin dami ni: nyya dawo oshu ikweyi ko okpagye kpiri, 27 oya kpogwu wa kpo okute kogye ko ki yuwa kya buru-buru bye eyi ka agye. 28 Nki ya dawi inyiwo kotukpokyi

29 <<Ase ni gbakpaha, ona pwoza ni Omaku ko Owuso ka da awoda ko Owuso ni!>>