1 Itikpi ko mani nma ayoleho ko Owuso ene hagye agbabo ene kese, ayowu gogo-gogo ene yi gbo tagye shini owu naka ta ese kwi ishu, kwe efu oyoye lo. 2 Nki mo oyoleho oye yawa bwa ahanokyi kpo oba kofunu ko Owuso ine kolayi. Oya ayoleho ko Owuso ene ogwu kpoko nwaa, awa ni adawoshu ko yokpagye kpishu yishi ni. 3 Oyoleho oni kamo, <<Ka yokpagye kwishu kwefu ofo kpowu wa lo, gbishini amya ayoleho ko Owuso oyi ogo wa imbe.>> 4 Aka dami mase ni ayoleho ko Owuso myuwoyi ogo ni wase okpakwu ogbogbo oye sawene ayene. Abwipu ka awipwoma igwepa ki Izrayila, 5 Ase okpakwu igwepa bwi ipwoma ko Ojuda, ase okpakwu igwepa bwi ipwoma ko Oruben, ase okpakwu igwepa bwi ipwoma ko Ogadi, 6 ase okpakwu igwepa bwi ipwoma ko Asha, ase okpakwu igwepa bwi ipwoma ko Onaftali, ase okpakwu igwepa bwi ipwoma ko Omanase, 7 ase okpakwu igwepa bwi ipwoma ko Osimiyo, ase okpakwu igwepa bwi ipwoma ko Olawi, ase okpakwu igwepa bwi ipwoma ki Isasha, 8 ase okpakwu igwepa bwi ipwoma ko Ozebulu, ase okpakwu igwepa bwi ipwoma ki Isu, ase okpakwu igwepa bwi ipwoma ko Obejami.

9 Itikpi ko omani nme ewa kasuse ni ashishe ya gege ya ka lo ni! Abwokpagye, ose, kpi igbenu wonyonya kpikpo kase gogo-gogo, kweyi ahagye ohobu ko obe kpo Oyi ko Otukpo, asho oshiye nehe, abyo okwari abo wa. 10 Kweyi ayogwu kpoko nyakwu mo: <<Ongmongma bwebe ko Owuso ka, anu ni yagye obe ni, kweyi ki bwebe ko Oyi ko Otukpo nu!>> 11 Ayoleho kpiri hagye shogba to obe, awanyakwase, kpo oza ene ni gbo olayi ni. Agbo agye yiyi wa ka agye obutu ko obe kweyi ba geyagye do Owuso, 12 akamo, <<Nalemani! Iye shosha, igyashi, oziyi, otunehe, abokpa, oshu, kpo ogege wako Owuso ko gbogbo gbogbo! Nalemani!>>

13 Anyakwase oye dumoka mo, <<Awanoho sho oshiye nehe mani, abwini wa?>>

14 <<Nkamo, ngye lo adole, ogye>>.

Oka dami mo, <<Awase ni bose bwipu kegye ko Okristi kotata ni oma. Ayo oshiye wa na kweyi yuwa shehe ipu koyi ko Oyi ko Otukpo. 15 Ozani yuwa hagye obutu ko obe ko Owuso ba geyagye danu ke eno kotu okpe nu ni oma. Anu ni yagye obe ni ya gbuwa gbogbo kpo obowu nu. 16 Aba ngmemye kwi igyini kelo; eno ya suwa lo, akpowu kola ya pwuwa lo, 17 ikweyi koni Oyi ko Otukpo, niyo otutehe ko obe ni, yawo inogbeho wa, oya kpuwogwu gokpa olayi. Kweyi Owuso ya wuwize iyi.>