1 Nmo okpa ko Owuso abore kase ni yagye obe ni; ogbe enena agbabo pepa, kweyi ayoba kpo oba ahapa. 2 Kweyi nmo oyoleho nyakwu, ni ya tono kpoko nyakwu ni mo, <<Anoho gye koyo oba mani gwa shini ona gwokpa ko Owuso?>> 3 Ashishe ke yaba lo, iso kwo okpagye kwa alekwu ko gwokpa shini ana mipu nu. 4 Nkyegba kotata ikweyi koni npyase ni gye ko gwokpa mani ko moza ni yipu nu ni lo. 5 Ashe ipu ka anyakwase ka dami mo, <<Ka kyegba lo. Ma! Abaga ki ipwoma ko Ojuda, ni wo oyi nyakwu ki ipwoma ko Odawuda ni, orogwa wa, oya gege yayo oba ahapa mani yi fo kweyi gwokpa ko Owuso.>>

6 Ebeni nmo Oyi ko Otukpo hagye otutehe ko obe, kpa awobize ni gbo olayi ni ene kpa awanyakwase ene shogba to. Oyi ko Otukpo mani lebyo oni akwobonu yi ngmo ni. Ogbo agyi ahapa kpi iyi ahapa, ni wo omaku ahapa ko Owuso ni atoleho wese mani kpiri ni. 7 Oyi ko Otukpo mani ga zokpa abore kase ni yagye obe ni. 8 Ni oya mani ni, ebe ni gbo olayi ni ene kpa awanyakwase awepa ayene kwagye ohobu ko Oyi ko Otukpo mani. Ananoho wa byo okuburu kpo owatu ko ozinariya nwonwu kpo ozakpehe, ni wi inarigwu kase ko Owuso. 9 Awigye pepe mo:

<<Ogye kozo okpa ko Owuso mani

kweyi yawo oba nu fo sho gwokpa ko Owuso.

Koni ayo ngmo, kweyi bwebe kikwu wo, obya ase webe ko Owuso

ase bwo ose gogo-gogo, igbenu, okpagye kpe edo kasuse kpiri.

10 Oyuwa wo obula ka awosapa ko geyagye do Owuso ka,

kweyi aba kpogwu kese.>>

11 Nki mebe, kweyi npwoko ka ayoleho, okpakwu kpi ikpokyo nwashika! Ahagye shogba to obe, kpo obize ene kpa awanyakwase, 12 kweyi awigye kpoko nyakwu mo:

<<Oyi ko Otukpo ko Owuso ni ayi ngmo ni gye

ko zo oshu, odu, oziyi, kpo oshu,

abokpa, igyashi kpiye shosha!>>

13 Kweyi npwe eya ko oza ni ayuwa iso, kpe ese, kpa alekwu kpipu kishu kpo oza ni gbo olayi ese mani kpiri ba wigye mo:

<<Iye shosha kpa abokpa, igyashi kpo oshu,

wa kase ni yo obe ni

ko gbogbo-gbogbo!>> 14 Awo oza ene ni gbo olayi mani kyogwu mo,

<<Nalemani!>> Kweyi awanyakwase kwagye kweyi ageyagye.