1 Ishini Oyi ko Otukpo gwoba ko omwahapa ni, iso sha din ko kepa kishi. 2 Ebeni nma ayoleho ko Owuso ahapa hagye obutu nu, kweyi adawa ajigwo ahapa.

3 Oyoleho ko Owuso oye ni gba ake ko ozinariya ni aba shoza kpehe ni, wa hagye okpe. Adanu oza kpehe nwashika shini na fayi kpi inarigwu kase ko Owuso kpiri, ikweyi ko okpe ko ozinariya ni yo obutu ko obe ni. 4 Iwola koza kpehe ni ya yola ni gi iso kpi inarigwu kase ko Owuso ni bwabo ko oyoleho ni hagye obutu ko Owuso ni. 5 Ebeni oyoleho zake koza kpehe, ofola bwo okpe mani nwo, kweyi ta wese. Ebebeni owusogbo, akpula gbo, owusotasha kweyi agye ja.

6 Kweyi ayoleho ko Owuso ahapa ni bya ajigwo ahapa ni kwotu ko ta ajigwo.

7 Oyoleho kikyikyo ta ajigwo nu. Akyo ki inyo, ola nyabo kpo oyi bwi iso shonu okpagye. Okwu oye ipu ke eta kese yola, okwu oye ipu ke eta kefu kpa ashi meme wonyonya yola kpiri.

8 Ebeni oyoleho ko omwepa ta ajigwo nu. Otoje ni lebye efu nyakwu ya kyola gipu ki ishu, okwu oye ipu ke eta ki ishu pya woyi, 9 okwu oye ipu ke eta ka awoza ni bipu ki ishu ni gekwu, okwu oye ipu ke eta ka awowu ki inyo kya ipu ki ishu.

10 Kweyi oyoleho ko omweta ta ajigwo nu. Inyiwo gyokwu ya yu bye emu, fa bwi iso wa gbo ikweyi ko okwu oye ipu ke eta ka awishu kpo okpa ki inyo. 11 (Iye ki inyiwo mani wo <<Olono.>>) Agbabo ki inyo ni pya lono, ase nwashika ni gwinyo mani gekwu, ikweyi koni opya lono ni.

12 Ebeni oyoleho ko omene ta ajigwo nu. Oye ipu ke eta ke eno kpo oya kpi inyiwo yishi, oye ipu ke eta ko yoyu wa dibu; oye ipu ke eta ke eno kpo otu pya webe dibu. 13 Ebeni nshoko nmeto ya wu iso, ya kela kpo oko nyakwu kamo, <<Ebi! Ebi! Ebi mani ya lemoji dase kese, ishini ashini ka ayoleho eta wa ta ajigwo wa!>>