1 Oyoleho ko Owuso ki shiyami ishu kinyo ko olayi, ya kye byo oza ni ya yu ni, kweyi yawa bwo obe ko Owuso kpako Oyi ko Otukpo 2 kweyi oya pe go otutehe ko owe ko ogya nyakwu mani. Agbabo ki ishu kpiri gbe efu ko olayi, ni ya gwa igbi igwepa ipu ki ishayi ni; igboye ipu koya; kweyi efu nu ya dase ko okpagye kpiri ogege. 3 Ojije ni Owuso yokwunu ni yayo ogya nyakwu mani lo.

Obe ko Owuso kpako Oyi ko Otukpo ya yogya nyakwu mani, kweyi ayole nu ba geyagye danu. 4 Aba miyi nu, kweyi aba yi iye nu ta ogo wa. 5 Otu ya yaba kelo, kweyi aba doka koyoyu ke eno kwe emu kelo, ikweyi koni Adole Owuso ya wo oyoyu wa, kweyi aba kpogwu byo ose ko gbogbo-gbogbo.

6 Kweyi oyoleho ko Owuso kadami mo, <<Ela mani wokwokwoshi ni ase ya yotuso ni. Kweyi Adole Owuso, ni da awinobane Omaku, to oyoleho nu oleho ko sha ayole nu oza ni ya wa gbodagye ipu kishi gbayayi ni.>>

7 Oyesu kamo. <<Ala pwo! Nyya wa papa! Otunehe yo kpa awase ni geyagye dela ni abane ipu kokpa mani!>>

8 Ami, Oyohana, npwo ki mawoza mani kpiri. Ishini npwo ki muwa kweyi ni, ngbo okpagye ikpo ko oyoleho ni shami awoza mani, kweyi nyyimu ko geyagye danu. 9 Oke kadami, <<Kaya lo! Nwwo oyole bya awo kpa ayene wo awobane kpa awase ni ba geyagye dela ni yipu kokpa mani la. Geyagye do Owuso!>> 10 Kweyi oka dami mo, <<Ka yela ni abane ipu ko okpa mani yi teba lo, ikweyi koni ishi ya ya wa ni awoza mani ba gbodagye ni. 11 Aseni yayo obibi na gohobu ko yobibi, kweyi ase ni ya yoza kobwa na gohobu ko yoza kobwa; ase ni yayo oneshi na gohobu ko yo neshi.>>

12 Oyesu kamo, <<Ala pwo! Nyya wa papa! Abola hin yo kpami, ko dananoho ikweyi koza ni oya ni. 13 Ami wi ikyikyo kpo ogwejeji, ami wo okwotu kpo ongmeyi.>>

14 Otunehe yo kpa awase ni yoshiye wa na neshi ni, agboshu ko ho ogwogwa kefu ko olayi kweyi aba gipu kogya nyakwu bwofunu oba. 15 Ese ko ogya nyakwu ke wawo romeme kpa awo yabodiyi, awobeba kpa awongmase, awogeyagye deka kpa awokokame ebe kela koka kpoza yoya wa.

16 <<Ami, Oyesu, nto oyoleho hin oleho ko kawoza mani dala oda Owuso. Nwwoyi ki ipwoma ko Odawuda; ami winyiwo kotukpokyi ni ya yu ni.>>

17 Omaku kpo Onyape kamo, <<Wa!>>

Kpiri kase ni pwela mani ki ba kamo, <<Wa!>>

Wa, ase ni igyini ya ngmo; na nyeshi kinyo ko olayi, ase kpiri ni yimu.

18 Ami, Oyohana, nyya pya nanoho ni pwela ko bane ko okpa mani akpaha: ase ni foje manu, Owuso ya fowe ke ebi ni aka ipu ko okpa mani manu dawa. 19 Ase ni ngmo oje bwipu kela ko okpa kobane mani, Owuso ya ngma bwipu ko gwogwa kefu ko olayi ni aba gbingbo ni kpo Ogya ko Owuso, ni akela nu ipu ko okpa mani.

20 Aseni yolobene nu ikweyi kawoza mani ya kamo, <<Olemani kwokwoshi! Nyya wa papa!>>

Nalemani. Wa, Adole Oyesu!

21 Nyya beshi ka Adole Oyesu na yo kpase kpiri. Nalemani!