1 Ebeni oye ipu ka ayoleho ahapa ni gba ake ahapa ni wa tami kweyi kamo, <<Wa, nyya shiya awo owe ni aba da agbaza ni agyo ni, ogya nyakwu ni ama kwi ishu nwashika ni. 2 Awose kese ba beba kpa anu, kweyi ase kese ba ya kpi inyi keba boba nu.>>

3 Omaku ko Owuso kpumogwu, kweyi oyoleho byun go ododa. Ebeni nmo onya ni yagye ikweyi ko obekwu nowa ni gbe enena ki iye kesa sosa ko Owuso ni ata ikpiye nu kpiri ni. Obekwu oni gbi ikweyi ahapa kpa agyi igwo. 4 Onya mani shoshiye inyi ki ishikpuru kpo onowa kweyi ikpiye nu kpiri wo ozinariya, akyo-neshi kpa awekye ni gbakwekye ni. Obya abwa nwonwu kpo ozinariya kpo ozalabi kpa awoza kobwa, ikweyi ke eba boba nu. 5 Ogo nu atiye ni gbase leba ni mo: <<*Obabila Nyakwu, ene ka agbaza kpiri kpi ino gyese egya kpiri.>> 6 Kweyi nmo onya mani ya kpo oyi kase ko Owuso kpo oyi kase ni ayuwa ngmo ikweyi koni ayo olobene ko Oyesu ni.

Ishini nmo ni, igbashi yun kwu kotata. 7 Oyoleho dumoka mo, <<Oji ya ni igbashi yo kwu?>> Nyya kase teba ko onya mani kpa ako obekwu ni zo ni dawo, obekwu ni gbo ikweyi ahapa kpo agyi igwo ni. 8 Obekwu ni oma ni gbo olayi ishi oye, anani oke gbo olayi kelo; owa bwipu ko ogo ni gbomeyi lo ni kweyi oya ga koni aba ga yo ngmo ni. Awase ni bese ni atiye wa ipu ko okpa ko olayi ome ana yese lo ni, igbashi ya yuwa kwu ishini amo obekwu ni. Ishi oye ogbo olayi; anani ogbo olayi kelo, oke ki ya kwikye yawa.

9 <<Ase ni wine koziyi kpogyogye oya gyikweyi kela mani. Ikweyi ahapa oni wi ikpokyi ahapa, ni onya mani yagye ikweyi wa ni. Aki gba awose ahapa: 10 eho ipu wa kwobonu gbo wa, oye tayayo ya kpogwu, oye ke wa walo; ishini owa owotiri koni oya kpogwu kishi gbayayi ni. 11 Obekwu ni gbo olayi ishi oye ni, anani oke gekwu, anu abiyinu wose ko omwahata ni woye ipu ka ahapa, oya gebe ni aba yo ngmo ni.

12 <<Agyi igwo ni omani wa awose igwo ni kwotu ko kpogwu walo ni, ake ba dawo oshu ko kpogwu byo ose ki ishi gbayayi kpo obekwu. 13 Awose igwo mani kpiri oza ni yotu wa wo oye kponu, ayo oshu wa do obekwu. 14 Aba nonu kpo Oyi ko Otukpo, Oyi ko Otukpo ke kpa awase ni ashu ni kpe ewa kotu nu ni gbotuse ni ba gwawose mani agye, ikweyi koni owa Adole ka awadole kpo Ose ka awose.>>

15 Oyoleho ki ka dami mo, <<Inyo ni oma agbaza yagye anu oni, wa awokpagye kpiri, ase kpiri, ikpo kase kpiri, kpi igbenu kpiri. 16 Awagyi igwo kpo obekwu ni oma ni ba yimu ka agbaza lo; aba yoza kpiri ni ogbo ni yikpo, aba shobita ewewa; aba yebe kikpiye nu ha kweyi yoyi kpo ola. 17 Koni Owuso ya awose mani kpiri ko yela oye kponu kweyi kyogwu ko yoshu wa do obekwu mani, aba ya mani gbishini oza ni Owuso kani wa gbodagye.

18 <<Onya ni omani wogya nyakwu ni kpogwu ka awose kese mani.