1 Itikpi ko omani, npwo oje byo oko kewa kasuse ipu ki iso ya kamo, <<Sho Owuso iye! Ongmongma, igyashi, kpo oshu wako Owuso ka! 2 Epwo koka nu wokwokwoshi kpo otata! Oya gbaza ni yese bya kpe eba boba nu ni yi ngmo. Owuso gbo ogo agye ikweyi koni ongmo ayoleho nu ni.>> 3 Aki sheha mo, <<Sho Owuso iye! Iwola bwi igbenu kola ni yo ogya nyakwu yola ni gi iso ko gbogbo-gbogbo!>> 4 Anyakwase awepa ayene kpo oza ni gbo olayi ene kwagye ba geyagye do Owuso, ni yo obe ni. Akamo, <<Sho Owuso iye! Nalemani!

5 Ebeni oko kela bwo obe kamo, <<Sho Owuso ka iye, kpiri ka ayole nu kpase kpiri, ayileke kpa anyakwase ni gboshi nu ni!>> 6 Ebeni npwe eye ko oko kewa kasuse, bye eya ki inyo ni ya shonu ni, bye eya ka akpula ni ya gbo ni. Npwu wa ba kamo, <<Sho Owuso iye! Adole Owuso ka, Ine koshu kpiri, wo Ose! 7 Ahan yeye kpo otunehe; ahan shi igyashi nu iye! Ishi gye ki imya ko onyape ko Oyi ko Otukpo, kweyi onyape kyi iyinutu ya gbeyi nu. 8 Aba danu opa nehe ko shoko.>> (Opa nehe mani woza neshi yoya kase ko Owuso.)

9 Ebene oyoleho ka dami mo, <<Ta awoza mani: Otunehe yo kpa awase ni apawa ko gi imya ko onyape ko Oyi ko Otukpo ko Owuso.>> Kweyi oyoleho ki kamo, <<Omani wela ni wa bwebe ko Owuso kwokwoshi.>>

10 Nkwagye obutu nu ko geyagye danu, anu ke ka dami mo, <<Ka ya mani lo! Ami wo oyole bya awo kpa ashini ka awogboso, awase ni gbo kwokwoshi ni Oyesu sayi dawa ni. Geyagye do Owuso!>>

Koni okwokwoshi ni Oyesu sayi ni woza ni da awinobane oshu ni.

11 Ebeni nmi iso gwa, kweyi nmo onya nehe. Inoso ayogwu mo otuse kpo okwokwoshi; oya kepwo nu kpo okwokwoshi kweyi oya kpefu nu. 12 Iyi nu gola byi igbenu ko ola, kweyi olo otu nwashika ikweyi nu. Atiye ikpiye nu, ashishe gyikweyi kiye ni lo, anu fufunu pini gye la. 13 Oshiye ni oshu ni gbo oyi nwashika. Aba yogwu mo, <<Ela ko Owuso.>> 14 Awadakare ki iso ni sonya nehe kweyi gboso, asho oshiye nehe purututu. 15 Ewakpa rore, ni oya yo oko kpa anu ko kpefu ro okpagye shishini bose okwunu nu. Oya kpuwogwu kpo otu obibi nu, kweyi oya pyinyi obutu ko Owuso, inyi ka anya Owuso ine koshu kpiri. 16 Oshiye nu kpa atakwu nu otiye anu mo: <<Ose ka awose kpa Adole ka awa Adole.>> 17 Ebeni nmo oyoleho hagye ikweyi ke eno. Kweyi osheha ya awigbano kpiri ni bawu ni ogwu mo: <<Ala wa wa gbayi ko roza nyakwu ki imya ko onyape ko Owuso! 18 Ala wa hebe ka awose, awokpogwu, kpo awadakare, ebe ka awonya kpa awosonya, ebe ko oshe kpase ni woshe lo ni, anyakwase kpa ayileke!>>

19 Ebeni nmo obekwu kpa awose kese kpo awadakare wa ni gbayi kpefu kpase ni sonya kpo adakare nu ni. 20 Ayo obekwu yikwu shetu kpa awobane ko okame ni yi igbashi obutu nu ni. <<Oyoko kpi igbashi nu mani kweyi gya awase ni amyuwa enena ko obekwu egya kpa awase ni geyagye do oyi ko obekwu ni.>> Obekwu kpo awobane ko okame atuwa kpo olayi shibwu ko ola ni ya kye kpe ehola ni. 21 Aya ashini wa ngmo kpe ewakpa ni bwo okwunu kase ni sonya ni. Awigbano kpiri hebe wa byo ni aba gege ba ha ni.