1 Ebeni nmi iso pepe kpe ese pepe. Iso kikyikyo kpe ese kikyikyo gebi, ishu gebi. 2 Nmo Ogya Neshi, Ojerusele pepe, bwi iso ebe ko Owuso ya wokpagye, akyanutu kweyi gwagya byo onyape ni ya gbeyi kobu nu ni. 3 Npwo oko nwaa ya kela bwo obe kamo: <<Anani ole ko Owuso yo kpa asuse! Oya yagye kpawa, kweyi awa ba wase nu. Owuso abiyinu yayo kpawa, anu ya wo Owuso wa. 4 Oya wuwize kpiri iyi. Ikwu ya yaba kelo, otu byobya kwe egba kyokye kwo odose ya yaba kelo, oza nekye kwobonu shigbo wa.>>

5 Aseni yo obe ni kamo, <<Kweyi anani nyyojoji ya wo pepe!>> Oki ka dami mo, <<Toza mani, ikweyi koni ela mani wo kwokwoshi ni ase ya gege ya yotu so ni.>> 6 Okamo, <<okweyi wa! Nwwi kikyikyo kpo ogwejeji, okwotu kpo okweyi. Aseni ni igyini ya ngmo kpiri nyya danu inyo niwa bwibwu kinyo ko olayi ni oya sore lo ni. 7 Awase ni rogwa aba pyoza mani bwebe hin, nyya wo Owuso wa, aba wayi hin. 8 Awino yoshi ke, awo yase ra, awo romeme, awongmase, awobeba, awo yabodiyi, awo geyagye deka kpawo kokame kpiri, ebewa wibwu ni wikwu ko omwepa ni.>>

9 Oye ipu ka ayoleho ahapa ni gba ake ahapa, ni nwonwu kpe ebi ahapa ni webe hin kweyi kamo, <<Wa, nyya shawo onyape, onya ko Oyi Ko Otukpo.>> 10 Omaku kpumogwu, kweyi oyoleho zun giso ke efu ni wirikpo kotata ni. Oshami Ojerusele, Ogya Neshi, bwi iso ebe ko Owuso ya wokpagye 11 yayu kpigyashi ko Owuso. Ogya nyakwu oni ya yu byo Ojaspa, oya yu byo okpo nehe. 12 Ogbo okpe nyakwu ni wirikpo ni kweyi gbo owe kofunu igwepa kpa ayoleho igwepa ni ba gbeho ko owe ni. Atiye ka awipwoma igwepa ki Izrayila awowe kofunu oni. 13 Owe kofunu eta ba agbabo wonyonya, eta agbabo ka ahanokyi, eta agbabo ko onose, eta agbabo kikpokyi, eta agbabo ke ekye. 14 Amo okpe ko ogya nyakwu mani ikweyi kikyikpo igwepa kotu koda, ni atiye ka ayikoko ko Oyi ko Otukpo ikweyi wa ni. 15 Oyoleho ni ya kela dami ni gbo okposhi ko myoza ko ozinariya ko myo ogya nyakwu, kpa awofunu nu kpa agaya nu. 16 Ogya nyakwu mani gyogye agbabo kpiri, byoni ogwogwa nu kpikpo nu gyogye ni. Oyoleho myo ogya nyakwu mani kpo okposhi ko myoza nu. Ikpo nu wo omeli okpaku oye so ogbogbo epa, kogwogwa nu, ki ikpo nu kpiri woye kponu kpi igbo nu. 17 Oyoleho ki mya agaya, Ogiso nu wi ikpo ogbogbo epa si igwihiri, bwebe ko myoza kasuse ni oyoleho ya yoko kpanu ni. 18 Ama agaya nu kpo ojaspa, ogya nyakwu mani abiyinu ke amo kpo ozinariya, ya yu byi iyimebe. 19 Ikyikpo kotu ko okpe ko ogya mani agwagya kpe edo kikyikpo neshi wonyonya. Ikyikpo kikyikyo ni akwotu koda ni wo ojaspa, ko omwepa wo osafaya, komweta wa agate, ko omene we emera, 20 ko omeho wo oniksi, ko omwihiri wo okaneliyan, ko omwahapa wo okwas inyikayi, ko omwahata wo oberil, ko omwahane wo otopaz, ko omwigwo wo oshalsadoni, ko omwigwoye wo otokwoyis, ko omwigwepa wa ametisi. 21 Awofunu igwepa mani we ekye igwepa ni gbakwekye ni; ofunu wonyonya ayo kpe ekye oye. Owe ko ogya nyakwu mani ayo kpo ozinariya, ni ya mebe byi iyimebe ni. 22 Nmole ko Owuso ipu ko ogya nyakwu mani lo, ikweyi koni ole ko Owuso nu wa Adole Owuso Ine koshu kpiri kpo Oyi ko Otukpo. 23 Ogya nyakwu mani ya yimu keno kwoya koyu anu lo, ikweyi koni igyashi ko Owuso ya yu ipu nu, kweyi Oyi ko Otukpo wi ikwomu nu. 24 Ase kese mani ba yawu kpo oyoyu nu, awose kese mani ba byo odu wa wipu nu. 25 Opunu ko ogya nyakwu mani ya gwogwa eno kpiri; aba yogwu lo, ikweyi koni otu yaba ebeni lo. 26 Aba byi igyashi kpo odu kokpagye kpiri wipu ko ogya nyakwu oni. 27 Ozani ke gbinyi oya gipu ko ogya nyakwu mani lo, kwe ase ni yoza kiweyi kwi ino kokame. Awase ni atiye wa ipu kokpa ko olayi ko Oyi ko Otukpo ni pini ba gipu ko ogya nyakwu mani la.