1 Ezɨ dughiar kamɨn Aisak ghurigha an damaziba ikufi. Ezɨ a uan otarir ekiam Ison diazɨ a izima an a mɨgɨa ghaze, "Nan otarim."

Ezɨ Iso a ikaragha ghaze, "Kɨ kati."

2 Ezɨ Aisak ghaze, "Nɨ nan gan, kɨ bar ghurigha ovengamin dughiam bar roghɨra ize. 3 Kamaghɨn nɨ uan asɨziba burir barir pim ko bariba inigh ruarimɨn mangɨ, egh na bagh asɨzitam batogh a mɨsokegh. 4 Egh na bagh asɨzim isamigh dagher aghuir kɨ ifongezim inigh na bagh izɨ. Eghtɨ kɨ anemegh deravɨra nɨ damigh egh gɨn ovengam."

5 Ezɨ dughiar kamɨn Aisak Iso mɨgeima Rebeka oraki. Ezɨ Iso asɨzibar amuasa ghuzɨ, 6 Rebeka kamagh Jekop mɨgei, "Kɨ datɨrɨghɨrama orazi, nɨn afeziam kamagh Iso mɨgei, 7 nɨ na bagh asɨzitam inigh izɨ na bagh a isamigh. Eghtɨ kɨ aneremeghɨva, Ikiavɨra Itir Godɨn damazimɨn deragh nɨ damighvɨrama, egh gɨn ovengam."

8 Egha Rebeka maghɨra kamaghɨn mɨgei, "Nan otarim, nɨ na baregh egh bizir kɨ nɨ mɨkɨmamim na damu. 9 Nɨ mangɨ memen igiar pumuning inigh izɨ, eghtɨ kɨ aning isamighɨva nɨn afeziam bar ifongezɨ moghɨn a bagh dagher aghuiba isamam. 10 Eghtɨ nɨ a inigh uan afeziam bagh mangɨtɨ an anemam, egh deragh nɨ damighvɨrama, gɨn ovengam."

11 Ezɨ Jekop kamagh uan amebam mɨgei, "Nɨ kamagh fo Iso a gumazir arɨzɨvatarim, ezɨ nan mɨkarzim arɨzɨvatarizir pu. 12 Nan afeziam nan suighsuigh egh fogham, kɨ a gifari, egh a deravɨra na damuan fɨrɨn, a ua na gasɨghasigham."

13 Ezɨ an amebam ghaze, "Nan otarim, nɨ, kɨ nɨ mɨgei moghɨn damu. Egh mangɨ na bagh memening inigh. Bizir nɨ gasɨghasɨghamba, da nɨ giran kogham, da na giram, nɨ puvatɨ."

14 Ezɨ a ghua aning inigha egha iza uan amebam ganɨngi, ezɨ Rebeka an afeziam damasa bar ifongezɨ moghɨrama a dagheba isai. 15 Rebekan otarir ekiam Iso, a faragha uan korotiar aghuiba isa amebamɨn purirpenim gatɨzɨ da iti. Ezɨ datɨrɨghɨn Rebeka da inigha uan otarir dozim Jekop gaghui. 16 Egha a memen igiabar arɨziba an agharibagh arigha, an tuemɨn danganir arɨziba puvatɨzibagh aghui. 17 Egha Rebeka dagher isɨngtɨzir kaba ko bretɨn tueziba isa Jekop ganɨngi.

18 Ezɨ Jekop uan afeziam bagha ghuava an dɨa ghaze, "Afeziam!"

Ezɨ an a ikaragha ghaze, "Nɨ otarim manam, Iso o Jekop?"

19 Jekop a ikaragha ghaze, "Kɨ nɨn otarir ivariam Iso. Kɨ nɨ mɨkemezɨ moghɨrama amigha gɨfa. Ezɨ nɨ dɨkavigh kɨ nɨ bagha inigha izezir asɨzim amegh egh deragh na damu."

20 Ezɨ Aisak ghaze, "Nan otarim, nɨ manmaghɨra zuamɨra asɨzir kam bato?"

Ezɨ Jekop ghaze, "Ikiavɨra Itir God, nɨn God nan akurazɨ kɨ a bato."

21 Ezɨ Aisak a mɨgɨa ghaze, "Nɨ nan boroghɨn izɨtɨ, kɨ nɨn suighsuigh foka, nɨ guizbangɨra Iso, o puvatɨ?"

22 Ezɨ Jekop sɨvagha uan afeziamɨn boroghɨn ghu, ezɨ an an suigha ghaze, "Nɨn tiarim a Jekopɨn tiarimɨn mɨrara mɨgei, ezɨ nɨn aghariba kɨ dar suigha dar barazi, da mati Ison aghariba."

23 Ezɨ an aghariba Ison agharibar mɨn arɨzɨvatari, ezɨ Aisak kamaghɨn fozir pu, kar Jekop. Kamaghɨn amizɨ a deragha a damuasa, 24 egha uam an azara, "Nɨ guizbangɨra Iso, o puvatɨ?"

Ezɨ Jekop a ikaragha ghaze, "Are, kɨrara."

25 Ezɨ Aisak ghaze, "Nɨ na bagh asɨzitaba inigh izɨ. Kɨ damegh gɨvagh egh arazir aghuimɨn nɨ damuam."

Ezɨ Jekop asɨziba a ganigha egha wainɨn dɨpar maba sarama a ganɨngizɨ an api.

26 Ezɨ an afeziam a mɨgɨa ghaze, "Nan otarim, nɨ nan boroghɨn izɨ nan toregh."

27 ✝ 27:27-29 Hibru 11:20 Ezɨ an an torima Aisak an korotiabar mughuriam baregha deravɨrama a gami. Egha ghaze:

"Aia, nan otarimɨn mughuriam

mati dagher azenimɨn mughuriam!

Azenir kam deraghasa

Ikiavɨra Itir God deraghavɨram a gami.

28 Kɨ Godɨn azai, a dɨmagaribar ghuariabar dɨpabar amutɨ

da izighirɨ nɨn azenibagh izɨtɨ da aghung dagher avɨriba ikɨ.

Kɨ an azai, a wit ko wainɨn avɨriba nɨ danɨng.

29 ✝ 27:29 Jenesis 12:3 Kɨ kamaghɨn Godɨn azai, nguazimɨn itir gumazamiziba

nɨn ingangarir gumazibar mɨn ikiam,

eghtɨ kantrin mabar gumazamiziba nɨn apengan ikiam.

Eghtɨ nɨ uan aveghbuaba me gativagh men ganam.

Eghtɨ nɨn amebamɨn ovavir boriba nɨn apengan ikiam.

Eghtɨ gumazir paza nɨ damuasa Godɨn azangsɨziba,

kɨ kamaghɨn Godɨn azai, eghtɨ a me gasɨghasigham.

Eghtɨ gumazir deragh nɨ damusɨ nɨ bagha Godɨn azangsɨziba,

kɨ kamaghɨn Godɨn azai, a uaghan deraghvɨram me damuam."

30 Ezɨ Aisak deragha Jekop gamizɨ, a zuima, dughiar kamra an avebam Iso asɨzibagh amigha uamategha izi. 31 Egha a uaghan dagher isɨngtɨzir mabagh amigha uan afeziam bagha da inigha izi. Egha ghaze, "Afeziam, nɨ dɨkavigh daperagh asɨzir kɨ nɨ bagha inigha izir katabar ameghɨva, deraghvɨra na damu."

32 Ezɨ Aisak an azara, "Nɨ tina?" Ezɨ a ghaze, "Kɨ nɨn otarir ivariam Iso."

33 Ezɨ Aisak dɨgavir kuram gamigha an mɨkarzim nɨgha, an azara, "Ezɨ kar ti tinara faragha asɨzir mam mɨsuegha na bagha a inigha ize? Ezɨ kɨ anemegha gɨvazɨ nɨ oto. Ezɨ kɨ deragha a gamigha gɨfa, eghtɨ da a ko ikɨ mamaghɨra ikiam!"

34 Ezɨ Iso kamaghɨn oregha, a bar puvɨram azia ghaze, "Afeziam, uaghan deragh na damigh!"

35 Ezɨ Aisak a ikaragha ghaze, "Nɨn dozim iza na gifarazɨ kɨ deraghavɨram a gami."

36 ✝ 27:36 Jenesis 25:29-34 Ezɨ Iso ghaze, "A faragha na gifaragha, datɨrɨghɨn ua na gifara. Ezɨ an ziam Jekop.*27:36 Hibrun akamɨn, ziar kam Jekop, mong akar kamɨn mɨrara ghu, "An danganim ini." Ziar kam Jekop an amir arazibar mɨrara ghu. A faragha kɨ otarir ivariamɨn mɨn itir danganim na dama a ini, egha datɨrɨghɨn nɨ gifarazɨ nɨ deragha a gami. Ezɨ Afeziam, manmaghɨn ami, nɨ deraghvɨra na damuamin bizitam ua ikɨtɨ, nɨ a inigh na danɨngigh?"

37 Ezɨ Aisak a ikaragha ghaze, "A nɨ gativaghamin gavgavim kɨ a ganigha gɨfa, egha kɨ ghaze, nɨn adarazi bar an ingangarir gumazibar ikiam. Egha kɨ witɨn avɨriba ko wainɨn avɨriba a ganigha gɨfa. Ezɨ nan otarim, kɨ datɨrɨghɨn nɨ bagh damuamin biziba bar puvatɨ."

38 ✝ 27:38 Hibru 12:17 Ezɨ Iso uan afeziam mɨgɨavɨra ikia ghaze, "Nɨ ti bizir aghuir vamɨra iti? Nɨ God ko mɨkɨmtɨ, a uaghan deragh na damigh." A kamagh mɨgɨa egha bar puvɨrama azi.

39 ✝ 27:39-40 Hibru 11:20 Ezɨ Aisak a mɨgɨa ghaze:

"Nɨn nguibam,

nguazir dagher aghuiba itibar saghon ikiam.

Eghtɨ dɨmagaribar ghuariar dɨpaba

nɨn azenibagh iran kogham.*27:39 Hibrun akam deragha mɨgɨrɨgɨar kamɨn mɨngarim abɨghizir puvatɨ.

40 ✝ 27:40 Jenesis 36:8; 2 Atriviba 8:20 Egh nɨ uan mɨdorozir sabamɨn amodoghɨn mɨsogh daghebar amɨ,

egh dabirabir aghuim buriam.

Egh nɨ uan dozimɨn apebamɨn ikiam.

Egh gɨn nɨ uabɨ abigh egh an apengan ikian kogham."

41 Iso fo, Jekop ifarazɨ, Aisak deragha a gami. Ezɨ bizir kamɨn Iso osemegha Jekopɨn apanimɨn iti. Egha nɨmɨra ghaze, "Nan afeziam ovengamin dughiam roghɨra izi. An oveghtɨ e anefaghɨva, an ikegh gɨvaghɨva, kɨ Jekop mɨsueghtɨ an aremegham."

42 Ezɨ Rebeka Ison mɨgɨrɨgɨar kam baregha, Jekop bagha akam amadagha ghaze, "Nɨ orakigh, nɨn avebam Iso bar nɨn osemegha ikarvagham tuavim buria, nɨ mɨsueghtɨ nɨ aremeghasa nɨghnɨsi. 43 Kamagh amizɨ, nan otarim, nɨ kɨ nɨ mɨgei moghɨra nɨ bizibar amu. Nɨ zuamɨra dɨkavigh nan tuebam Labanɨn bighan Haranɨn nguibamɨn mangɨ, 44 egh a ko ikɨ mangɨtɨ nɨn avebamɨn navim mar amɨragh. 45 Eghtɨ a nɨ a gamizir bizir kam gɨn amadaka. Eghtɨ gɨn kɨ gumazitam amadaghtɨ a nɨ bagh izɨ ua nɨ inigh izam. Guizbangɨra, nan otarimning dughiar vamɨran ovengan kɨ aghua."

46 Ezɨ Rebeka Aisak mɨgɨa ghaze, "Kɨ Hitian amizir Ison itir kamningɨn aghua. Egh kɨ ti oveghtɨ Jekop uaghan Hitian amizir roghɨra itir katamɨn ikɨtɨ deragham."