1 ✝ 53:1 Jon 12:38; Rom 10:16 Ezɨ gumazamiziba akam ikaragha ghaze,

"Tinara datɨrɨghɨn, e orazir akaba nɨghnɨzir gavgavim adar iti?

Terara, Ikiavɨra Itir God, uan ingangarir gavgaviba isa men akazɨ,

me dar gani?

2 ✝ 53:2 Aisaia 11:1; 52:14 Guizbangɨra, Ekiam uan ingangarir gumazim ataghizɨ,

a mati temer mam nguazir mɨsɨngizimɨn oto.

Ingangarir gumazir kam, an ganganim tong en damazibar derazir puvatɨ,

kamaghɨn amizɨ, a ziaba puvatɨ.

Ezɨ bizir aghuitam an itir puvatɨ, eghtɨ e an ganɨva a gakongam.

3 ✝ 53:3 Matyu 27:30-31 Ezɨ gumazamiziba akɨrim ragha a gasaragha, pazavɨra a gamua bar a gifongezir puvatɨ.

Ezɨ mɨzaziba ko osɨmtɨzir avɨriba a gizɨfa.

Gumazamiziba an ganan aghuagha, uan guaba monge.

Egha akɨrim ragha bar a gasara.

Ezɨ e an gara ghaze,

a pura gumazir kɨnim.

4 ✝ 53:4 Matyu 8:17; 1 Pita 2:24 "E nɨghnɨgha ghaze,

God ti ivezir kuram a ganɨga, a mɨsogha osɨmtɨzir kabagh amizɨ, da a batifi.

Ezɨ puvatɨ.

Ingangarir gumazir kam, e bagha en osɨmtɨziba ko mɨzaziba isa da ateri.

5 ✝ 53:5 Rom 4:25; 1 Korin 15:3; Hibru 5:8; 1 Pita 2:24 Ezɨ en akaba batozir arazim bagha, me an ekianim bɨra.

Arazir kurar e amiba bangɨn, me a dɨkabɨragha a gasɨghasɨki.

Egha me puv a mɨsozima an mɨkarzim tintinibar bɨaghire,

mɨzazir a inizir kam e gamizɨ, e ghuamaghegha ua deragha bar deravɨra iti.

6 ✝ 53:6 Aisaia 53:11; Aposel 13:38-39; Rom 5:15; 5:18; 1 Pita 2:25 Guizbangɨra, e bar moghɨra sipsipbar mɨn tintinibar arua,

vaghvagha uan ifongiabar gɨn arui.

Ezɨ Ikiavɨra Itir God, en arazir kuraba ikarvaghsɨ pazavɨram e damuan fɨrɨn,

a kamaghɨn amizir puvatɨ.

A uan ingangarir gumazim gamizɨ,

a en danganim inizɨ, e iniamin mɨzaziba, an ada isa a ganɨngi."

7 ✝ 53:7 Matyu 26:62-63; Mak 15:3-5; Luk 23:9; Jon 19:9; Akar Mogomem 5:6 ✝ 53:7-8 Aposel 8:32-33 Gumaziba ingangarir gumazir kam pazav a gami,

ezɨ a uabɨ dɨkabɨra mɨzazir kuram ini.

Egha mɨgɨrɨgɨar tam gamizir puvatɨ.

A mati sipsipɨn nguzim uan akam dukuazɨ,

me a mɨsueghtɨ an aremeghasa a inigha zui.

Egha uaghan mati sipsip me an arɨziba aghorasava amima,

a bizitam mɨgeir puvatɨ.*53:7 Fofozir gumaziba deragha fozir puvatɨ, tinara akar ves 7-9ɨn itimɨn mɨkeme. Marazi ghaze, Ikiavɨra Itir God mɨkeme. Ezɨ marazi ghaze, gumazamiziba mɨkeme. Ezɨ marazi ghaze, kar Godɨn akam inigha izir gumazimɨn akam.

8 Ezɨ me guizɨn arazim oteghavkɨnigha, puram a isa kalabus gatɨgha, a inigha kotɨn ghu,

ezɨ kot a mɨgɨa ghaze, an aremegham.

Ezɨ me a mɨsoghezɨ an areme.

Egha an adarazir tav kamaghɨn nɨghnɨgha fozir puvatɨ,

a men danganim inigha mɨzazir me uari iniamin an a ini,

egha en arazir kuraba gɨn amangasa areme.*53:8 Hibrun akam deragha ves 8ɨn akar avɨrir mabar mɨngariba abɨghizir puvatɨ.

9 ✝ 53:9 Matyu 27:57-60; 1 Pita 2:22 Ezɨ me an kuam isa gumazir arazir kurabagh amiba ko, dagɨar avɨriba itir gumaziba ko anefa.

Ezɨ e fo, a uabɨ arazir kuratam gamizir puvatɨ,

egha a uaghan ifavarir akatam mɨkemezir puvatɨ.

10 ✝ 53:10 Onger Akaba 22:30; Jon 1:29 Ezɨ Ikiavɨra Itir God, uabɨ uan ifongiamɨn gɨn ghua

uan ingangarir gumazir kam dɨkabɨragha a gamizɨ, a mɨzazim isi.

A fo, ingangarir gumazim gumazamizibar arazir kuraba gɨn amangɨsɨ,

osɨmtɨziba agɨvamin ofan mɨn uan mɨkarzim anightɨ, an ikɨrɨmɨrim bar ruaraghtɨ, a uan ovavir boribar ganam.

Egh ingangarir an amim, Ikiavɨra Itir God ingarasa ifongezir araziba, a dar amuam.

Egh a bizir kabar amutɨ, da deraghvɨram otivam.

11 ✝ 53:11 Aposel 13:38-39; Rom 5:15; 5:18 Ezɨ osɨmtɨzir ekiar an aterezir kamɨn gɨn, a bizir bar aghuibar gantɨ da otivam,

eghtɨ a bar akuegham.

Ezɨ Ikiavɨra Itir God kamaghɨn mɨgei,

"Nan ingangarir gumazir nan damazimɨn derazir kam, a deraghavɨra na gɨfo.

Egha a gumazamizir avɨribar arazir kuraba ateri,

egh arazir kamɨn a me damutɨ, me nan damazimɨn derazir gumazamizibar otivigham.

12 ✝ 53:12 Aisaia 50:6; Mak 15:28; Luk 22:37; 23:34; Rom 3:25 "Kamaghɨn amizɨ, gumazamiziba an gari, a mati gumazir kuram.

Egha a gumazamizir avɨrimɨn arazir kurabar osɨmtɨziba atera, uabɨ isa me bagha areme.*53:12 Akar faraghavɨra 53:12ɨn itim, gumazir maba ghaze, e kamaghɨn a giragham, "A gumazamizir arazir kurabagh amibar danganim inigha me iniamin osɨmtɨzim an a ini."

Egha a gumazamizir arazir kurabagh amibar akurvaghasa God ko mɨgei.

Kamaghɨn amizɨ, kɨ gumazir gavgavir bar ekiaba itibar tongɨn, ziar ekiam a danɨngam.

Egh mati mɨdorozir gumazir gavgaviba, uan apaniba dɨkabɨragha men bizir aghuariba inigha,

da tuisɨgha uan adarazigh anɨngizɨ moghɨn,

kɨ bizir aghuiba isɨ a danɨngam."*53:12 Ves 53:12, an akar namba 2, gumazir maba ghaze, e kamaghɨn a giragham, "Kamaghɨn amizɨ, kɨ gumazamizir kaba isɨ a danɨngam, mati bizir a mɨdorozim gafiragha iniziba. Egh a dagh ativagh dar ganam."