Aisaia 62

Jerusalem ziar igiam ini

1 Kɨ Saionɨn nguibam bagh zurazurara Ekiam mɨkɨmvɨra ikɨtɨ,

a deravɨra a damuam.

Guizbangɨra, kɨ Jerusalemɨn nguibam gɨnɨghnɨghvɨra ikɨ,

kamaghɨn kɨ uan akam dukuaghan kogham. Bar puvatɨgham.

Egh kɨ Ekiamɨn dɨmvɨra ikɨ mangɨtɨ, arazir aghuimɨn dughiam Jerusalemɨn gumazamiziba batogham,

mati aruemɨn angazangarim mɨzarazimɨn otifi.

Egh kɨ Ekiamɨn dɨmvɨra ikɨ mangɨtɨ, an akurvazir arazimɨn dughiam Jerusalemɨn gumazamiziba batogham,

mati adenir angazangarim dɨmagarimɨn otifi.

2 Eghtɨ Kantrin Igharazibar Gumazamiziba gantɨ, God Jerusalemɨn akurvagh suam, nɨ nan damazimɨn dera.

Eghtɨ atriviba gantɨ, God gavgavim ko ziar ekiam isɨ nɨ danɨngam.

Egh me ziar igiam nɨ darɨgham,

kar ziar Ikiavɨra Itir God uabɨ nɨ danɨngamim.

3 Jerusalem, nɨ atrivimɨn dapanir asuar kurkazir aghuiba itimɨn mɨn ikiam.

Eghtɨ Ikiavɨra Itir God, ian God, dapanir asuar aghuir kam uan dafarimningɨn an suiragham.

4 Eghtɨ gumazamiziba ua kamaghɨn nɨ dɨponan kogh suam,

"Ekiam nɨ ategha gɨfa."

Eghtɨ nɨn nguazim gumazamiziba ua kamaghɨn a dɨponan kogham,

"Nguazir kam, gumaki, a bar ikuvigha pura iti." Puvatɨ.

Kamaghɨn amizɨ, me kamaghɨn fogham, Ikiavɨra Itir God navir aghuim nɨn ikiava, nɨ bagha bar akonge.

Egh me ziar igiam kamaghɨn nɨ dɨpon suam, "God bar a gakonge."

Ezɨ nɨn nguazim mati amizim, an pam uam a inigha, a bagha bar akonge.

Eghtɨ nɨn nguazim me kamaghɨn a dɨponam, "An amizir pamɨn itimɨn mɨn iti."

5 Eghtɨ nɨn otariba nɨ inigh, nɨ ko deraghvɨra ikiam,

mati gumazir igiam amizir igiamɨn ikia, aning uaning ko deravɨra iti.

Guizbangɨra, nɨn God bar nɨ gakuegham,

mati gumazim igiamra amuimɨn ikia uan amuim gakonge.

6 O Jerusalem, nɨn dɨvazir mɨtiar gavgavibar pɨn, kɨ apaniba bagha garir gumaziba afe,

eghtɨ ganganir gumazir kaba, arueba ko dɨmagaribar uan akabar kumighan kogham.

Kɨ kamaghɨn me mɨkeme,

"Ia Ikiavɨra Itir Godɨn deir gumazamiziba, ia avughsan markɨ.

7 Ia an dɨmvɨra ikɨ mangɨtɨ, a Jerusalem damightɨma,

a uamategh tugh gavgavighamin dughiam otogham.

Eghtɨ dughiar kamɨn, Jerusalem nguazir kamɨn gumazamizibar damazimɨn,

bar pɨn ikiam."

8 Ikiavɨra Itir God akar dɨkɨrɨzim gami,

ezɨ an gavgavir ekiamɨn, an akar dɨkɨrigha mɨkemezim, guizbangɨram otogham.

Ikiavɨra Itir God kamaghɨn Jerusalemɨn mɨgei,

"Kɨ uamategh apaniba ateghtɨma me izɨ, nɨn gumazamizibar witba ko bizir me ingangarir dafam gamuava opariziba inian kogham.

Kɨ ua Kantrin Igharazibar Gumazamiziba ateghtɨ, me izɨ nɨn gumazamiziba ingarizir wainɨn dɨpaba inian kogham.

Puvatɨgham.

9 Nɨn gumazamizibara witɨn anigha gɨvaziba inigh bretbar ingarigh dar amam.

Egh me ziar ekiam Ikiavɨra Itir God danɨngam.

Eghtɨ nɨn gumazamiziba wainɨn ovɨzir andɨziba inigh wainɨn dɨpabar ingaram.

Egh me da inigh nan Dɨpenimɨn dɨvazimɨn aven izɨ, dar amɨva bar akuegham."

10 Ia datɨrɨghɨn Jerusalemɨn itir darasi,

ia zuamɨra bar moghɨra nguibar ekiam atakigh.

Ia nguibam ategh azenan mangɨ,

ia gumazamizir uamategha iziba bagh deravɨra tuavim akɨr.

Ia me bagh deravɨra tuaviba azenɨva,

tuavim apɨrizir dagɨaba isɨ da makun.

Egh Kantrin Igharazibar Gumazamiziba gansɨ,

ia inir avɨzir ababanim asaragh.

11 ✝ 62:11 Aisaia 40:10; Akar Mogomem 22:12 Ia oragh! Ikiavɨra Itir God, kamaghɨn nguazir kamɨn gumazamiziba bar me mɨkemegha ghaze:

"Ia Saionɨn nguibamɨn gumazamiziba bagh mangɨ kamaghɨn me mɨkɨm suam,

‘Ia gan, ian Akurvazir Gumazim, a izi!

A faragha mɨdorozim gamua apanibagh afiragha,

gumazamiziba bizir aghuibar mɨn me inizɨ, me a ko izi.’*62:11 Akar kam gɨghan tuavir igharazir mam kamakɨn, "Egha a bizir aghuiba isɨva uan gumazamizibar anɨngasa, da sara izi."

12 Me gumazamizir kaba kamaghɨn me dɨponam,

‘God Baghavɨra Itir Gumazamiziba’ ko,

‘Ikiavɨra Itir God, ua Inizir Gumazamiziba.’

Egh me kamaghɨn ian nguibam dɨponam,

‘Nguibar God Bar Ifongezim’ ko,

‘Nguibar Ekiar God ua Izegha Itim.’ "