12 "Ezɨ e managh mangɨ fofozir aghuarim ko nɨghnɨzir aghuarim iniam?

Fofozir aghuim ko nɨghnɨzir aghuim iniamin nguibam managh iti?

13 Guizbangɨra fofozir aghuarim ko nɨghnɨzir aghuarim bizir bar ekiam,

egha dagɨar ekiaba ko bizir igharaziba bar dagh afira.

Ezɨ gumazamiziba bizir kam deravɨram a gɨfozir puvatɨ.

Ezɨ fofozim ko nɨghnɨzir aghuarim nguazir kamɨn gumazamizibar tongɨn itir puvatɨ.

14 Ongarim ko an apengan itir danganir bar koniba kamaghɨn mɨgei,

‘Fofozir aghuarim ko nɨghnɨzir aghuarim, aning kagh itir puvatɨ.’

15 Golɨn bar aghuim a pura bizim, nɨ a isɨ ua nɨghnɨzir aghuarim givezeghan kogham.

Fofozir aghuarimɨn ivezim bar pɨn ko, eghtɨ nɨ silvan aghuarimɨn a givezeghan kogham,

silvan aghuarim, a pura bizim.

16 Nɨ kantri Ofirɨn golɨn bar aghuiba ko dagɨar iveziba bar pɨn koziba, da isɨ aning givezeghan kogham.

17 Nɨ aning givesɨ, glasɨn dagɨar ivezir bar pɨn kozim ko bizir aghuir golɨn ingariziba inigham,

noka, nɨ aning givezeghan kogham.

Da uaghan pura biziba.

18 Aningɨn ivezim, bar pɨn ikia adiarir aghuarim ko dagɨar ghurghurir gavgavir glasɨn mɨn taghtazimɨn ivezim bar a gafira.

Pelɨn ivezim bar pɨn ko, egha pelɨn ivezim uaghan fofozir aghuarim ko nɨghnɨzir aghuarim givezeghan kogham.

19 Topasɨn dagɨar iangurir aghuarir me kantri Itiopian isiba ko avimɨn tuezir golɨn aghuiba,

da uaghan fofozir aghuarim ko nɨghnɨzir aghuarim tong aning givezeghan kogham.

Bar puvatɨ.

20 "Ezɨ e managhɨra fofozir aghuarim ko nɨghnɨzir aghuarim batogham?

Fofozim ko nɨghnɨzir aghuarim danganir manamra iti?

21 Fofozim ko nɨghnɨzir aghuarim, gumazamiziba ko angamɨra itir biziba sara bar men modo.

Kuarazir pɨn mɨghagha aruiba, uaghan aningɨn garir puvatɨ.

22 Ovengezibar Danganim ko Ovevem uabɨ, aning kamaghɨn mɨgei,

‘Ga mong aningɨn sighsirir akaba baraki,

egha aningɨn ganizir puvatɨ.’