Mateus 26

Gumazir dapaniba Iesus mɨsueghtɨ an aremeghasa mɨgɨrɨgɨabar kɨri

1 Iesus mɨgɨrɨgɨar kaba agɨvagha, uan suren gumaziba kamaghɨn me mɨgei, 2 ✝26:2 Ua Me Ini 12:1-27; Matyu 20:18; Mak 14:1; Luk 22:1; Jon 13:1"Ia fo, aruer pumuning gɨvaghtɨma, God Israelia Gitazir Dughiamɨn isar ekiam otivam. Eghtɨ me Gumazamizibar Otarim isɨ apanibar agharim datɨghtɨ me a isɨva ter ighuvimɨn a gafugham."

3 Dughiar kamɨn, ofa gamir gumazir ekiaba koma Judabar gumazir aruaba ghua, ofa gamir gumazibar dapanimɨn dɨpenimɨn uari akufa. Gumazir kamɨn ziam Kaiafas. 4 Egha me arazir mogometamɨn Iesusɨn suiragh a mɨsueghtɨ an aremeghasa tuaviba buria, akabav sosi. 5 Egha me kamaghɨn uariv gei, "E isar ekiamɨn dughiamɨn an suighan kogham. E damutɨ, gumazamizir isamɨn itiba men naviba osemegh, egh mɨdorozir dafatam damigham."

Amizir mam borem isa Iesusɨn dapanim ginge

6 Ezɨ Iesus ghua Betanin nguibamɨn aven Saimonɨn dɨpenimɨn iti, Saimon faragha lepan arɨmariam an mɨkarzim gami. 7 ✝26:7 Luk 7:37-38Dughiar kamɨn Iesus dagher dakozimɨn aperaghav itima, amizir mam, borer mughuriar aghuim zuir mam, inigha izi. Borer aghuir kamɨn mɨsevim, me dagɨar ziam alabastan an ingari. Ezɨ borer kamɨn ivezim bar pɨn ko. Ezɨ amizir kam borer kam isava, Iesusɨn dapanim ginge. 8 Ezɨ an suren gumaziba kamaghɨn an gara, navir averiaba ikufi. Egha me ghaze, "Tizim bagha kav borer mughuriar aghuim zuim pazava a gami? 9 E ti anemadagha dagɨar ekiatam inigha asaghasazibagh anighai."

10 Ezɨ Iesus men mɨgɨrɨgɨabagh fogha kamaghɨn me mɨgei, "Ia tizim bagha osɨmtɨzim amizir kam garɨsi? Anetakigh! An arazir aghuim na gami. 11 ✝26:11 Godɨn Araziba 15:11; Jon 12:8; 14:19; 17:11Asaghasaziba zurara ia ko ikiam. Kɨrara, ia ko zurara ikian kogham. 12 Amizir kam nan namnam mozim bagh anekɨrasa, borer aghuir kam na ginge. 13 Kɨ guizbangɨra ia mɨgei, me nguazir kamɨn danganir manabar Godɨn Akar Aghuim akunɨva, amizir kam amizir arazim uaghan a mɨkɨmɨva a gɨnɨghnɨghvɨra ikiam."

Judas Iesus isɨva gumazir ekiabar agharim darɨghasa akam akɨri

14 ✝ 26:14 Jon 11:57 Dughiar kamɨn Judas Iskariot, a 12plan suren gumazir mam, a ofa gamir gumazir ekiaba bagha ghu. 15 ✝26:15 Sekaraia 11:12; Matyu 27:3Egha a kamaghɨn men azai, "Kɨ Iesus isɨva ian dafaribar atɨghtɨ, ia tizim na danɨngam?" Ezɨ me 30plan silvan dagɨar maba mengegha, da isa a ganɨngi.*26:15 Dagɨar 30 silvan kaba ti datɨrɨghɨn en dagɨabar dɨbobonim, ti manmakɨn? Da avɨraseme, egha gumazim iakɨnir 5pla o 6plan ingarizir ivezimɨn mɨn otogham. Nɨ Matyu 27:9-10ɨn gan. 16 Ezɨ dughiar kamɨn ikegha ghua, Judas, Iesusɨn suiragh men dafaribar arɨghasa tuaviba buri.

Iesus uan suren gumaziba ko api

17 ✝ 26:17 Ua Me Ini 12:6; 12:14-20; Mak 14:12; Luk 22:7-9 Ezɨ Yis Puvatɨzir Bretɨn Isam Damuamin Dughiam, an faragha zuir dughiam otozɨ, Iesusɨn suren gumaziba iza kamaghɨn a mɨgei, "Nɨ danganir manamɨn God Israelia Gitazir Dughiamɨn isam amɨsɨ ifongeghtɨ, e an mangɨ bizibar kɨram?"

18 ✝ 26:18 Matyu 21:3 Ezɨ a kamaghɨn me mɨgei, "Ia nguibar ekiamɨn aven mangɨ, egh gumazir kam bagh mangɨ kamaghɨn a mɨkɨm, ‘Tisa ghaze, nan dughiam roghɨra izegha gɨfa. Ezɨ kɨ uan suren gumaziba ko, God Israelia Gitazir Dughiamɨn isam, e nɨn dɨpenimɨn daghebar amam.’ " 19 Ezɨ suren gumaziba Iesus mɨkemezɨ moghɨn ghua God Israelia Gitazir Dughiam bagha dagheba ko bizibar kɨri.

20 Ezɨ guaratɨghɨn Iesus uan aposelba ko me dagher dakozimɨn mɨn apiaghav iti. 21 Me apava a kamaghɨn me mɨgei, "Kɨ guizbangɨra ia mɨgei, ian tav na isɨ gumazir nan apanim gamibar agharim darɨgham."

22 Ezɨ an suren gumaziba akar kam baregha, naviba bar oseme. Egha me bar vaghvagha kamaghɨn an azangsɨsi, "Ekiam, kɨrara markiama?"

23 ✝ 26:23 Onger Akaba 41:9; Luk 22:21; Jon 13:18 Ezɨ a kamaghɨn me ikaragha ghaze, "Gumazir na isɨva apanibar agharim darɨghamim, a uaghan na ko ga uan dafarimning isa itarir vamɨra garugha uam aning asi. 24 ✝26:24 Aisaia 53:1-12; Daniel 9:26; Mak 9:12; Jon 17:12Gumazamizibar Otarim, Godɨn Akɨnafarim mɨkemezɨ moghɨn, an aremegham. Eghtɨ gumazir Gumazamizibar Otarim isava apanibar agharim gatɨzim, gumaka! A bar ikuvigham! Amebam a batezir puvatɨzɨ deraghai!"

25 Ezɨ gumazir Iesus isɨva apanibar agharim darɨghamim, a Judas, a kamaghɨn an azai, "Ekiam, nɨ ti na mɨgɨa ma?"

Ezɨ Iesus ghaze, "Nɨrara, nɨ mɨgei moghɨra!"

Iesus bret ko wain uan suren gumazibagh anɨdi

26 ✝ 26:26 1 Korin 10:16 Iesus uan suren gumaziba ko apava, a bretɨn mam inigha God mɨnabagha anebigha, a isa uan suren gumazibagh anɨga kamaghɨn me mɨgei, "Kar nan inivafɨzim. Ia a inigh aneremɨ."

27 Egha a wain apir kavɨn mam inigha God mɨnabagha, a isa me ganɨga kamaghɨn mɨgei, "Ia bar wainɨn dɨpar kam amɨ. 28 ✝26:28 Ua Me Ini 24:8; Jeremaia 31:31-34; Sekaraia 9:11; Rom 5:15; 1 Korin 10:16; Hibru 9:22Kar nan ghuzim, an Akar Dɨkɨrɨzir Gavgavim, a gavgavim a ganɨdi. A, gumazamizir avɨribar arazir kuraba gɨn amangasa, nan ghuzim me bagha ire.