1 Vuza munuka u foɓuso ta̱, avu Niniva,

u zuwa ta̱ osoji a mashilya ma̱ likuci ma.

a yaꞋan kindi ku ubuta̱ u kusheɗeku wu n nshilya,

foɓuso mayin,

ɓolongu osoji a̱ nu ra̱ka̱.

2 Adama a na Vuzavaguɗu wi ta̱ o kubonoko,

n ugaꞋin u Yahuda n wa aza a Isaraila ra̱ka̱,

ko ɗa baci aza a̱ kupura̱ uciyi,

a̱ pura̱i uciyi u likuci u le ra̱ka̱,

ko ɗa baci a̱ la̱nga̱sa̱i a shina a̱ nɗimbi e le.

3 Nra̱ga̱ mo osoji ma aza a Niniva n na n fuɗai kuvon,

n shilyamgba ta̱ ushili,

osoji i ta̱ u uki,

n akashi a̱ shili.

Ekeke o doku e le a kutasa,

tsu melentsu ma akina,

a̱ kuɗa̱ngusa̱ nsara e kuneke le wovon.

4 Odoku, n ekeke odoku o kuvon,

a̱ ka̱na̱i ilaɗi i kavama a uye,

a kubana n obonoi,

punu asuvu a̱ ka̱ba̱nga̱ ka̱ likuci.

ku uta̱ ku le tsu kutashi ku ma̱kuni ku ɗa,

a nwalu a na ulaɗi.

5 Mogono ma Niniva me ɗekei osoji a gbagbaꞋin a̱ ni,

ɗa a̱ ka̱na̱i ku ta̱ɗa̱tsa̱ n yikpa̱i a uye a̱ kuta̱wa̱.

A dakakai a kubana a mashilya ma̱ likuci ma,

ɗa a̱ shikpa̱i i na i kere le.

6 A̱ ɓa̱yuwa̱i adaɓa a̱ mini,

ɗa kpaꞋa ku mogono ku ripula̱i.

7 O foɗoi Egbere aminya ɗa a lazai n a̱yi,

agbashi a nkere n ni a̱ ma̱shi,

ma̱shi ma kpalu me le tsu ma̱shi ma moɗoi ma a,

a zuwai ekiye e le aci.

8 Tsu mini ma na mo ɓosoi a̱ ka̱sha̱n,

aza a Niniva a kusuma a̱ ku uta̱ punu,

uma a kudana le <<Shamgbai! Shamgbai!>>

Ama babu vuza na u kpatalai wu indanai kucina̱.

9 Pura̱ngi azurufa.

Pura̱ngi azanariya.

Likuci ya yi ta̱ tukpa nu uciyi kakau,

uciyi u ni wi n uteku ba.

10 Niniva u na̱mgba̱ ta̱,

wo okpo ta̱ agali,

a̱ɗu a uma a̱ ni e derikpe ta̱,

a̱ka̱nga̱tsu e le e kujeꞋe,

a̱kyun e le kpamu a mɓa̱la̱,

a̱shi e le ra̱ka̱ a̱ ula̱nga̱shi.

11 Yiɗa̱i i ciya̱i likuci i Niniva,

i na yi tsu kpenle ki ikawu?

Kpenle ku na a̱ tsu ɓa̱na̱ muku mi ikawu,

ubuta̱ u na kawu n a̱ma̱ci e le a̱ tsu ka̱ra̱Ꞌa̱,

koɓolo n muku mi ikawu babu wovon.

12 Kawu u tsu saza ta̱ i na,

i yawai ni koɓolo m muku n ni,

ka̱ta̱ kpamu wu una ka vuka vu ni manama,

u shatangu kpenle ku ni n uciyi ugbani,

ungu a̱ ni kpamu nu nnama n kakamba.

13 Vuzavaguɗu u danai,

<<Mi ta̱ a tsurala n avu Niniva,

mi ta̱ o kusongu ekeke o odoku o kuvon a̱ nu,

ka̱ta̱ kotokobi ku una osoji a̱ nu aza a na i tsu ikawu,

mi ta̱ a̱ kusa̱nka̱ wu vu una uduniyan.

Ka̱ta̱ n sa̱nka̱ aza u suki a̱ nu kubanka n akaka a na e kuneke wovon.>>