1 Bɛŋwaanɛŋ, fiee fi ŋ’wɛki bɛ shéŋ yɛŋ chi, mɔɔ nlɛkɛ wɛŋ li Nyɔ-ɔ, nuuŋ le bɛniiŋ beŋ bɛ Isɛlɛɛ bani naa be bɔnɛ. 2 Fiee fi ŋkii, fi nuuŋ ntee nuuŋ le, be kɛmi ŋgeeŋ weseeŋ li Nyɔ-ɔ. Se nuuŋ le be kii yɛ dze yi shaaŋ yi nuuŋ be biee yi le kɛ. 3 Si be kii yɛ dze yi Nyɔ dzeti le bɛniiŋ baa tsaaŋ lɛ yi-i lii kɛ lɛ, be se tuu baa be gwenini le be fɛ yibe yi dze, be mɛɛŋ baa ki nyɛ kɛ yih yibe le be biee yini dze yi Nyɔ dzeti le wi wɛ tsaaŋ lɛ yi-i lii kɛ. 4 Si Krai tɛ̀ bɛ lɛ, dze yi bɛnchi yi bɛniiŋ tɛ̀ biki le be se nuuŋ tsaaŋ lɛ Nyɔ lii yini tɛ ma, fi se fiɛɛ dɛɛni le numu tsaaŋ lɛ Nyɔ lii nuuŋ le ɔ gɛɛ shéŋ li Krai li.

5 Mɔɔsɛ tɛ̀ tsɛɛ kii dze yi nuuŋ tsaaŋ lɛ Nyɔ lii yi biki nuuŋ bɛnchi le, "Wi wu feti si bɛnchi wɛki gii ni tsiiŋ kifɛ kichɔɔ bɛnchi bɛlu." 6 Se nuuŋ le, fi fiɛɛ le wi ti nuuŋ tsaaŋ lɛ Nyɔ lii biki shéŋ yi wu gɛɛ li yi-i nuuŋ ɛ bɛ tsɛɛ le,

"Ɔ bii kɛ li shéŋ ya-a laa ɛ noo wu gii yɛɛ liboo le kɛ?"

(Fi nuuŋ nuuŋ laa ɛ noo wu gii yɛɛ se bɔɔ bɛ Krai le.)

7 Kɛ le,

"Ɔ bii kɛ laa ɛ noo wu bɔɔ li kwɛɛŋ wu bɛŋku-u le?"

(Fi nuuŋ nuuŋ laa ɛ noo wu gii bɔɔ li kwɛɛŋ wu bɛŋku-u se yɛɛ bɛ Krai le.)

8 Se nuuŋ le, fi tiiti le la? Fi tiiti le,

"Jɛ yi Nyɔ yɛ nɛɛ liwɛ-ɛ lichiŋ.

Yi nuuŋ li kimfimɛ ko, mɔɔ li shéŋ ya-a."

Ɛ yi yi tɛ̀ fenjisi kii ŋgɛɛwu shéŋ li Krai. 9 Ɔɔ tee bɛ kimfimɛ ko le Jiso nuuŋ Taa, ɔ beŋ bɛ shéŋ ya le Nyɔ tɛ̀ buu wu li kwe-e, ɔ bɔnɛ. 10 Fi nuuŋ le wiwoŋ beenchi nuuŋ bɛ shéŋ yee, Nyɔ se dzɔ wu le nuuŋ yɛ bɛ findzɔŋ kɛ. Ɛ wi tee bɛ kimfimɛ kee, kɛ Nyɔ soo yɛ wu. 11 Kiŋwaati ki Nyɔ-ɔ tiiti le,

"Wi wu beŋ li yi-i nuuŋ tɛ naa kɛmɛ buya kɛ."

12 Nɛ kɛɛ le chichi chichi nuuŋ yɛ lu li wi wu Juu bɛ wi wu nuuŋ yɛ wi wu Juu kɛ. Taa wu nuuŋ Te bɛniiŋ bɛchu nuuŋ nɛɛ mumkpaŋ. Ti shiiŋ nɛɛ gwiiyi tsaŋ yee nyɛɛ bulofu li wi kwikwi wu dii li wuu. 13 Fi nuuŋ si bɛ tɛ̀ tsɛɛ lɛ Kiŋwaati ki Nyɔ-ɔ le,

"Wi kwikwi wu dii teenyi bukooŋ bu Taa lɛ,

gii soo wu."

14 Se nuuŋ le bɛniiŋ nuuŋ be geeŋ be se ni be dii be teenyi wu ŋgɛwu shéŋ li wuu nsiŋ? Nuuŋ be geeŋ be se gɛɛ shéŋ li wu fuki fɛ be saa be woo kii wu nsiŋ? Be nuuŋ be geeŋ be se woo Wi wu Ntiifɛ mɛɛŋ ki tee kɛ be kɛ. 15 Nuuŋ bɛniiŋ geeŋ be se gɛɛŋ be ni be fenjisi fuki fɛ bɛ toŋ be nsiŋ? Fi fiɛɛ ɛ bɛ tsɛɛ le,

"Bikaa bi bɛniiŋ bɛ ti bɛɛ bɛ ntoŋ wu dzeeŋ lɛ, nuuŋ bujɔŋ ŋge."

16 Se nuuŋ le, ɛ bɛniiŋ bɛ Isɛlɛɛ bɛchu bɛ beŋ baa ntoŋ wu dzeeŋ wuni kɛ. Ɛ nɛɛ lɛ si kiŋwaati ki ntomfɔŋ wu Ɛsaya tɛ̀ tiiti le,

"Taa, ɛ noo wu se beŋɔ ntoŋ wu tɛ̀ tiifi?"

17 Bɛdɛɛni, ŋgɛɛwu shéŋ dzɛti nuuŋ li fiee fi wi woo kii krai. Fiee fi wi woo se dzɛti li fi-i bɛ tiifi wu kii Krai. 18 Nse ntuu mbiiti laa be ti mɛɛŋ ki woo kɛ le? Bɛ chɛɛŋ be tɛ̀ woo. Kiŋwaati ki Nyɔ-ɔ tiiti kɛɛ kii biee bi Nyɔ tɛ̀ tɔŋ le,

"Jɛ́ yibe gɛɛŋ yɛ yi bo li kikoo ki nshɛ-ɛ kichu,

n’yɔru wube gɛɛŋɔ wu bo li boo yi nshɛ-ɛ chichi."

19 Nse ntuu mbiiti laa fi nuuŋ le bɛniiŋ bɛ Isɛlɛɛ tɛ̀ mɛɛŋ ki woo kɛ bujɔŋ kɛ ni? Mɔɔsɛ tɛ̀ saa kweeŋ le Nyɔ tiiti yɛ le,

"Ŋgii mfɛ le kimi ni ki fuumi beŋ bɛ

kintutu ki bɛniiŋ bɛ yee lɛ,

mfɛ tɛ le shéŋ ni yi tɔnyi beŋ bɛ kitoŋ ki bɛniiŋ bɛ nuuŋ bibere."

20 Ɛsaya tuu yɔ nchɛnu nsiŋ le Nyɔ tiiti yɛ le,

"Bɛniiŋ bɛ ti mɛɛŋ ki gɔɔŋ kɛ mi kɛ be ŋɛŋ baa mi.

Mi nse ndoonchɔɔ yi yɛŋ li bɛniiŋ bɛ ti mɛɛŋ ki bii kɛ mi kɛ."

21 Se nuuŋ le kii bɛniiŋ bɛ Isɛlɛɛ Nyɔ tɛ̀ tee le,

"Jo chi ntuu nuuŋ nɛkisi tsaŋ yɛŋ le mfi bɛniiŋ,

se nuuŋ le be tɛɛmi bikoo be giiŋgi yibe yi dzé."