Raaga 10

Erggichchatina kic’c’arkki kaduubame kagalbbaa mas’aafa

1 Hikkakko abbaabatere duumanchcha kasarsatera kakkalee kaɂatii erggichchati daruurkko dagaa giraan ani dee; metekkeessakko guuntte jereen kaɂidaamo gire; bebbeedtteessa ariti aani, luk’k’aɂoottessa tukkul aallite tabbeebatto eleen aaniyyeen; 2 Kabanamero kic’c’arkki kagalbbaa mas’aafa genetteessaayi abate gire; luki tamergge bekee gutii, luki tabete bagaa kaate; 3 Kahark’k’aaro luubaankotti yaaye aanittitti taɂatii yaayee okkee; kakkoɂokkaare goorata didideenna todoba yaayetisoo maalssisse. 4 Hitta todoba tadidideenna yaayetisoo kakkomaalssisareen goorata ani s’aafiin k’oppaaye; ayesuun goɂameen «Didideennal todoba kaɂayeeseran golisa wodanaa aba kuwaarre aroos’aafitte!» taɂamatto yaaye daruurkko ani maale.

5 Hikkakko abbaabatere beke orroonna bagaa aallee giraan ani kaddeere erggichchati gene tamergge eleddeese daruur tos keesategure, 6 Jiruu jiroommakko taa jiruu jiroomma geeroon kagirnnaro, daruurnna daruurii kagiro, ulnna ulii gutii kagiro, bekena bekee orroo kagiro kamet’t’eerokokki megeeyi ammatere usu haa ame, «Hittakko horenbbaan lakkoɂadallaayinaro! 7 Ayesuun goɂameen katodobi erggichchati malakata ufuufe kakkomaalssisaro arrijjoolii usuun ohandaaran ohegeroolun goggosegeerokki malee hool tawaa feloo hayisinara.»✝10:7 Biy. 20:11; Ada. 32:40; Dan. 12:7; Amo. 3:7. 8 Esekko abbaabayere hasse daruurkko ani tamaalera yaaye, «Bekeenna bagaa kaɂaalleero erggichchati tos seegudde genetteessaayi kagirona kabanamero kagalbbaa mas’aafa aati» amaa ade iin ayeese.

9 Ani erggichchati tos seeyegure, «Kic’c’arkki kaduubame kagalbbaa mas’aafa iin sisi» ame; usuna «Aatigudde aami; bogikkaayi kaɂokokoote linnara; hiɂittaawun ade malab aani onɂomooyinara» ame.

10 Aninna kic’c’arkki kaduubamero kagalbbaa mas’aafa taɂerggichchati genekko atayere aame; hiɂitteeyi malab aani onɂomoote; aame kakkoɂabbaabatare goorata bogikki kaɂokokoote lee.✝10:10 Iz. 2:8-33. 11 Esekko ade, «Tammooggan una maraan, gosa maraan, heɂi tammooggani kaɂayeesaro ibaaddo maraanna wonolaal maraan adi ati hegero ayeesin dootisara» amame iin segaame.