1 «Kaɂefesooni amaniilkokki erggichchatin haa ami s’aafi;

Hikki ayees barraajjaal todoba gene tamerggeeyi kaɂabaterana kawork’k’ii bollanssool todoba t’eɂee kasesseetara haa amara; 2 Feloɂoottaa, wudettaamanokkaanna obssittaa ani kasowa; omeellan adde obssiin daandaana kawaattetto, ofarameeraan anlleenon giraan no ofaramnnenonna oɂamaraan k’ok’k’orttedde ot’araa olleeraan helanokkaa ani kasowa. 3 Obssii ataatanokkaanna megekkee maraan ahifannoni rakkoo atatanokkaa ani kasowa.

4 Ayesuun goɂameen ani ku kakkotuffayero ayees aba; hikkina ati tat’t’awoo geelanjje iissetta. 5 Goortta ati eerraa abbaabatte iitetto shaadi; c’ubbokko gula gali! T’ayite ofelaatte feloɂoottaa fela; hikka dubba felana gowaatte ani ku tos emeeyinara; c’ubbokko gula galanagowaatte bollanssokkaa banɂekko keesinnara. 6 Ayesuun goɂameen ani ku kakkogalataara ayees koo gira; hikkina ani oneebaataro kanik’oola ibaaddokonɂi felo diiddetta.

7 «Ayyaana amaniil dubbaan kaɂamaro nebe kaɂaba hamaalo! ‹Kaɂawodinaron gannate kawaayi orroo kagiro kagiri gaakotti il goggoɂaamiroon ani usu yelinnara.›✝2:7 Met'. 2:9; Rag. 22:2; Hiz. 28:13; 31:8.

8 «Kasemernnesi amaniilkokki erggichchatin haa ami s’aafi;✝2:8 Isa. 44:6; 48:12; Rag. 1:17; 22:13.

Hikki kahoreenna kahaaree kalleero; kagoyerena arddokki kalleera haa amara. 9 Rakkoottaanna hiyyummattaa ani kasowa; halleewo kuwaarre ati dureessatta; Ayihuudi anlleenon giraan noo Ayihuudinna oɂamaraan tas’alayee una olleeraan, megekkaa kabaaseran ani kasowa; 10 Horenbbaan ku tagginnatto rakkoowun arooɂabssatte; gidda isin goggoc’aafanttaanun durrisa isinkko kookkoo minkashaano tabisinnara; arri tomonnuun rakkoo atayinattaan; taaggooton kaɂabddantte lee; kagiri kallachcha ani kuun sisinnara.

11 «Ayyaana amaniil dubbaan kaɂamaro nebe kaɂaba hamaalo!

«Kaɂawodayinaro goyi kallami lakkomiirɂo.»✝2:11 Rag. 2:14; 21:8.

12 «Kap’erggaamo amaniilkokki erggichchatin haa ami s’aafi; hikkina mina lamane kaɂenenaatero shiifa kaɂabera haa amara; 13 Ati kas’alaye korffinjje takkogiro banɂee giranokkaa ani kasowa; halleewo kuwaarre ati megekkee ataayissatte abattetta; ati iyyee kaɂabtto ammano lakkokakattetto; kaɂabddame atokkee kalleere Antip’aasi s’alaye takkogitte katamaattisinii kakkolagadeeren goorata ati iyyee ammananokkaa suure lakkoɂiissette.

14 Ayesuun goɂameen ani ku kakkotuffataro ayees kookkoo aba; hikkina kabalaɂaami agaalssis kaɂabatera ibaaddo kookkoo isin orroo gira; hikki Baalaami kaɂisiraɂeel gosa tolchchaan kajaarssamero babo goggoɂaamironna sharmmut’aanoyi goggohandudufarawun Baalak’iin markka kasiseroya.✝2:14 To. 22:5,7; 31:16; Ada. 23:4; To. 25:1-3. 15 Usumaleenna kanik’oola ibaaddokokki agaalssis kaɂaba ibaaddo isin orroo gira; 16 Haanssun c’ubbokko gula gali; goorttun ani saami ku tos emeeyigure hiɂitteekko kabeyaaro shiifayi ani iso eegginnara.»

17 «Ayyaana amaniil dubbaan kaɂamaro nebe kaɂaba hamaalo! Kaɂawodayinaroon siyyame kagiro mannakko ani usuun sisinnara; kaɂusubkki mege kakkos’aafamero gumaarakki eɂemo sisinnara; kaɂatayinnaro kuwaarre hikka kakkalee maayyona laakaso.»✝2:17 Biy. 16:14-15; 16:33-34; Yan. 6:48-50; Isa. 62:2; 65:15.

18 «Katiyaat’irooni amaniilkokki erggichchatin haa amidde s’aafi;

Hikkina lac’a kaɂeleenee aani ollaaraan ilɂo kaɂabokkona boolaal kaɂeleeneeyi kadubamero tanaasi marc’c’o aani ollaaraan luk’k’a kaɂabo; ere kawaakko kasegaameroya; 19 Felo oottaanna geelanjjettaa, ammanokkaanna handdaanokkaa obssii ataatanokkaa ani kasowa; ohaaree feloɂoottaa ohoreekko roorano ani kasowa.

20 Ayesuun goɂameen ani ku kakkotuffataro ayees koo aba; hikkinna ‹Ani kahegerooya› taɂamatte heleelttiti Elzaabeli ati donnaa leete obssiitetta; esena iin ohandaaran goggosharmut’irawunna tolchchaan kaɂekkaatero babo goggoɂaamirawun agaalssisanoyi iso sossoyisatta.✝2:20 1 Won. 16:31; 2 Won. 9:22,30. 21 Ese c’ubbokko gula goggogalttoon ani eseen arri sisere; ese goɂameen sharmmut’aano iisidde c’ubbokko gula galin lakkodootattetto. 22 Haanssun alggaayi gutii huddurisire hawɂaamii ese abboosisinnara; esene wota felo omeellan ofelaraan omeellan felo oottisokko gula gogaleen kuwaarre esene wota osharmut’eeraan dubbaan kaɂatii abboosa ani isoon keeninnara; 23 Yiiskkisee goyii murrisinnara; amaniil dubbana taɂibaaddoo k’ofana halchcha kak’ok’k’orara ani laano iso kasaanwa; metemetekkisoowun feloɂoottisokki malee ani isoon sisinnara. 24 Tiyaat’ironii ogittanuunna hikka kameellan agaalssis oɂatatanawaatteettaan isin dubbaan, usumaleenna kookkoo ‹Tas’alayee taɂorroo hooltta› oɂamaraanne wota debee osessennon isinuun kakkalee ajaja ani lakkosisinaro; 25 Ayesuun goɂameen ani taa emeerooni kaɂabttaan ammano ataayisayeen abayeen.

26 Kaɂawodayinaroonna feloɂootteeyi taagachcho geeroo kaɂataataroon ani Ayizaab gutii odonnati sisinnara;

27 ‹Dama tamarc’c’ooyi usu isin bariisinara errekko kafelamero huu aani c’anc’c’ani usu iso bututisinnara› hikki odonnatina ani Aabbokkeekko kaɂatayero odonnati aaniya; 28 Awodanokokki malaata kalleero kababbarisee bakkaala ani usuun sisinnara; 29 Ayyaana K’ulluukki amaniil dubbaan kaɂayeesaro nebe kaɂaba hamaalo!»