Raaga 20

Gees kumakokki wono

1 Hikkakko abbaabatere boollakki gumbbi kakkobanaraanna sanssalata genetteessaayi kaɂabatera erggichchati daruurkko dagaa giraan ani dee; 2 Dobos abegure gees kuma shiye; hikki dobonssa durrisa goorttun S’alaye taɂamamatto kahoree habeessaya;✝20:2 Met'. 3:1. 3 Hikki dobos ibaaddo goggosoboonkko gees kuma taa ammagamiroon erggichchati hikka dobos bowwakki gumbbi orroddeese lugude; c’ufegure kakkalee maayyona goggobaannonkko maatama kaye; esekko abbaabayire goorata kic’c’aruun usu furamiin dootisara.

4 Esekko abbaabayere ani korffinjjeel dee; usu korffinjjeeli gutii kakkofirddiiro odonnati kaɂabo kahamas’eero dee; gara kayesuusa mankkoɂatoteeran maraanna haafura kawaa maraan metekkiso kakkogoosamero ibaaddokotti neefo ani dee; iso sulaalewunna middi tasulaalen sagadoon ogiraan malaatakkeessa bebbeedttisoyinna leere genetisooyi gutii ankkaannon ogiraanyan; iso goyikko keengureen Kiristoosane wota gees kuma reeden.✝20:4 Dan. 7:9,22. 5 Kahesere kagoyera ibaaddo ade gees kuma taaɂammagamiroo goyikko lakkokeeran; hikkina kahoraarjjee goyikko keyaanoya; 6 Kahoraarjjee goyikko keyaano ohelateeraan osommaasameenna k’ullooleeyaan; kallami goyi isoo gutii odonnati lakkoɂabo; iso owaanna okiristoosa tuuk’aamol linnaraan; Kiristoosane wota gees kuma reedinnaraan.

S’alayekokki awodamano

7 Gees kuma kakkogudate goorata s’alaye shaanokko furaminnatta; 8 Alami dubbaa gutii kagiro gosa Googina Maagoogi sobiinna jereen tos tabisin emeeyinnara; mooggankkisona labuu tagitto c’eekale aaniya.✝20:8 Hiz. 7:2; 38:2. 9 Iso ul dubba gambbameen kak’ulloolee maamanna tageelaatanttetto katamaa maraamureen abeen; ayesuun goɂameen eleen daruurkko dayidde iso gubtte baasse. 10 Iso kasobere durrisa, sulaaletina kat’araa kahegeroo mankkogiro rees takkogubataro badi taɂeleenetii orroddee shafameen; esee arriinna hemeen jiruu jiroommakko taa jiruu jiroomma geeroon abboosaaminnaran.